Регион
Преглед на состојбата во регионот: Албанија со нов рекорд на новозаразени, во Косово уште 13 починати

Преглед на состојбата со коронавирус во регионот во последното деноноќие.
Нов рекорд на новозаболени во Албанија
Откако Албанија вчера регистрираше рекордни 120 новозаразени, што е најмногу од почетокот на пандемијата, денеска забележан е нов рекорд. Имено, во последните 24 часа во земјата, потврдени се 123 нови случа, а починале пет пациенти, на возраст од 47 до 72 години, тројца од Скадар и двајца од Тирана.
Од последно потврдените нови случаи половина се од Тирана, каде се и половина од активните случаи или 1.285 лица.
Во Косово уште 13 починати и 245 заболени
Пораст на бројот на заболени и починати е регистриран и во Косово. Денеска во земјата има 245 новозаразени, што е за 9 повеќе од вчера, а зголемен е и бројот на смртни случаи од 10 на 13.
Вкупно, од почетокот на епидемијата, во земјата се регистрирани 8.799 заразени. Излекувани се 4.863 лица, а активно заразени се 3.687.
Србија со помалку случаи на новозаразени во споредба со вчера
Според најновите податоци во Србија уште осум пациенти ја загубиле битката со ковид-19.
Потврдени се 311 новозаразени, што е помалку од вчера кога имаше 330.
Голем пад на бројот на новозаразени во Бугарија во споредба до вчера
Во Бугарија во изминатите 24 часа се потврдени 146 нови случаи на коронавирус од извршени 3.955 тестови. Во земјата вчера беа потврдени 270 новозаболени.
Вкупниот број од почетокот на пандемијата е 11.836 лица, во моментот активни се 5.055 од случаите.
Хоспитализирани се вкупно 793 лица, од кои 43 во одделенија за интензивна нега. Излечени се 6.396 од кои 77 во последните 24 часа.
Две лица починаа, со што вкупниот број жртви достигна 385.
Во Грција 75 новозаболени
Грчките здравствени власти вечерва објавија 75 нови случаи на коронавирус и 2 смртни случаи во последните 24 часа.
Вкупниот број случаи се искачи на 4.662, со 208 смртни случаи.
Денешните податоци се помалку алармантни од вчерашните, кога беа регистрирани 110 новозаболени.
60 новозаразени во Црна Гора
Во последните 24 часа во Црна Гора биле потврдени 60 нови случаи на коронавирус врз основа на 431 тестирани примероци, а едно лице починало, соопшти Институтот за јавно здравје.
Половина од новозаразените се од Подгорица.
Вкупниот број на активни случаи во Црна Гора во моментов е 1.762 лица. Од почетокот на пандемијата, вкупниот број регистрирани случаи на инфекција со новиот коронавирус к 3.258.
Вкупниот број на смртни случаи поврзани со ковид-19 од почетокот на јуни е 42, а од почетокот на годината 51.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Во Бугарија и Романија на сила црвен метео аларм поради обилни дождови

Во Бугарија и Романија на сила е црвен метео аларм поради обилни дождови. Обилните дождови продолжија да ја погодуваат Бугарија, што доведе до затворање на патишта, прогласување црвен метео аларм во неколку области, а 51 населено место останаа без електрична енергија поради бурата. Надлежните органи го интензивираат надзорот над сите мостови и инфраструктура што е потенцијално оштетена од поплавите, пишува денес „Новините“. Службениците предупредија дека секоја локација што е изложена на ризик ќе биде веднаш затворена.
Граѓаните се повикуваат да бидат внимателни, да избегнуваат патувања и да ги следат упатствата на надлежните служби. Бугарскиот национален институт за метеорологија и хидрологија прогласи црвен метео аларм, највисоко ниво на предупредување, за осум области каде што се очекуваат повеќе од 65 литри дожд на квадратен метар, пренесува Танјуг.
Во исто време, властите објавија дека Бугарија ќе побара помош од Европскиот фонд за солидарност за погодените места поради предизвиканите штети.
Метеоролозите во Романија денес го продолжија црвениот временски аларм поради предвидените обилни врнежи од дожд за пет области и градот Букурешт со можност за врнежи до 140 литри на квадратен метар.
Според најновото предупредување на Романската национална метеоролошка управа (ANM), од 21 часот на 7 октомври до 15 часот на 8 октомври се очекуваат обилни врнежи од дожд во неколку области, пишува романската новинска агенција Аѓерпрес.
Фото: принтскрин
Регион
Убиен судија на Апелациониот суд, во судница во Тирана

Судијата Астрит Каљаја беше убиен денес во Апелациониот суд во Тирана додека траеше рочиштето.
Напаѓачот, засега непознат, влегол во судницата и го застрелал Каљаја, кој бил однесен во болница каде што му била пружена медицинска помош, објавува „Албанија пост“.
На местото на настанот, според медиумот, има бројни полициски сили, кои веднаш го уапсиле осомничениот сторител, а како што се наведува, идентитетот на напаѓачот и мотивите на нападот засега се непознати.
Судијата Астрит Каљаја служел со години во албанскиот судски систем, а неодамна во Апелациониот суд во Скадар.
Тој го поминал процесот на верификација во 2019 година, каде што бил потврден на функцијата од Независната квалификациска комисија, а потоа и од Специјалниот жалбен панел во 2022 година.
Фото: принтскрин
Регион
Пронајдени се телата на браќата од Хрватска во словенечките Алпи

Словенечките планински спасувачи ја продолжија својата акција утрово под врвот Тошќ, во Јулиските Алпи, каде што вчера лавина затрупа тројца хрватски планинари.
Исчезнатите лица, по кои се трагаше од вчера, за жал се пронајдени мртви, објавува словенечки 24ur. Како што неофицијално дознава словенечкиот медиум, двајца од нив биле браќа.
„Ги пронајдовме двајцата – едниот беше закопан околу еден метар во снегот, а другиот околу метар и пол. Првиот успеавме да го транспортираме во долината со хеликоптер, додека сè уште чекаме транспорт за вториот. Самиот терен е многу тежок бидејќи е карпеста, стрмна клисура со бројни карпести скокови, што ја направи работата опасна и тешка за спасувачите. За жал, ќе кажам дека сите тројца планинари што ги пронајдовме во лавината починаа. Им изразувам искрено сочувство на нивните семејства“, рече тој.