Регион
Вучиќ за Ројтерс: Косовската полиција нема што да бара на северот на Косово

Србија бара ослободување на сите уапсени Срби од северот на Косово, а во исто време бара начини за намалување на тензиите во таа област, изјави српскиот претседател Александар Вучиќ во интервју за Ројтерс.
Тој истакна дека „косовската полиција нема што да прави на север…, особено вооружените луѓе до заби“. Тој додаде дека тоа создава непријатност и страв кај српското население.
По состанокот на Советот за национална безбедност, Вучиќ рече дека косовските Срби не смеат да учествуваат во насилството врз војниците на НАТО и членовите на мисијата на ЕУ на Косово.
„Никој, под никакви околности, не треба да биде вклучен во нападите… врз ЕУЛЕКС и КФОР“, изјави Вучиќ за Ројтерс.
Тој одби да ги разјасни чекорите договорени на состанокот на Советот за национална безбедност.
На прашањето дали Белград ќе се обиде да ја деескалира ситуацијата на северот на Косово, тој одговори: „Апсолутно“.
Србите на северот на Косово од саботата ги блокираат главните патишта поради апсењето на поранешниот полицаец Дејан Пантиќ. Во саботата вечерта, како што изјави ЕУлекс, врз неговата извидничка патрола била фрлена шок бомба, што наиде на осуда од меѓународната заедница. Во тој напад нема повредени или материјална штета.
ЕУ, САД и НАТО ги повикаа двете страни да се смират и да ги отстранат барикадите.
Вучиќ ги обвини властите во Приштина и косовскиот премиер Албин Курти дека поттикнуваат тензии со преземање „бројни еднострани акции“.
Секогаш кога некој ќе помисли дека нешто сме решиле, се појавуваат други проблеми“, изјави Вучиќ.
Градоначалниците на српските општини на северот на Косово, заедно со локалните судии и околу 600 полицајци, поднесоа оставки минатиот месец поради одлуката на властите во Приштина да започнат со спроведување на мерката за замена на регистарските таблички издадени од Белград со оние издадени од Приштина на територија на Косово. Косово подоцна се согласи да го одложи спроведувањето на таа одлука, а Белград изјави дека ќе престане да издава нови регистарски таблички. Исто така, Косово одлучи да ги одложи изборите во српските општини на север до пролет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шест месеци по падот на настрешницата, собир на граѓаните во Нови Сад

Денеска во Нови Сад се навршуваат шест месеци од падот на настрешницата на влезот на железничката станица, кога 16 лица загинаа, а едно е тешко повредено и се уште е во болница.
Студентите во блокадата на Универзитетот во Нови Сад ги повикаа граѓаните да се соберат пред станицата за во 11:52 часот да им се оддаде почит на жртвите.
„Не ги забораваме жртвите од падот на настрешницата во Нови Сад. Тој настан, кој е резултат на невнимание, неодговорност и институционална негрижа, однесе животи и ги остави семејствата и заедницата во болка и со прашања на кои се уште не се одговорени“, велат новосадските студенти.
Откако ќе оддадат почит, насобраните во колона ќе тргнат по булеварот Ослободување до Мостот на слободата, кој ќе биде блокиран неколку часа.
Регион
Уапсен шпион во Грција, осомничен за поврзаност со Русите

Етнички Грк од Грузија е уапсен во Александрополи, североисточна Грција, под обвинение за шпионажа, откако властите пронашле фотографии и видеа од воени објекти и опрема на неговиот мобилен телефон, пишува грчки Екатимерини.
Според грчката полиција, осомничениот испратил чувствителни материјали на неидентификуван примач во странство користејќи шифрирана апликација за комуникација. Според грчките медиуми, постои сомневање дека мажот фотографирал, снимал и дистрибуирал материјали од воено значење најмалку шест месеци.
Апсењето е извршено за време на заедничка операција на Националната разузнавачка служба (ЕЈП) и Одделот за криминалистичка истрага и гонење во Александрополи.
При прелиминарниот распит, осомничениот, наводно, признал дека фотографирал и снимал воени локации за друго лице. Според државната телевизија ЕРТ, властите веруваат дека мисијата можеби вклучувала планови за можна саботажа на воени објекти.
Лицето кое го регрутирало осомничениот е наводно член на меѓународна криминална мрежа и поврзан со руската воена разузнавачка служба ГРУ. Човекот признал дека првично му била понудена парична отштета, но на крајот постапил доброволно „за мајка Русија“. Тој, наводно, им рекол на истражителите дека во младоста служел во руската армија во Сибир.
Националната разузнавачка служба ја продолжува истрагата за да го утврди целосниот обем на операцијата, заклучува Екатимерини.
Регион
Во Белград најдено телото на девојчето кое неговата мајка го фрли во река во Загреб

Белградскиот Интерпол ја известил хрватската полиција дека во март во реката Сава во Белград пронашла тело на дете.
Загрепската полиција штотуку соопшти дека преку меѓународна полициска соработка е извршена ДНК анализа и е утврдено дека е жртвата на убиството, извршено на 15 јануари годинава во Загреб, кај мостот Јанкомир.
Станува збор за случај од почетокот на годинава кога ХГСС и други служби трагаа по тригодишно девојче кое мајка и го внела во реката кај мостот Јанкомир.
Мајката тие денови била сослушана во Жупаниското државно обвинителство во Загреб, а поради извршување на кривичното дело тешко убиство и е изречена едномесечен притвор.