Регион
Во Албанија за 4 евра салата од октопод, во Хрватска палачинка на улица – споредбата на цените предизвика жестока дискусија

Текст за туристичките места во Албанија предизвика лавина коментари на социјалните мрежи, пишува „Јутарњи лист“.
Албанија стана привлечна и за Хрватите поради пристапните цени и природните убавини, но тоа очигледно не им одговара на бројните корисници на Фејсбук и изнајмувачи кои го изразија своето незадоволство во коментарите, пишува хрватскиот весник.
Една од најчестите поплаки што ги имаат гостите се цените на хрватското приморје, односно нивното поскапување во однос на минатата сезона, а споредуваат колку е Албанија поевтина од Јадранот.
„Претеравте со цените, да. Тоа го кажуваат и странците, не само локалните. Редовна пица 13 евра, ќебап 8 евра, палачинка 4 евра, топка сладолед 2 евра и сето тоа на улица. Ако е нормално, тогаш е ** и море и се’“, се вели во еден од коментарите.
Сепак, неколку коментатори застанаа во одбрана на Хрватска и цените на угостителската понуда.
„Едвај чекам вие што плукате по Хрватска да одите во Албанија, Турција, Грција, за да имаме помалку гужви оние што ја сакаме. Всушност, има нешто добро во ова. Ќе се исчистиме од такви. Хрватска е дел од ЕУ и не може да биде пониска од оние што не се во ЕУ“, се вели во еден коментар.
Има и такви кои престојот во Хрватска го споредија со некои други земји надвор од регионот.
„Мојата колешка двапати отиде на Малдиви со сопругот и детето. Секој пат ѝ требаа 50.000 куни, околу 6.000 евра за храна и сместување таму и назад со авион“, истакнува еден коментатор под фотографиите на написот на „Јутарњи“.
Некои од коментаторите ја забележале сличноста помеѓу одењето по намирници во странски земји и оваа ситуација.
„Хрватите секогаш се собирале таму каде што е поевтино, на пример, намирници во Босна, Србија, Унгарија… и Хрватска се уште не пропаднала, а нема ниту сега. Тие што пропагираат против Хрватска и онака не доаѓаат на нашиот Јадран“, објасни еден корисник на Фејсбук.
Коментарите следеа по објавен текст на хрватските медиуми за Албанија со наслов: „Малдиви во Европа“.
Во текстот Драч, Ксамил, Саранда беа опишани како места кои летово ги окупираа бројни туристи од сите европски земји.
Новинарите го посетија Драч на самиот почеток на летната сезона и самите увидоа дека тоа навистина е така, пишува „Јутарњи лист“.
Албанија и албанскиот туризам имаат добра репутација поради повеќе причини, почнувајќи од уредувањето на одморалиштата, преку пристапот до гостите, па сè до цените, кои во крајна линија се најважниот фактор. Ниски цени.
Сместување во Драч во хотел со четири ѕвезди, кој се наоѓа веднаш до плажата, односно кој има приватна плажа чини 95 евра за ноќевање со појадок, за две лица. За помалку од 100 евра ќе добиете ноќевање со појадок во хотел со четири ѕвездички со сопствена приватна плажа, пишува весникот.
И цените на храната се ниски, под сите очекувања. Ручек за двајца, кој се состоел од предјадење, главно јадење, две чаши вино, две колачи, шише вода и две кафиња, новинарите го платиле само 18 евра, што значи 9 евра по лице. И тоа во ресторан кој се наоѓа веднаш до морето и чија тераса, како и внатрешноста, е уредена по моделот на рестораните покрај францускиот брег.
Просечните цени се следни: супа 1,50 евра, порција риба 3,50 евра, салата од октопод 4 евра, колач 1,50 евра, кафе 1 евро… Треба да се напомене дека се работи за ресторани кои се наоѓаат веднаш до море и кои се сметаат за најдобри во Драч, како по менијата, така и според локацијата и уредувањето.
