Во северниот дел на Косовска Митровица во тек е акција на косовската полиција, а граѓаните се собраа и ја блокираа улицата Кнез Милош, објави „Косово онлајн“, пренесува „Б92“.

„Косово онлајн“ објави дека косовската полиција влегла во една од аптеките во градот за да ги провери царинските документи.

По ова, луѓето се собрале изразувајќи незадоволство од споменатата акција, а ситуацијата ескалирала кога косовската полиција почнала да фрла шок-бомби и солзавец, а Србите фрлале со камења.

Kosovska Mitrovica jutros. Bačen suzavac i šok bombe. Kosovska policija sprovodi akciju zaplene srpske robe u apotekama i veleprodajama. Na ulici se okupio veći broj građana pic.twitter.com/JezSjHtqNx

— СМ.Милутинац (@Stevan077) October 13, 2021

Според некои наводи на очевидци, во тек е заплена на српска стока.

Според порталот „Косев“, незадоволни Срби одговориле со камења по што косовската полиција фрлила солзавец. Причинета е материјална штета на неколку автомобили паркирани во близина.

По инцидентите, косовската полиција објави соопштение во кое се наведува дека во раните утрински часови е почната операција со цел да се реализираат стратешките цели во спречувањето на криминалните дејства, особено во борбата против шверцувањето стока.

Според соопштението, акцијата се спроведува во регионот на Приштина, Пеќ, Јужна и Северна Митровица, пренесува „Косово онлајн“.

„Сите полициски операции се спроведуваат во координација со надлежните обвинителства и судови и се однесуваат на инспекциски надзор и претреси на разни локации, како што се куќи, станбени и деловни простории, магацини. Како резултат на интензивните акции и професионални дејства на косовската полиција и царината, запленета е разновидна стока, која служи како материјален доказ“, се вели во соопштението.