Регион
Рама: Без преседан, Србија стана жртва

Премиерот на Албанија, Еди Рама, во врска со обвинувањата на Приштина кон Мирослав Лајчак рече дека тоа се работи што те оставаат без зборови.
Според него, ваквите потези предизвикуваат поголема штета наместо да ја подобрат состојбата наведувајќи дека патот што го избра Аљбин Курти не е патот што води до целта.
Во интервју за „Еј-би-си њуз“, Рама рече дека пристапот на Приштина ѝ помага на Србија бидејќи, според него, Србија станува жртва во очите на целата меѓународна заедница, пријателите и партнерите на Косово.
„Реакцијата на премиерот Курти пред неколку дена беше без преседан. Не се сеќавам на сличен случај, висок претставник на Косово директно да го обвини претставникот на ЕУ и да каже дека испратил писмо со жалба до официјалните лица, Шолц и Макрон. Тоа се работи што ве оставаат без зборови и дополнително му штетат на она што наводно се обидуваат да го поправат бидејќи теориите на заговор за соработката што ги откривте меѓу Србија и специјалниот пратеник на ЕУ не се нешто што е препорачливо да се прави“, рече Рама.
Не се сомнева, вели, желбата на Курти да го направи најдоброто за Косово, но никогаш не се доволни големата желба и добрата волја, потребна е стратешка визија за постигнување на целта, која тој овде не ја гледа.
На изјавата дека е малку парадоксално што Албанија претседава со Советот за безбедност, но е немоќна да влијае на Приштина, Рама одговара дека не сака да влијае на Приштина бидејќи постои влада што произлегува од волјата на народот, а има одговорност да го води Косово и да го избере патот до целта.
„Заклучокот е дека мислиме оти патот што го избраа не води до постигнување таа цел, туку води до судир со САД и ЕУ. Ова е тажно, но верувам дека е привремено“, рече Рама.
За него, извесно е дека тоа не го носи посакуваниот резултат за Косово, што е заокружување на процесот на нормализација, а потоа и излез од „ќор-сокакот на признавањето“, пред сè, меѓу земјите од ЕУ.
„Тоа е и целта на француско-германскиот план и тоа требаше да биде најголемото можно достигнување, а тоа би било де факто признавање од Србија, без разлика дали Србија формално ќе го признае Косово или не. Косово ќе има свое место, би се ослободило од товарот на конфликтот во продолжувањето на евроинтеграцискиот процес. ЕУ инсистира на процесот на нормализација бидејќи сакаат да го интегрираат Косово во целата структура на меѓународната организација и во самата Унија, која никогаш нема да се случи ако Косово не го реши овој проблем“, рече Рама.
На прашањето дали смета дека Србија има корист од ваквата состојба, вели дека е жално што пристапот на Приштина ѝ помага на Србија, а не на Косово, бидејќи ја виктимизира Србија во очите на целата меѓународна заедница.
„Србија игра игра бидејќи кратковидата политика на Приштина ѝ дава можност“, рече Рама.
На прашањето дали разговарал со украинскиот претседател за независноста на Косово, одговори дека „патот до конечното признавање на Косово минува низ Приштина“.
„Несомнено, разговаравме за тоа со претседателот Зеленски и за тоа во секое време разговараме со секој лидер кој претставува земја што не го признала Косово, но, од друга страна, ние сме многу јасни и убедени дека патот до конечното признавање на Косово не оди преку Украина или Гана, Нигерија, туку поминува низ самата Приштина, која мора да се потруди до крај да го искористи отворениот пат на голема можност создаден од француско-германскиот план, со поддршка на сојузниците, туку го поткопува со пристап што не го разбирам“, рече Рама.
Тој оцени и дека напорите на Србија и Русија повторно да се отвори прашањето за Косово во Обединетите нации се залудни.
Косово ја доби војната, вели тој, а Меѓународниот суд го потврди тоа.
„Ова се залудни пропагандни напори, но не водат никаде. Косово ја доби војната, Косово го потврди и самиот Меѓународен суд на правдата и тоа е неповратно. Поентата е дека Косово не е во состојба да освои мир, да го претвори мирот во добро, кое треба меѓународно да се потврди и да се развива во сите правци“, рече Рама.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Нов земјотрес во Србија: „Мајка ми го држеше телевизорот да не падне“

Републичкиот сеизмолошки завод објави дека денеска во 9 часот и 47 минути е регистриран земјотрес во околината на Крагуевац.
Земјотресот бил со јачина од 3,8 степени според Рихтеровата скала.
Според очевидци, земјотресот го почувствувале жителите на Јагодина, Пожаревац, Крагуевац, Свилајнaц, па дури и во Белград, пишува „Блиц“.
„Се почувствуваа два кратки удари по ред“, вели жител на Петровац на Млави.
„Креветот се нишаше само малку, неколку секунди“, „Слабо тресење на кратко траење!“
„Овој земјотрес ме разбуди, мама го држеше телевизорот да не падне“, вели друг жител на Петровац на Млави.
„Се нишаше лустерот“ – вели белграѓанка.
И вчера имаше земјотрес во Србија, со јачина од 3,2 степени.
Регион
Пронајдени тинејџерките кои со денови беа исчезнати во Грција

Среќно заврши потрагата по 13-годишната Елефтерија и 14-годишната Катерини во Калитеа, Грција, кои беа исчезнати од четвртокот на 30 ноември, јавуваат грчките медиуми.
Според соопштението на грчката невладина организација „Насмевката на детето“, двете девојчиња биле пронајдени утрово и се во добра здравствена состојба. Воедно, како што нагласуваат од организацијата, ќе им биде дадена психолошка поддршка и се’ друго што е потребно во такви ситуации.
Девојчињата биле затекнати на подрачјето на општина Агиос Димитриос, но засега грчките медиуми не објавија како и зошто исчезнале. Според претходно објавените информации, двете тинејџерки влегле во такси по што им се изгубила секаква трага.
Регион
Вучиќ: Лавров во Скопје ја кажа вистината кога е Србија во прашање

Претседателот на Србија, Александар Вучиќ, оцени дека рускиот министер за надворешни работи Сергеј Лавров на Министерскиот совет на ОБСЕ во Скопје кажал сè вистинито кога е Србија во прашање.
Вучиќ за ТВ Пинк изјави дека Лавров зборувал за многу поважни работи за Србија и за српскиот народ од оценката дека Србија нема да отвори ново поглавје во преговорите со Европската унија доколку не воведе санкции кон Русија.
„Во основа, Лавров кажа сè вистинито. Зборуваше и за многу поважни работи за Србија и како функционирала од 2013 година, како ја мамеле нашата земја по Бриселскиот договор за да постигнат нешто што требало да се исполни, а кога тоа не се исполнило, на Србите им кажувале – па ете десет години не е исполнето, па сега ќе добиете дупло помалку од што баравте. Тоа е вистина, тоа се случува“, изјави Вучиќ.
Посочи дека се поставува прашањето што може Србија да промени, за да немаме војни и државата да напредува економски.
„Вистината е дека нашите раце се прилично врзани и ги држиме своите многу подобро отколку што некој би очекувал во однос на зачувување на независноста, суверенитетот, зачувување на границите и донесување одлуки. Но, фактот дека ситуацијата е тешка, сигурно е дека ќе биде и уште потешка, го потврдуваат и одлуките во кои некои сметаат дека би било добро Европската комисија да го вклучи Охридскиот договор како дел од преговарачкото поглавје. “ изјави Вучиќ.