Регион
Во Албанија затворени избирачките места, прелиминарните резултати се очекуваат утре
Избирачките места на локалните избори во Албанија се затворени вечерва, а оценката е дека изборните поминале мирно.
Како што пренесе „АП“, првите прелиминарни резултати се очекуваат утре.
Изборите ги следеа 150 набљудувачи од ОБСЕ, 20 од американската амбасада и по четворица набљудувачки од италијанската и британската амбасада.
На избирачкиот список во Албанија се наоѓаат 3.464.328 граѓани со право на глас, но поради миграцијата реалната бројка е значително помала.
Граѓаните гласаа за претставници на локалните власти во 61 општина за следните четири години.
Опозицијата ги бојкотираше изборите, поради што претседателот Илир Мета најпрво го откажа, а потоа и одложи нивното одржување. Изборите беа причина за конфликтот помеѓу Мета и премиерот Еди Рама. Откако Рама ги закажа изборите, Мета ги откажа и ги помести за 13 октомври, а премиерот го обвини за кршење на уставот и соработка со опозицијата.
Мета како причина за одложувањето го наведе бојкотот на опозицијата, но и стравувањето дека изборите би можеле да предизвикаат нови граѓански немири, откако со месеци во земјата беа одржувани масовни протести за обединетата албанска опозиција.
Инаку, одлуката на албанскиот претседател за одложување на изборниот процес ја отфрли и Централната изборна комисија во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дете најдено живо по два дена од поплавите во Јабланица под урнатините на семејната куќа
Продолжува борбата на голем број спасувачи за пронаоѓање на живите исчезнати лица по катастрофалната поплава што пред два дена се случи во Јабланица и во околните населени места.
Според официјалните информации, досега животот го загубиле 18 лица, а по голем број се уште се трага.
Сепак се појави и една добра вест, спасувачите пронашле дете под урнатините на неговата семејна куќа. Успеале да го извлечат и итно бил пренесен во болница.
Момчето било пронајдено под плочата тешка два тона која се срушила одозгора.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.