Регион
(Видео) Москва: Белград има право да врати ограничен број полицајци и војници во Косово

Белград има право да врати ограничен број свои полицајци и војници во Косово, изјави денеска рускиот амбасадор во меѓународните организации во Виена, Михаил Уљанов, пренесува „РТ Балкан“.
„Со оглед на актуелната ситуација во Косово и Метохија, би било корисно да се потсети дека во согласност со Резолуцијата 1244 на Советот за безбедност на ОН, Белград го задржува правото да врати ограничен број свои полицајци и војници во тој регион“, напиша Уљанов на „Телеграм“.
Во исто време се огласи и Пекинг со поддршка за Србија во нејзините напори да ги заштити својот суверенитет и територијален интегритет.
„Кина посветува големо внимание на релевантните настани и ги поддржува напорите на Србија за заштита на својот суверенитет и територијален интегритет“, изјави официјалниот претставник на кинеското Министерство за надворешни работи, Мао Нинг, коментирајќи ја ескалацијата на Косово.
Пекинг го повика НАТО искрено да ги почитува суверенитетот и територијалниот интегритет на Србија и да преземе активности што ќе придонесат за мирот, нагласи таа, и додаде дека Кина се противи на едностраното дејствување на косовските власти.
Претседателот на Србија, Александар Вучиќ, денеска се сретна со рускиот, а подоцна ќе се сретне и со кинескиот амбасадор во поглед на влошената ситуација на Косово, соопштија од администрацијата на Вучиќ. Во зградата на Претседателството на Србија во тек е средба на претседателот Александар Вучиќ и рускиот амбасадор во Србија, Александар Боцан-Харченко.
„Го информирав амбасадорот Харченко за ескалацијата на насилството и бруталната дискриминација врз Србите во Косово и Метохија. И покрај најбруталното кршење на сите меѓународни договори, Србија ќе работи на зачувување на мирот и стабилноста барајќи итно усвојување и спроведување мерки што ќе ја гарантираат безбедноста на Србите во Косово и Метохија, што е предуслов за каква било понатамошна дискусија со претставниците на привремените институции во Приштина“, рече Вучиќ.
View this post on Instagram
Србите и денеска се собраа пред трите општини со мнозинско српско население на северот од Косово за да влезат на работа во зградите, но ниту КФОР ниту косовските специјалци не им дозволиле да поминат.
Припадниците на косовската полиција сè уште се во зградите на општините на северот од Косово, а припадниците на КФОР формираа кордони пред нив.
Претставникот на привремената управа на општина Звечан, Драган Недељковиќ, изјави дека Србите, кои вчера беа приведени во Звечан, сè уште не се ослободени.
Недељковиќ синоќа ги информира претставниците на Српската листа дека повторно разговарале со командантот на КФОР, кој им рекол дека чекаат документи за ослободување на приведените Срби.
„Според информациите што ги имам, тие сè уште не се ослободени. Факт е дека КФОР веднаш им ги предал на Албанците“, рече Недељковиќ.
Тој додаде дека од КФОР ветиле оти сите припадници на специјалните косовски единици треба да се повлечат денеска до 15 часот.
„Дојдовме да почекаме, чекаме да дојде 15 часот и сите да си заминат“, изјави Недељковиќ.
View this post on Instagram
Во меѓувреме, на зградата на Општина Зубин Поток веќе го нема знамето на Косово, кое, наместо на јарболот, беше поставен на терасата на вториот кат за да не може да се отстрани. Србите го закачија знамето на Република Србија на столб пред Општината.
На кружниот тек во Грачаница, пак, кај споменикот на Милош Обилиќ, поставено е ново знаме на Србија откога старото било запалено во текот на ноќта.
Директорот на Канцеларијата за Косово и Метохија, Петар Петковиќ, денеска соопшти дека палењето на српската тробојка во Грачаница е налудничава забава од омраза.
„Ноќеска албански екстремист во Грачаница ја запалил српската тробојка во својата налудничава забава од омраза инспирирана од нападот на терористите на Курти врз српскиот голорак народ на северот во Косово и Метохија. Србите веднаш го заменија знамето со ново бидејќи омразата никогаш нема да биде посилна“, напиша Петковиќ на „Твитер“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Рама по реакциите за испраќање на КФОР на северот на Косово: „Болно е политичари од лажни профили да манипулираат“

Албанскиот премиер Еди Рама изјави дека КФОР е мисија на НАТО Алијансата, а не окупаторска сила на Србија, нагласувајќи дека реакциите на неговата изјава дека КФОР мора да ја преземе контролата врз северот се болни и смешни.
Рама во долга објава на социјалните мрежи изјави дека Владата на Албанија комуницирала со највисоките нивоа на Евроатлантската алијанса за да ја гарантира безбедноста на северот на Косово.
„Како дел од поддршката на Албанија за гарантирање на безбедноста на северот на Косово и преземање контрола од КФОР, во оваа фаза кога постои алармантен ризик од ескалација на конфликтот, комунициравме на највисоко ниво на евроатлантската алијанса и изразивме максимум готовност. Од друга страна, на сојузниците им ги пренесовме причините за нашето несогласување со последното соопштение на ЕУ, продолжувајќи да го бараме нивниот јасен став, во врска со вооружената криминална група која го уби косовскиот полицаец и по повод Денот на жалост во Белград“, напиша Рама на социјалната мрежа „Икс“.
Премиерот на Албанија ги потсети „оние во Приштина кои, како што рече, имаат време да користат лажни Фејсбук профили дека КФОР е НАТО, пренесува „Косово онлајн“.
„Потсетувам: КФОР е НАТО и не е окупаторска сила во име на Србија, ниту сила која ја дели територијата на Косово, туку напротив, многу голема гаранција во секој случај на закани!“, напиша Рама.
Тој рече дека такво барање испратила и претседателката на Косово, Вјоса Османи.
„Вчера јасно кажав дека ова барање е дадено од претседателката Османи и дополнително објаснив дека ова што го барам денеска нема никаква врска со она што го изразив пред неколку месеци, како страв дека тоа може да се случи доколку ситуацијата се влоши во отсуство на резултати од дијалогот. Бидејќи, како што објаснив вчера, „сè уште не сме таму“ и за да не одиме утре таму, КФОР мора што поскоро да ја преземе контролата врз северот“, напиша тој.
Рама нагласи дека сите го знаат фактот дека во секој случај и за секоја нова оперативна потреба на територијата на Косово, КФОР ги координира своите акции со државните власти на Косово и со безбедносните сили на Косово и затоа е болно колку што е и смешно што и во оваа многу сериозна ситуација за безбедноста на северот на Косово, политичари од јавни или лажни профили во Приштина се впуштаат во такви ниски манипулации со емоциите на своите граѓани, намерно искривувајќи ги неговите ставови.
Претходно денес и претседателот на Србија, Александар Вучиќ, рече дека е потребна посилна улога на КФОР, особено на северот на Косово и дека не му пречи што КФОР го зголемува бројот на војници таму.
„НАТО не ни пречи, нека праќаат, така помалку Курти ќе дивее“, рече тој.
Регион
НАТО испраќа нови сили во Косово

НАТО објави дека одобри дополнителни сили за решавање на актуелната ситуација во Косово, но не го прецизираше бројот и не кажа од кои земји.
Судирите избија минатиот викенд меѓу полицијата и вооружените Срби.
Косовската претседателка Вјоса Османи ги обвини Србија и нејзиниот претседател Александар Вучиќ дека се одговорни за нападот врз косовската полиција на северот од земјата, велејќи во интервју за „Ројтерс“ во четвртокот дека Косово е „нападнaто“.
Триесетина вооружени Срби во неделата ја нападнаа косовската полиција во селото Бањска, по што се забарикадираа во манастир на Српската православна црква.
Загинаа тројца Срби и еден косовски полицаец, а досега три лица се обвинети за учество во нападот.
Србија, која не ја признава независноста на својата поранешна покраина, го обвинува Косово за поттикнување на насилството преку малтретирање на етничките Срби.
Регион
(Видео) Косовската полиција објави како изгледа куќата на Милан Радоичиќ и го спореди со Пабло Ескобар

Косовската полиција од утрово го претресува имотот на Милан Радоичиќ, поранешниот потпретседател на Српската листа, кој организираше акција во селото Бањска во која загинаа четири лица, пренесуваат српските медиуми.
Косовскиот министер за полиција Џељај Свеќља објави видео од внатрешноста на вилата на Радоичиќ на брегот на езерото Газиводе, нарекувајќи го Пабло Ескобар од регионот.
„Детално и до крај ќе се истражува терористичкиот напад со кој се соочи косовската полиција во селото Бањска. Косовската полиција, согласно судската наредба, денеска изврши претрес во станот на Милан Радојчиќ, неговата вила на Ујманското езеро“, напиша Свеќља на својот Фејсбук профил, пренесе „Нова.рс“.
„Дури и од сликите што може да се видат, очигледно е дека не се работи за „борец за слобода“ туку за Пабло Ескобар од регионот. Под превезот на бранител на граѓаните, тој и неговите соработници станаа мултимилионери на сметка на законот, државата и другите граѓани. Затоа, неопходно е да се истражи местото на злосторството сите овие години на северот на земјата заедно со целиот имот на терористичката група“, заклучи Свеќља.
Од утрово трае претресот на имотот на Милан Радоичиќ во Косово, а во меѓувреме тој ја призна целосната одговорност за настаните во селото Бањска, кога загинаа четири лица.