Регион
Во Словенија 889 заразени, починале 34 лица

Во Словенија, во последните 24 часа се потврдени 889 нови инфекции со коронавирус од 3.918 тестови, објави словенечката влада.
Ова е помал број на новозаразени во споредба со претходниот ден кога беа потврдени 1.612 нови случаи со 6.340 тестови.
„Бројот на тестови беше помал, но може да се види дека мерките функционираат“, напиша владиниот портпарол за Ковид-19 Јелко Кацин на „Твитер“, изразувајќи оптимизам дека епидемијата се смирува бидејќи бројот на нови инфекции се намалил на помалку од 1.000 по втор пат во рок од една недела.
Со заразените од последните 24 часа, бројот на потврдени инфекции во Словенија е зголемен на 45.160 од почетокот на епидемијата, од кои 22.167 се активни, а бројот на инфекции во последните 14 дена на 100.000 жители е 1.058, соопшти Министерството за здравство.
Според новите податоци, сега во болниците има 1.084 пациенти со Ковид-19, што е за 27 повеќе од претходниот ден, а во единиците за интензивна нега има 174 пациенти, пет повеќе отколку во саботата.
Според податоците објавени утрово на веб-страницата на Министерството за здравство, во последните 24 часа починале 34 лица, најмногу досега, така што вкупниот број на починати се искачи на 531.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Осум од повредените во Кочани се во „Пирогов“ во Софија, три се деца, сите се во тешка состојба

Осум од повредените во пожарот во дискотеката „Пулс“ во Кочани се во тешка состојба во Софија во болницата „Пирогов“. Од нив три се деца на возраст од 15-16 години – две девојчиња и едно момче, објави БГНЕС.
Ова утрово го соопшти д-р Валентин Димитров, директор на „Пирогов“ – една од болниците каде што беа пренесени дел од повредените во трагичниот инцидент во Македонија, пренесе БГНЕС.
Уште петмина од примените во „Пирогов“ – четири мажи и една жена се во тешка општа состојба. Едно од децата е на интензивна нега. Тројца се интубирани. Изгореници има на горните екстремитети и лицето, објасни д-р Димитров.
Останатите повредени во Кочани, транспортирани во Бугарија, се сместени во Варна и Пловдив.
Д-р Валентин Димитров најави дека во моментов нема итна потреба од дарување крв за настраданите, но секогаш има потреба од крводарители. Тој апелираше да не престанува крводарителството. За повредените од Кочани, центрите за крв во Пловдив, Стара Загора и Софија се подготвени да одговорат на она што е потребно.
Регион
(Видео) Тројца пациенти од Кочани се примени во болница во Варна

Тројца повредени во пожарот во Кочани вчера се примени на Клиниката за изгореници при ВМА-Варна, јави Бгнес.
Тие беа пренесени во Варна со воениот авион Спартан, кој првично слета во Софија, каде што пет пациенти беа сместени во болницата Пирогов.
Бугарија се обврза на лекување на 14 повредени во пожарот во Кочани.
Во пожарот што избувна во дискотека во Кочани животот го загубија 59 лица.
Регион
Авион на српската армија со 12 повредени во пожарот во Кочани пристигна во Белград

Дванаесет пациенти повредени во пожарот во дискотека во Кочани вчера вечер се пренесени од Македонија во Белград со авион CASA C-295 на српската армија, кои ќе бидат згрижени во Воената медицинска академија и во Клиничкиот центар на Србија, јави Танјуг.
Претходно, авион со четворица лекари и четворица медицински техничари полета за Македонија за медицинска евакуација на повредените во несреќата. Двајца пациенти кои претходно биле пренесени од Македонија со воени амбулантни возила се на лекување во Воената болница Ниш и Клиничкиот центар Ниш. За да им се пружи помош на повредените, планирано е двајца лекари од ВМА (пластичен хирург и анестезиолог) и еден медицински техничар – инструмент-оператор да останат во Македонија, пренесе српски Телеграф.
Најмалку 59 лица загинаа во пожарот што избувна ноќта меѓу саботата и неделата во дискотеката „Пулс“ во Кочани.