Во Драч може да се плати со картичка на сите места, од хотели до ресторани до мали маалски кафулиња. За многу туристи ова е олеснителна околност бидејќи не мора да менуваат евра во локалната валута.
Поголемиот дел од туристите во Албанија се Италијанци и затоа крајбрежјето на оваа земја најмногу ги приспособи своите потреби на нив. Токму затоа во Драч ќе најдете бројни италијански продавници, како што е Conad, кој бил преполн со италијански гости за време на посетата на новинарите, пишува „Јутарњи“.
Има и многу Германци кои отвораат продавница таму.
„Најголем дел од нашите гости се од Италија и Германија, но и од други европски земји. Последниве години бележиме зголемување на бројот на гости и од соседните земји, како Србија, Црна Гора, Хрватска…“, велат угостителите.
Туристите главно ги привлекуваат ниските цени во однос на регионот.
„Можете да поминете една недела во Албанија за сумата што ја трошите за три дена во соседните земји на брегот. И тоа е она што ја прави разликата“, додаваат тие.
Напоменуваат дека албанското крајбрежје од година во година се развива и дека е ориентирано кон туризмот и потребите на туристите.
Се прилагодуваме на пазарот, а во последните години доживеавме бум затоа што на социјалните мрежи сме прогласени за „Малдиви на Европа“, па за нас слушнале уште повеќе туристи“, истакнуваат за Бљесак.инфо.
Неодамна и австрискиот весник „Кронен цајтунгст“ напиша дека Хрватска повеќе не е евтина дестинација, а цените во земјата вртоглаво пораснале по воведувањето на еврото.
„Зејтин за 4,5 евра, пица за 18 евра и паркинг за 40 евра – она што звучи како луксузен одмор во скапа Швајцарија се случува во некогаш евтина земја за одмор. Во Хрватска цените вртоглаво пораснаа по воведувањето на еврото“, пишува австрискиот весник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пицула ја критикува ЕУ за пофалбите што ги дава на Србија: „Наместо тоа, барајте вистински реформи“

Известувачот на Европскиот парламент за Србија, Тонино Пицула, изјави дека претставниците на ЕУ треба да се воздржат од прекумерно фалење на реформите во Србија, која е потресена од месеци антивладини протести предизвикани од железничката несреќа во Нови Сад пред една година.
Тој се осврна на честите пофалби од Европската комисија, како онаа минатата година кога претседателката на Комисијата, Урсула фон дер Лајен, му се обрати на српскиот претседател Александар Вучиќ со „драг Александар, покажа дека делата ги следат твоите зборови“.
За време на посетата на Белград во среда, наративот малку се смени, при што фон дер Лајен му се обрати на Вучиќ со „Господине претседателе“.
„Апелираме до Комисијата наместо тоа јасно да ја артикулира потребата од вистински и сеопфатни реформи, вклучително и враќање на демократските институции, зајакнување на владеењето на правото и борба против корупцијата и организираниот криминал“, рече Пицула.
Потпретседателката на пратеничката група на С&Д, белгиската европратеничка Кетлин Ван Бремпт, која е задолжена за проширување на ЕУ во нејзината група, истакна дека секоја неоправдана пофалба од страна на Комисијата за властите во Србија води до тоа студентите и граѓаните што протестираат на улиците да се чувствуваат предадени.
Европскиот парламент следната недела во Стразбур ќе дебатира за резолуција за растечката репресија во Србија, една година откако се урна настрешница на железничката станица во Нови Сад, при што загинаа 16 лица. Трагедијата предизвика месеци протести што Вучиќ ги нарекува „обоена револуција“.
Во изјава за новинарите во Брисел, Пицула рече дека од февруари до септември оваа година имало повеќе од 10.700 протести низ цела Србија, кои биле обележани со репресија врз демонстрантите, произволни апсења и политички мотивирани притворања.
