Во предградијата на Атина во неделата избувнаа судири меѓу полицијата и граѓаните по бруталната интервенција на полициските службеници за да се провери дали граѓаните ги почитуваат епидемиолошките мерки, што предизвика бран незадоволство во земјата.

Полицијата употреби солзавец за да растера скоро 500 луѓе кои во неделата попладне беа собрани на плоштадот Неа Смирни, во јужното предградие на грчката престолнина, во знак на протест против инцидент што се случил претходно истиот ден.

На снимките од попладневните часови на истото место се гледа како полицаец со палка безмилосно тепа момче.

Се слуша и младиот човек како лелка од болка додека пак минувачите се згрозени од полициската акција.

Полицијата соопшти дека испратиле патрола со мотоцикли на плоштадот Неа Смирни попладне за да проверат дали се почитуваат мерките за контрола на коронавирусот, додавајќи дека добиле голем број извештаи за непочитување на тоа место.

Полицијата додаде дека во тие моменти нејзините припадници биле нападнатти од околу 30 лица, при што биле повредени двајца полицајци. Уапсени се единаесет лица.

Од грчкото МВР исто така соопштиле дека спроведуваат внатрешна истрага за полицаецот кој бил снимен како го удира момчето.

Грчките власти во неделата пријавија 1.142 нови случаи на коронавирус и 53 починати, со што бројот на смртни случаи достигна 6.758 од почетокот на пандемијата.

Од денес, кафулињата и рестораните во два региона, во Посавје и на југоисток од Словенија, ќе можат да работат нормално во пробен период што ќе трае седум дена.

Словенија е во портокалово ниво на ограничувачки мерки, но овие два региона минатата недела, поради падот на бројот на заразени, преминаа во поблага, жолта зона, во која на кафулињата и на рестораните им е дозволено да обезбедуваат услуги на отворено, пренесе агенцијата СТА.

Гостите ќе можат да се опслужуваат од 06:00 до 19:00 часот и ќе треба да ги напуштат објектите до 19:30 часот.

Доколку бројот на заразени се зголеми или инспекцијата утврди кршење на мерките, владата повторно ќе ги затвори кафулињата и рестораните.

Муштериите ќе мора да носат маски, освен кога седат на маса, кога пијат или јадат, а вработените нема да можат да ги симнуваат заштитните маски на работа и ќе мора да се тестираат за ковид еднаш неделно.

Лицата кои биле превакцинирани и поранешни ковид-пациенти се ослободени од правилата за тестирање.

Денеска ќе бидат отворени и средните училишта, така што едната група ученици ќе доаѓаат во образовните институции, другата половина ќе следи часови на интернет од дома и тоа ќе се менува, при што група ученици кои одат на училиште треба да носат заштитни маски.

Државата ќе започне да ги вакцинира наставниците постари од 50 години, но тие ќе мора да се тестираат еднаш неделно.

Здравствениот дом во Подгорица денеска ќе започне со вакцинација против коронавирусот.

„Вакцинацијата, за почеток, е организирана на четири пункта во Спортскиот центар Морача и два во здравствената установа Стара Варош. Подоцна, според потребите, ќе се отворат контролни пунктови и во други здравствени установи предвидени за тоа“, се наведува во соопштението.

Здравствениот центар потсетува дека прва приоритетна група за вакцинација против коронавирус се лица постари од 80 години.

Во Црна Гора, вакцинацијата започна на 20 февруари, откако првите 2.000 дози на руската вакцина „спутник В“, Црна Гора ги доби како донација од Србија. Првото вакцинирано лице било од старски дом во Грабовац во Рисан.

После тоа, 5.000 дози „спутник В“ од Русија пристигнаа во Црна Гора, а потоа уште 30.000 дози на кинеската вакцина од „Синофарм“.

Во меѓувреме, од Црна Гора пристигна и втората пратка од уште 5.000 дози вакцина „спутник В“, од вкупно 50.000 договорени дози на тој производител.

Во Црна Гора досега 2.406 лица или 0,4 проценти од населението се вакцинирани против коронавирус, објавено е на веб-страницата covidodgovor.me.

Според процените, на Црна Гора и требаат најмалку 248.000 дози вакцина, колку што е побарано преку програмата „Ковакс“, со цел да се вакцинираат 20 проценти од населението со две дози.