Стефан Војниќ (27) од Белград, кој во моментов се наоѓа во најопасниот град во светот Вухан којшто веќе неколку дена е во карантин поради порајавата на коронавирусот, за српската агенција „Танјуг“ вели дека не стравува од зараза бидејќи се придржува до сите правила, но сепак, едвај чека да се врати дома.

Вухан го опишува како „град без луѓе“, каде затворени се сите видови на јавен превоз од автобусите, метроата и аеродромите. Во дел од маркетите полиците се празни, но има доволно намирници за сите.

„Нема паника, барем јас не ја забележувам“, истакнува тој за „Танјуг“ и наведува дека сите се придржуваат до правилата – носат маски на улиците, избегнуваат контакт со луѓе и со животни, но и редовно ги мијат рацете.

Меѓутоа, вели, иако состојбата е мирна и без паника, во воздухот се чувствува непријатна тензија бидејќи се работи за во моментов најголемата епидемија во светот.

„Строго се придржувам до правилата, но не чувствувам некој страв од заразата. Тешко и дека можам да се заразам бидејќи не доаѓам во контакт со други луѓе, одам во продавници, се враќам назад во собата и времето го минувам во затворен простор“, го опишува својот ден Стефан.

Тој исто така посочува дека во медиумите се шират некои лажни вести, како што е тоа што вирусот се пренесува преку очите, или дека луѓето паѓаат на улиците заради коронавирусот.

Стефан дошол во Вухан во септември минатата година да студира, а планирал да се врати во Белград на 6 февруари, за што купил билет.

Сепак, неговото враќање засега e неизвесно.

„Бидејќи градот е целосно блокиран, дури и околните градови, па дури и целата оваа провинција, јас сега сум во контакт со српската амбасада за да видам дали можам некако да ја напуштам покраината и да летам од друг град“, рече Стефан за Танјуг.

Според информациите, српските власти стапиле во контакт со петорица српски државјани кои живеат во моментов во Вухан и сите се здрави. Тројца од нив изразиле подготвеност да бидат евакуирани.

Работници од Кина кои градат автопат во Црна Гора се под постојан здравствен надзор, а поради ширењето на коронавирусот мерките на претпазливост се засилени, изјави директорот на црногорскиот Институт за јавно здравје, Бобан Мугоша.

Toј за црногорските медиуми објасни дека околу 2.000 кинески работници кои работат на автопатот што го градат Чајна Роуд и Бриџ Корпорејшн се под надзор и надлежните ќе бидат информирани доколку постои било каков сомнеж за симптоми на вирусот.

Мугоша додаде дека веќе е одржана средба со претставници на амбулантата што се грижи за здравјето на кинеските работници во Црна Гора. Тие добиле обврзувачка препорака сите патници кои пристигнуваат од Кина да се пријават до соодветната аеродромска служба доколку имаат треска или кој било друг симптом.

Кинеските туристи од градот Вухан кои пристигнале во Хрватска, планираат да ја посетат Босна и Херцеговина, пренесува „Индекс.хр“.

Според информациите на порталот, откако вчера влегле во Хрватска, туристите се упатиле кон Плитвичките езера, а денеска треба да ја посетат Далмација, по што ќе се упатат кон БиХ.

„Индекс.хр“ претходно објави дека вчера пристигнал автобус со кинески туристи од градот Вухан, епицентарот на епидемијата на коронавирусот.

Според порталот, туристите пристигнале со авион во Милано, а од таму дошле во Хрватска со автобус.

Тие поминале здравствен преглед на аеродромот во Милано и никој немал симптоми на болеста.

Застанале на граничниот премин Бреган, каде им било укажано што да прават ако забележат симптоми.

Според Индекс.хр, на возачот на автобусот му е даден број на епидемиолози на којшто треба да пријави доколку забележи дека некој од патниците има симптоми на вирус.

Настанот го потврдија и од хрватскиот институт за јавно здравје, од каде претходно издадоа упатства за патниците кои одат во Кина и за повратниците или туристите од Кина.