фото: принтскрин
Регион
Грција го усвои контроверзниот закон – отворен патот за 13-часовно работно време

Грчкиот парламент денес го усвои новиот закон за труд, кој предизвика бурни реакции и протести во целата земја. Со 158 гласа „за“ и 109 „против“ владиниот предлог беше изгласан, а левичарската опозициска партија СИРИЗА одби да учествува во гласањето.
Законот, кој според владата има цел да го направи пазарот на труд поприспособлив и поефикасен, им овозможува на работодавците во приватниот сектор да бараат од своите вработени да работат до 13 часа дневно наместо досегашните осум. Продолженото работно време може да се применува најмногу 37 дена годишно, а работниците се заштитени од отказ доколку одбијат да работат прекувремено.
Владата тврди дека со новите правила се зголемуваат флексибилноста и заштитата на работниците, особено оние со семејства, и дека законот дозволува четиридневна работна недела доколку има претходен договор меѓу работодавецот и вработениот.
Меѓутоа, синдикатите и опозицијата остро реагираа предупредувајќи дека реформата ја укинува суштината на осумчасовниот работен ден и ја легализира прекумерната експлоатација. Синдикатот на државните службеници ADEDY порача дека „флексибилното работно време во пракса значи уништување на семејниот и на општествениот живот и укинување на работничките права“.
Синдикатите потсетуваат и дека просечните плати во Грција се значително пониски од европскиот просек, а нерегистрираниот труд и натаму е голем проблем. Опозициските партии оценија дека законот е застарен и спротивен на европските тенденции за скратување на работното време и воведување пократка, но поквалитетна работна недела.
Новите одредби предвидуваат и поголема флексибилност при вработувања на определено време, со цел, како што наведува Министерството за труд, да се стимулираат продуктивноста и модернизацијата на пазарот на труд.
И покрај уверувањата на владата дека законот ќе ги заштити работниците и ќе овозможи подобра рамнотежа меѓу работа и приватен живот, јавноста останува поделена.
Регион
Вулин до фон дер Лајен: Побрзо ќе ја прифатите Турција во ЕУ отколку Србија да ја предаде Русија

Александар Вулин, кој во минатото извршуваше голем број важни функции во Србија, ги коментираше изјавите дадени од претседателката на Европската комисија, Урсула фон дер Лајен, за време на нејзината посета на Белград.
„Очекувам Европската Унија целосно да се усогласи со политиката на Србија, вклучително и повлекување на признавањето на таканареченото Косово, како и итно повлекување на сите одлуки што го кршат Дејтонскиот договор и ги намалуваат овластувањата на Република Српска. Госпоѓо фон дер Лајен, никој не нè праша дали сакаме да се впуштиме во авантурата за приклучување кон Европската Унија, но ви гарантирам дека ќе најдеме начин да ја прашаме Србија што мисли за продолжување на авантурата. И да не заборавам, попрво вие ќе ја примите Турција во Европската Унија отколку Србија да ја предаде Русија“, рече Вулин, пренесува „Телеграф“.
Фон дер Лајен разговараше со српскиот претседател Александар Вучиќ во Белград. На заедничката прес-конференција таа рече дека очекува Србија „да го започне својот пат кон Европската Унија двапати побрзо“.
„Нашите позиции се јасни и вклучуваат слобода, а не репресија, вклучително и право на мирно собирање, партнерство, а не потчинување, дипломатија, а не агресија“, нагласи фон дер Лајен, оценувајќи дека „сега е вистинското време Србија да преземе чекори кон пристапување“.
„Вреди да се вложи овој напор бидејќи се приближувате до целта. Потребно е да се забрзаат реформите во владеењето на правото, електронските медиуми, изборните закони и хармонизацијата со надворешната политика на Европската Унија“, изјави таа, истакнувајќи дека овие реформи бараат упорност, трпение, учество на сите сегменти од општеството и политичкиот спектар.