Регион
(Видео) Уапсени белградски макроа, едниот ја принудувал својата девојка на проституција

Српското Министерство за внатрешни работи објави видео од апсењето на белградските макроа С.С. (46), П.Д. (25) и Ѓ.Љ. (29). Тие се уапсени поради сомнение дека сториле кривично дело трговија со луѓе.
Тие се осомничени дека од февруари до јуни годинава, искористувајќи ги тешките услови во кои живеела, врбувале 20-годишна девојка да се занимава со проституција за да се стекнат со противправна финансиска корист.
„С.С., како што се сомневаат, најпрвин стапил во емотивна врска со оштетената со цел да влијае на нејзината свест и волја и на тој начин ја регрутирал да се занимава со проституција, а потоа го ангажирал Ѓ.Љ., кој, како што се сомнева, на интернет огласувал давање сексуални услуги, додека осомничениот П.Д. ја превезувал оштетената и ја предавал на корисниците на сексуални услуги“, соопштија од српската полиција.
С.С. е осомничен дека подоцна ги одзел парите заработени на тој начин. Полицијата при претрес на становите на пријавените пронашла повеќе мобилни телефони и сим-картички, како и помала количина бела прашкаста материја која била испратена на вештачење.
На сите осомничени им е одредена мерка притвор во траење од 48 часа и со кривична пријава ќе бидат изведени пред Вишото јавно обвинителство во Белград, соопшти Министерството за внатрешни работи на Србија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин