Регион
Албанската владејачка коалиција ги започна разговорите за претседателскиот кандидат

Коалиционите партнери во албанската владина коалиција ги започнаа разговорите околу новиот албански претседател, кој треба го избере Собранието во јуни годинава.
Албанските медиуми информираат дека премиерот Еди Рама, инаку лидер на Социјалистите и претседателот на Собранието Илир Мета, лидер на Движењето за Социјалистичка Интеграција, веќе ги започнале разговорите околу изборот на новиот албански претседател.
Истите извори наведуваат дека новиот претседател се очекува да се предложи и да се избере од страна на владејачката коалиција со тоа што се очекува местото претседател на државата да припадне на втората партија во коалицијата ДСИ.
Медиумите спомнуваат дека најчесто се спомнува името на актуелниот лидер на ДСИ Илир Мета кој е и претседател на Собранието. Но засега од владејачката Социјалистичка партија не демантираат, ниту, пак, информираат дека има согласност за новото претседателско име.
Аналитичарите наведуваат дека со оглед дека до сега соработката на Владата со актуелниот претседател на државата Бујар Нишани е на ниско ниво, не се очекува Нишани да биде повторно кандидат за претседател кој би имал изгледи да добие втор мандат. /крај/мн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Генерален штрајк во Грција по најавата за работа од 13 часа на ден

Животот во Грција денес ќе застане поради генерален штрајк против плановите на конзервативната влада за воведување можност за 13-часовен работен ден. Транспортот во Атина, возовите и фериботите ќе бидат во прекин, а ќе учествуваат и наставници, болнички работници и државни службеници.
Протести се најавени околу пладне во целата земја против реформата што ја заговара конзервативната влада на Киријакос Мицотакис.
Главниот синдикат на приватниот сектор GSEE, кој го предводи штрајкот заедно со синдикатот на јавниот сектор ADEDY, објави дека реформата „ги загрозува здравјето и безбедноста на работниците и ја уништува рамнотежата помеѓу работата и приватниот живот“.
Прокомунистичкиот синдикат ПАМЕ ја обвини владата дека се обидува да воведе модерно ропство за работниците и да ги принуди да трпат нехумано работно време и мизерни плати.
Синдикатот исто така го отфрли она што го нарече сурова дерегулација, што бргу напредува во Грција од должничката криза во 2009 година.
Најавениот закон би овозможил работа од 13 часа на ден за истиот работодавец во вонредни околности и со дополнителни прекувремени часови.
Во земја во која економијата закрепна од должничката криза, но сè уште е кревка, оваа можност веќе постои, но само ако работникот има два или повеќе работодавци.
Мицотакис, кој е на власт од 2019 година, истакна дека многу млади луѓе во моментот работат две работни места и сакаат да работат повеќе за да заработат повеќе.
Министерката за труд Ники Керамеус нагласи дека мерката е исклучителна и нема да стане вообичаена. „Тоа е одредба што важи до 37 дена во годината, само со согласност на работниците и со зголемување на платите од 40 проценти“, изјави таа за „Мега ТВ“ оваа недела.
И покрај намалувањето на невработеноста и континуираниот раст на БДП, кој според Европската комисија минатата година изнесувал 2,3 процента, ниските плати остануваат главен извор на загриженост и еден од главните проблеми за Грците заедно со високите трошоци за живот.
Минималната плата, иако е зголемена, е 880 евра месечно.
Според Евростат, Грците работат просечно 39,8 часа неделно во споредба со просекот на Европската Унија од 35,8 часа.
Во туристичкиот сектор, во текот на шпицот на сезоната, келнерите и готвачите работат многу часови, понекогаш без слободен ден во неделата. Законскиот работен ден во Грција трае осум часа, со можност за платена прекувремена работа.
Грција веќе ја воведе опцијата за шестдневна работна недела, особено во време на голема побарувачка во одредени сектори, како што е туризмот.
Регион
Пукањето во Белград на само 300 метри од куќата на Мирослав Илиќ, пејачот се огласи: „Боже господе, што се случува“

Во пукањето во Вишњичка бања се повредени пет лица, меѓу нив и една жена за чијшто живот се борат лекарите.
Според неофицијални информации, на пукањето му претходела тепачка, а сè се случило на нешто повеќе од 300 метри од куќата на познатиот пејач на народна музика, Мирослав Илиќ, пишува „Блиц“.
Илиќ по повод настанот се огласи за домашните медиуми.
„Живеам во мирна улица, во мирен крај. Чувај Боже што се случува. Не сум гледал вести и не сакам да знам“, изјави Мирослав за Телеграф.
Иако првичните информации укажуваа дека една жена починала, докторите во Ургентниот центар успеале да ја оживеат.
Неофицијално, повеќе вооружени лица излегле од бело комбе и почнале да пукаат. Овие информации засега не се официјално потврдени, а во тек е полициска потера по напаѓачите.
Очевидци опишале дека од белото комбе излегле неколку лица и почнале да пукаат насекаде.
Регион
(Видео) Полицијата се’ уште трага по напаѓачите по пукањето во кафулето во Белград

Пет лица беа ранети во пукање во кафуле во белградската населба Вишњичка бања, а едно лице е во животна опасност. Напаѓачите, кои пристигнале со бело комбе, влегле во локалот и отвориле оган по гостите.
Повредените – две жени и три мажи – се пренесени во Ургентниот центар. Полицијата покрена акција и сè уште трага по сторителите, јавува „Н1“.
Очевидци раскажаа дека на автобуската станица во близина имало голем број деца кои се разбегале уплашени, а пристигнувањето на итната помош се чекало долго. Жителите потсетуваат дека веќе подолг период имаат проблеми со навивачки групи во оваа населба.