Регион
(Видео) Голем шумски пожар во Атина, зафатени се куќи, евакуирана е детска болница
Шумски пожар поттикнат од силни ветришта утрово беснее во планинската област Пентелик кај Атина, проголтувајќи куќи, поради што властите наредија евакуација на најмалку девет области и една детска болница.
Тројца пожарникари и девет локални жители се здобиле со полесни повреди и биле пренесени во болница со тешкотии со дишењето, јави државната телевизија ЕРТ.
Дебели облаци од чад го затемнија небото над Пентелико каде што избувна пожарот околу 14:30 часот во вторникот, на околу 27 километри северно од центарот на Атина. Засега нема извештаи за жртви, соопштија пожарникарите.
Во битката со огнената стихија на повеќе фронтови учествуваат околу 485 пожарникари и 120 противпожарни возила. Петнаесет хеликоптери и авиони испуштија вода врз пламените јазици, а операциите беа прекинати ноќе од безбедносни причини.
Локалните власти соопштија дека во пожарот изгореле некои куќи во областа Палини. Властите наредија евакуација на девет области, вклучувајќи ги Палини и Геракас.
Една болница и Националната опсерваторија во Атина беа евакуирани како мерка на претпазливост. Сообраќајот беше запрен на патиштата кои водат кон Пентели, а на најмалку 600 жители им беше потребна помош од полицијата за излез од областа зафатена од пожарот.
Силниот ветер се очекува да продолжи до попладнево. Пожарникарите соопштија дека 28 пожарникари од Романија им помагаат на локалните пожарникари. Повеќе од 200 пожарникари и опрема од Бугарија, Франција, Германија, Романија, Норвешка и Финска ќе бидат на подготвеност во најжешките месеци, јули и август, во Грција.
Минатата година шумските пожари опустошија околу 121.000 хектари шуми и грмушки во различни делови на Грција, кои го доживеаја најлошиот топлотен бран во последните 30 години, пренесе Индекс.хр.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Maж падна од опасна карпа на Паг и почина, спасена алпинистка
При искачување на опасна карпа на Паг, еден маж почина, а една жена беше спасена во голема операција на хрватската служба за спасување.
„Добивме пријава во 13 часот и 32 минути дека две лица наводно се качувале на карпа кај Метајна. Едното лице паднало и починало. Другото е на карпата. Засега не може да им се пристапи од копно“, рекоа од полицијата.
Покрај полицијата, на местото на настанот има и други служби за итна помош – брза помош, пожарникари.
Малку по 17:00 часот од карпите е спасена жена, откако спасувачите со чамци се приближиле до карпата од морската страна.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.
Регион
Борел следната недела со лидерите на Западен Балкан
Високиот претставник на Европската Унија (ЕУ), Жозеп Борел, ќе приреди работен ручек за шестмина лидери од Западен Балкан следниот четврток во Њујорк на маргините на Генералното собрание на Обединетите нации, објавено е денеска на веб-страницата на ЕУ, пренесуваат медиумите во регионот.
Во соопштението се наведува дека висока делегација на Европската комисија ќе учествува на 79. сесија на Генералното собрание на ОН следната недела во Њујорк, а фокусот на ангажманот на ЕУ ќе биде ставен на решавање низа невидени конфликти и кризи околу светот.
Делегацијата на ЕУ ќе ја сочинуваат претседателката на Европската комисија, Урсула фон дер Лајен, извршната потпретседателка Маргарет Вестагер, високиот претставник Борел, потпретседателката Дубравка Шуица, како и комесарите Стела Киријакидес, Дидије Рејндерс, Илва Јохансон, Јанез Ленарчич, Јута Урпилаинен, Кадри Симсон и Вопке Хокестра.