Регион
Босна и Херцеговина не ја сака Унгарија на чело на ЕУФОР, ја повикува Австрија да остане
Властите во БиХ се обидуваат да спречат донесување одлука со која Унгарија би ја презела командата со мисијата ЕУФОР, а причина за ова противење се блиските врски што унгарскиот премиер Виктор Орбан ги воспостави со лидерот на босанските Срби, Милорад Додик, потврди министерот за одбрана на БиХ, Зукан Хелез. Тој ова го изјави во пресрет на своето патување во Виена и средбата со Клаудија Танер, министерка за одбрана на Австрија, која моментно има свој генерал на чело на ЕУФОР.
Воената операција на Европската Унија во БиХ, наречена „Алтеа“, беше воспоставена во 2002 година кога заврши мисијата на СФОР предводена од НАТО, а задачата на многу помал контингент војници од државите на Унијата и придружните земји остана да ги следи почитувањето на Дејтонскиот договор и безбедносната состојба.
Прв командант на ЕУФОР беше британскиот генерал Дејвид Лики, но како што постепено се намалуваше бројот на војниците, така се намалуваа и командантите, а во изминатите години по правило на таа позиција беа австриски офицери, па од јануари оваа година е генералот Хелмут Хабермаер, кој има мандат од една година.
Австриската влада претходно најави дека има намера да се откаже од номинацијата на своите генерали за команданти на ЕУФОР бидејќи ѝ се потребни сите воени ресурси во земјата за да ја контролира мигрантската криза. Веднаш потоа Унгарија изрази подготвеност да ја преземе командата на ЕУФОР, а се шпекулира дека Будимпешта веќе утврдила дека нов командант ќе биде нивниот генерал Ласло Штиц.
Конечната одлука за ова треба да ја донесе Политичко-безбедносниот комитет на ЕУ, а во некои политички кругови во БиХ преовладува мислењето дека Унгарија не е добар избор.
„Одам во Австрија поради продолжување на мандатот на мисијата ‘Алтеа’. Проблематично е кој ќе биде командант“, изјави Хелез. Тој потврди дека целта е да се обидат Австријците да продолжат да го водат ЕУФОР, односно да ги блокираат плановите на Унгарија.
„Немаме ништо против Унгарија, но имајќи ги предвид ставовите на Орбан кон БиХ, мораме да реагираме за да се обидеме да го спречиме тоа. Режимот на Орбан е сличен на оној на Додик и Путин“, рече министерот за одбрана на БиХ.
На прашањето дали има нешто против учеството на хрватската армија во мисијата „Алтеа“, која претходно ја предложи хрватскиот претседател Зоран Милановиќ, Хелез одговори дека дискусијата за тоа е излишна.
„Одамна е дефинирано и не би паднал во тие замки. Тоа е сосема неважно. Имаме членови од толку многу земји, тоа е мултиетнички состав. Важно ни е да имаме мир овде и да ја зачуваме стабилноста“, заклучи тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Курти: Единствено решение се нови избори
Косовскиот премиер Албин Курти, изјави дека нема друга опција освен одржување нови парламентарни избори, откако неговиот предлог за нова влада не го доби потребното мнозинство во парламентот.
Неговиот предлог бил поддржан од 56 пратеници, а биле потребни најмалку 61.
„Пред секој договор што ја искривува волјата на граѓаните, ние избираме избори. Земјата нема друг пат ниту начин освен нови избори“, изјави Курти.
Тој рече дека Демократскиот сојуз на Косово (ДСK) и Социјалдемократската иницијатива (НИСМА) одбиле да бидат дел од владата што тој ја предлага, и додаде дека тоа ја оневозможило и изборната соработка за изборот на нов претседател на Косово во март идната година.
Регион
Рама: Министерката создадена со вештачка интелигенција „ќе роди“ 83 дигитални помошници за парламентот
Албанскиот премиер Еди Рама соопшти дека нивната министерка создадена со помош на вештачка интелигенција, Диела, ќе „роди“ 83 дигитални помошници кои ќе работат како виртуелни асистенти на пратениците од Социјалистичката партија.
Според Рама, тие асистенти ќе ја подобрат ефикасноста и транспарентноста на парламентот, водејќи евиденција за седниците, подготвувајќи анализи и предлагајќи политики засновани на податоци.
Диела, која беше именувана во мај 2025 година, е првата виртуелна министерка во светот создадена со помош на вештачка интелигенција. Нејзината задача е да ја следи законитоста и транспарентноста на државните тендери и да спречи корупција, со користење алгоритми што одлучуваат без човечко влијание.
Рама ја опиша иницијативата како чекор кон „целосно транспарентна и безкорупциска“ администрација, а метафората за „трудна министерка“ симболично го претставува ширењето на вештачката интелигенција во повеќе сектори на управувањето во Тирана.
Регион
Двајца Хрвати и еден Србин со „бмв“ бегаа од полицијата во Германија и загинаа во несреќа
По тешката сообраќајна несреќа со три смртни случаи во близина на Брауншвајг, идентификувана е третата жртва.
Полицијата претпоставува дека станува збор за возачот на автомобилот кој во саботата, бегајќи од полицијата, паднал од мостот во каналот Мителанд. Сите тројца мртви од автомобилот сега се идентификувани, пишува РТЛ.де, пренесе Индекс.
Сè започна во сабота напладне кога возачот на БМВ со регистарски таблички од Минхен на автопатот А2 го игнорираше полицискиот знак за стоп и избега со голема брзина. Полициските патроли набрзо го изгубија возилото од вид, но десет минути подоцна добија неколку итни повици за сериозна несреќа.
Според првата реконструкција на настанот, истражителите веруваат дека бегалецот возел пребрзо по тесниот федерален пат Б4, престигнувајќи неколку автомобили од десната страна. Потоа возилото удрило во заштитна ограда, отскокнало во спротивна насока и се судрило челно со автомобил што доаѓал од спротивната страна. Поради силата на ударот, БМВ-то во бегство ја пробило оградата на мостот и паднало во Средногерманскиот канал.
Полицијата денес го потврди идентитетот на третата жртва.
„Се работи за 34-годишен државјанин на Србија“, изјави портпаролот на полицијата. Се верува дека тој го управувал возилото. Неговите сопатници, чиј идентитет беше утврден претходно, биле 25-годишен и 31-годишен од Хрватска.
Во второто возило биле 47-годишна жена и 53-годишен маж од Хамбург. Жената е тешко повредена, но нејзиниот живот е надвор од опасност, додека мажот е префрлен со хеликоптер во болница и неговата состојба е сè уште критична.
Автомобилот што ја предизвика несреќата беше извлечен од каналот во текот на викендот и запленет за судско вештачење. Понатамошниот тек на истрагата ќе зависи од наодите на вештакот, а случајот веројатно ќе биде предаден на канцеларијата на државниот обвинител, кој ќе одлучи за обдукција. Точниот тек на несреќата, како и причината зошто возачот бегал од полицијата, засега не се познати.

