Регион
(Видео) Судири на студентите со полицијата на улиците во Атина, бесни поради новиот закон

Грчките студенти фрлаа молотови коктели врз полицијата која одговори со солзавец во центарот на Атина, неколку часа пред очекувањата парламентот да го усвои законот со кој им се дозволува на странските приватни универзитети да основаат филијали во земјата.
Илјадници студенти со недели мирно протестираат против образовната реформа за која тврдат дека ќе ја намали вредноста на дипломите заработени на државните универзитети, но некои повеќе не можеа да го задржат својот гнев кога премиерот Киријакос Мицотакис ги повика пратениците да го прифатат законот.
„Се плашам дека ако успееме да дипломираме, никаде нема да можеме да се вработиме“, вели 25-годишниот Стратос Кацелис.
Clashes during a protest against the government’s draft law introducing private universities in #Greece, which students consider will lead to the degradation of public #education. pic.twitter.com/rPYkkz4dCJ
— Savvas Karmaniolas (@savvaskarma) March 8, 2024
„Ниту еден млад човек денес не може да планира за иднината. Сè што гледаме се безизлезни ситуации“, додаде тој.
Мицотакис, кој го освои вториот мандат во јуни минатата година, рече дека законот ќе помогне да се запре егзодусот на десетици илјади грчки студенти кои заминуваат да студираат во странство, товар за економијата што сè уште се опоравува од 10-годишната финансиска криза.
Законот, исто така, ќе помогне да се усогласи Грција со остатокот од Европската унија и да се промовира конкурентноста во високото образование, рече тој.
Многу е веројатно законот да биде усвоен бидејќи конзервативната влада има 158 од 300 претставници во парламентот.
„Парламентот не е повикан само да гласа за клучниот закон, туку да одобри радикална и храбра образовна реформа за раст и социјална правда. Конечно ќе им овозможи на недржавните, непрофитни институции да работат во нашата земја“, рече Мицотакис.
Студентите, со поддршка на дел од наставниците и универзитетскиот персонал, не се убедени. Една група се отцепи од демонстрациите и фрли молотови коктели врз полицијата, која ги растера со солзавец, изјавија очевидци на Ројтерс и полициски претставник.
Законот е дел од реформите на владата, кои го вклучуваат и законот за истополови бракови што беше донесен минатиот месец.
Грција годишно троши меѓу три и четири отсто од својот БДП за образование, што е под просекот на Европската унија. Сепак, Мицотакис рече дека нацрт-законот вклучува повеќе средства за државните универзитети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Бебе старо само 7 дена е пронајдено покрај контејнер во Белград

Во раните утрински часови во Земун, на улицата Дунавска, покрај контејнер, пронајдено е новороденче. Како што дознава српски „Телеграф“, станува збор за бебе старо само седум дена.
Детето било завиткано во пешкир, а по пристигнувањето на брзата помош, покажувало знаци на живот. Веднаш било пренесено во Клиничката болница Земун, каде што му била укажана медицинска помош.
Повеќе информации засега не се познати.
фото: принтскрин
Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Регион
Девојки скокнале од воз во движење бидејќи ја пропуштиле својата станица, едната е во критична состојба: хорор во Бугарија

Две девојки, на возраст од 20 и 21 година, биле итно префрлени во болница во Пловдив откако скокнале од патнички воз на линијата Софија-Бургас во близина на железничката станица „Клисура“, потврди вчера прес-центарот на Одделот за внатрешни работи во Пловдив. 20-годишната девојка се здобила со тешки повреди и е во критична состојба, објавува порталот 24chasa.bg.
Инцидентот бил пријавен во службите за итни случаи во вторник околу 13:30 часот. Според првичните информации, девојките скокнале од прозорецот додека возот се движел, објавува БНТ.
Се наведува дека тие скокнале од возот во движење бидејќи ја пропуштиле станицата од каде што требало да слезат.
Наводно, не успеале да ја отворат вратата од вагонот на време. Кога конечно успеале да го сторат тоа, решиле да скокнат, но возот веќе добивал брзина.
Покрената е прелиминарна истрага и е известено Окружното обвинителство.
Поради инцидентот, сообраќајот помеѓу станиците „Клисура“ и „Стрјама“ е привремено прекинат.
Според Антонија Иванова од прес-центарот на Универзитетската болница за активен третман „Свети Георги“ во Пловдив, состојбата на 20-годишното девојче е исклучително лоша, објавува 24chasa.bg.
„Во моментов не можам да дадам никакви дополнителни информации. Другото девојче, кое има 21 година, е хоспитализирано во клиника во здравствена установа во стабилна состојба“, рече таа.
фото: принтскрин