Регион
Албанија ќе го забрза пристапот во ЕУ користејќи ChatGPT: „Ја намалуваме потребата од армија преведувачи и адвокати, што чини милиони евра“

Албанската влада планира да го забрза својот пристап во Европската Унија со користење на ChatGPT за да преведе илјадници страници законски мерки и одредби на ЕУ на албански јазик и потоа да ги интегрира во постојните правни структури.
Овој план ќе почне да се спроведува на почетокот на 2024 година по недамнешниот договор со извршната директорка на матичната компанија на ChatGPT, OpenAI, Мира Мурати, која е родена во Албанија, пренесува „Еуроактив“.
Моделот што ќе го користи албанската влада ќе вклучува превод на документи на албански јазик и ќе даде детален преглед на потребните измени и дополнувања на законодавството со цел Тирана да се усогласи со правилата на Европската Унија.
Албанскиот премиер Еди Рама рече дека на овој начин се намалува потребата од „армија преведувачи и адвокати, која чини милиони евра“ и дека ќе го забрза процесот.
Рама најави и дека вештачката интелигенција ќе замени голем дел од услугите во локалната и националната власт, особено во јавните набавки, во обид да се бори против корупцијата.
Албанија е земја кандидат за членство во ЕУ од 2014 година, а по неколку години одложување на преговорите поради поврзаноста на напредокот на Албанија кон членството со напорите на Северна Македонија, процесот е деблокиран до летото 2022 година.
Премиерот на Албанија претходно ја изрази својата фрустрација поради, како што тврди, недостигот на мотивација и ентузијазам на ЕУ за проширување и што неговата земја е заложник на грчкото вето, како и на ветото на Бугарија против пристапувањето на Северна Македонија.
Грција го блокира писмото на 27-те земји членки до Европската комисија за отворањето на првите пет поглавја за прием на Албанија во ЕУ, пишува „Еуроактив“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ужас во Јагодина: Внук ги заклал бабата и дедото и избегал

Двојно убиство се случило во близина на Јагодина. Според првичните информации М.М. (39) ги заклал бабата Р.Ж. (76) и дедото Р.М. (79) и избегал. Неофицијално, убиството се случило во селото Богава, општина Деспотовац, а телата на сопружниците биле пронајдени рано утрово во семејната куќа.
Полицијата е на местото на настанот и во тек е истрага, а пристигнати се и обвинителот на Вишото јавно обвинителство во Јагодина.
Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин