Три лица загинаа, а едно се води како исчезнато по судир на катамаран и едрилица во морето меѓу островите Шолта и Брач, во близина на Сплит.

Несреќата се случила денес околу 11:38 часот во Сплитските врати, кога дошло до директен судир меѓу патнички катамаран и едрилица, која потоа потонала.

На катамаранот имало 118 патници и седум членови на екипажот и сите се неповредени. На едрилицата имало осум лица. Дел од нив биле извлечени од морето и спасени, додека за едно лице сè уште се трага.

Во спасувачката акција се вклучени поморската полиција, крајбрежната стража, итната медицинска помош и други служби, а од воздух помага и хеликоптер. Акцијата ја координира Националната централа за спасување на море во Риека.

Катамаранот „Krilo Eclipse“ пловел на редовна линија кон Брач.

Причините за несреќата засега не се познати, а истрагата е во тек.

Специјалното обвинителство за борба против корупцијата и организираниот криминал во Албанија (СПАК) издаде налози за апсење на 20 лица и нареди превентивна заплена на имот во вредност од над 128,4 милиони евра. Истрагата е насочена кон меѓународна трговија со кокаин, а медиумите јавуваат дека дел од замрзнатите средства и недвижности се директно поврзани со земјиштето каде што се планира изградба на луксузен туристички комплекс зад кој стојат членови на семејството на Доналд Трамп.

Истрага за нарко-пари во крајбрежните недвижности

Според официјалното соопштение на Специјалното обвинителство, со истрагата се откриени сложени операции чија цел била прикривање на потеклото на нелегалните приходи од трговија со дрога и нивно интегрирање во формалната економија. Судските власти наредија заплена на неколку недвижности и купопродажни договори на атрактивни локации во Тирана, Паласа, Химара и други крајбрежни области.

Иако обвинителството не ја именува директно компанијата, дел од албанските медиуми ја поврзуваат со фирма за развој на недвижности за која се тврди дека има врски со земјишни трансакции во областа Звернец, на локација каде што е предвиден мега-туристичкиот проект раководен од Иванка Трамп и нејзиниот сопруг Џаред Кушнер. Истражувачкиот портал Репортер.ал наведува дека зад иницијалите А.Ш. најверојатно стои Артур Шеху, кој се јавува како клучен продавач на земјиштето на споменатата компанија. До саботата навечер, од вкупно 20 лица опфатени со налозите, уапсени се четири.

Масовни протести и притисок врз премиерот Еди Рама

Контроверзите околу изградбата на луксузниот комплекс на заштитеното крајбрежје веќе две недели предизвикуваат сериозни социјални немири. Илјадници граѓани секоја вечер излегуваат на масовни протести во главниот град Тирана, незадоволни од плановите за бетонизација на полустровот Звернец и еколошки ранливиот, ненаселен остров Сазан.

Villagers and environmental activists in Albania are protesting a luxury resort project linked to Ivanka Trump and Jared Kushner, warning it threatens a protected coastal ecosystem and accusing authorities of putting wealthy investors ahead of local communities. pic.twitter.com/eLRKT1yJkL

— Al Jazeera English (@AJEnglish) June 13, 2026

Демонстрантите, поддржани од еколошки здруженија и граѓански организации, инсистираат на итна суспензија на проектот, но и на политичка одговорност. На протестите јасно се артикулира барањето за оставка на албанскиот премиер Еди Рама, кој се соочува со обвинувања за фаворизирање на странски приватни интереси на штета на јавното добро и националното природно богатство. Од Специјалното обвинителство засега одбиваат да дадат дополнителни коментари за медиумите додека оперативните дејствија на терен сè уште траат.

Почетокот на летниот распуст и сезоната на годишни одмори ги донесе првите големи гужви на граничните премини кон Грција, една од омилените летни дестинации на туристите од регионот.

Според сведоштва на патници, на граничниот премин Евзони се чека со часови, а колоните возила се движат многу бавно.

„Чекаме веќе три часа, а границата сè уште не се гледа. Работат повеќе царински пунктови, но бројот на возила е огромен“, изјавил еден патник од Србија кој патувал кон Грција со семејството, пренесе „Блиц“.

Најголем дел од возилата се семејства со деца кои веднаш по завршувањето на учебната година тргнале на летување.

Патниците велат дека гужвите не се изненадување, бидејќи овој викенд го означува почетокот на првиот голем бран туристи кон грчките летувалишта. Сепак, повеќечасовното чекање на високи температури кај многумина предизвикало замор и нервоза уште на самиот почеток од одморот.

Возачите се советуваат пред поаѓање да ја проверат состојбата на граничните премини и да понесат доволно вода, храна и трпение, бидејќи се очекува засилен сообраќај и во текот на денот.

Фото: илустрација