Братот на убиениот лидер на СДП, Оливер Ивановиќ, во интервју за „Данас“ вели дека во изминатите десет месеци никој од трите партии вклучени во истрагата не се обратил до семејството на убиениот. Мирослав Ивановиќ појаснува дека мисли на косовската страна, Белград и Еулекс.

Истакнал дека никој не им се обратил дури ниту од човечки причини да ги извести за глобалниот тек на истрагата.

Извршителите и оние кои дале наредба за ова злосторство засега не се познати на јавноста, како што и не се знае речиси ништо за истрагата, која на 8 март Специјалното обвинителство ја презеде од Основното обвинителство од Косовска Митровица, пренесува „Данас“.

Како што се наведува во текстот, се додека официјален Белград, Приштина и меѓународната управа на КиМ молчат, прашање е дали опозицијата во Собранието на Србија ќе стори се што може, барем да не се молчи за ликвидацијата на Оливер Ивановиќ.

Во Подгорица се одржа шеста парада на гордоста со слоганот „Не сакаме синџири“. Собирот помина без инциденти, соопшти црногорската полиција. Од собирот во главниот град на Црна Гора порачано е дека припадниците на ЛГБТ популацијата, не сакаат синџири и дека се почитува борбата за основна слобода и основни човекови права, пренесе ЦДМ.

Собирот се одржа во центарот на градот, а на него присуствуваа организаторите, претставници на цивилниот сектор, политички партии и Владата на Црна Гора.

На парадата присуствуваше и директорот на Управата на полицијата, Веселин Вељовиќ со соработниците. Поради парадата, затворен беше сообраќајот во центарот на Подгорица.

Претседателката на Хрватска, Колинда Грабар-Китаровиќ, синоќа беше на натпреварот меѓу Хрватска и Шпанија на стадионот „Максимир“. Хрватска со гол во последен момент ја победи Шпанија, а претседателката по натпреварот беше добро расположена, објави Индекс.хр.

„Беше напнато, ви реков дека ќе победиме. Им честитам на играчите и на Далиќ. Добар натпревар. Им честитам на навивачите“, рекла таа.

В недела Хрватска ќе игра против Англија на „Вембли“. Но, Грабар-Китаровиќ се сомнева дека ќе го гледа натпреварот во живо. Вели дека не знае дали ќе има пари.

„Не знам дали ќе успеам. Знам дека е решавачка. Одам на финалето на Дејвис купот, па не сум сигурна дека ќе имам финансиски средства уште оваа година да отидам и на ‘Вембли’“, рекла претседателката, пренесува РТЛ.