Регион
Вучиќ за ставот на Србија кон Русија и Украина: Tоа не е хибридна, туку многу јасна позиција на слободна земја која носи свои одлуки
Србија нема потпишано никаков договор со Украина за оружје и муниција, изјави денеска во Тирана српскиот претседател Александар Вучиќ по самитот Украина – Југоисточна Европа.
Домаќини на вториот самит Украина – Југоисточна Европа во Тирана беа украинскиот претседател Володимир Зеленски и албанскиот претседател Еди Рама.
„Не, ние не потпишавме никакви аранжмани со претседателот Зеленски. Ние го поддржуваме територијалниот интегритет на Украина, а тие го поддржуваат територијалниот интегритет на Србија. И ние сме им длабоко благодарни. Двете земји ги поддржуваат прописите на Повелбата на ОН и резолуциите на ОН, кои се темел и основа на меѓународното јавно право“, рече Вучиќ.
Според известувањето на агенцијата „Танјуг“ од Тирана, ова бил неговиот одговор на прашањето на неименуван странски медиум да коментира како во средата во Тирана ја потпишал декларацијата со која се осудува руската агресија врз Украина, а во исто време рекол дека Србија не воведува санкции за Руската Федерација. Дополнително прашање беше зошто Србија ќе одржи таков хибриден однос кон Украина и Русија и дали има потпишано некакви конкретни договори со украинскиот претседател за оружје или муниција.
Украинскиот претседател Володимир Зеленски во средата во Тирана, на самитот со лидерите од регионот, изјави дека Украина е заинтересирана за заедничко производство на муниција со земјите од Југоисточна Европа и најави почнување на украинско-балканскиот форум за одбранбена индустрија. Земјите од регионот имаат развиена воена индустрија, а особено Србија и БиХ имаат производство на муниција. Хрватскиот премиер Андреј Пленковиќ неодамна најави отворање фабрика за муниција во Хрватска.
Коментирајќи го официјалниот став на Србија кон Русија, Вучиќ нагласи дека тоа не е хибридна позиција, туку „многу јасна позиција на слободна земја, која носи свои одлуки за себе и за доброто на својот народ“.
На новинарско прашање дали Србија ја почитувала декларацијата на ЕУ според која рускиот претседател Владимир Путин е одговорен за убиството на рускиот опозициски лидер Алексеј Навални, Вучиќ рече дека Србија не се усогласувала по овие прашања и дека е важно да води „самостојна политика, независна и да се оценува од случај до случај“.
Радио Слободна Европа претходно денеска, повикувајќи се на дипломатски извори во Брисел, објави дека Србија не ја почитувала декларацијата на ЕУ, во која одговорноста за смртта на Навални му се припишува на рускиот претседател.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Тензично во Подгорица: приведени осум лица поради напади врз Турци
Црногорската полиција објави дека осум лица се уапсени во Подгорица за кривични дела со елементи на поттикнување национална и верска омраза и насилство.
Исто така, беше кажано дека полицијата ќе користи камери и беспилотни летала за снимање на јавни места со цел документирање кривични дела, а дека вчера во Подгорица се преземени 55 мерки против странци.
Според соопштението, полицијата го идентификувала и по наредба на државниот обвинител во Вишото државно обвинителство во Подгорица, го уапсила П. М. (35) од Подгорица.
Полицијата објави дека постои сомневање дека на 26 октомври, преку своите профили на социјалните мрежи „Инстаграм“ и „Фејсбук“, објавил заканувачка и навредлива порака упатена кон турските граѓани што живеат во Црна Гора, со која поттикнува омраза и нетрпеливост на национална и верска основа.
Geniş Özet: Karadağ’da “Türkü Öldür” sloganları
Karadağ’ın başkenti Podgorica’da geçtiğimiz hafta sonu yaşanan bıçaklama olayının ardından Türk vatandaşlara yönelik saldırılar gerçekleşti. 45 Türk vatandaşı gözaltına alınırken, 8 Türk vatandaşı da sınırdışı edildi. Karadağ… pic.twitter.com/9181ixW80j
— Selâmi Haktan (@slmhktn) October 28, 2025
Поради сомнение дека сториле кривично дело насилно однесување на штета на тројца турски државјани, по наредба на државниот обвинител во Основното државно обвинителство во Подгорица, уапсени се Б. С. (26), Ф. Ѓ. (25) и М. П. (31) од Подгорица.
„Се сомнева дека тие физички нападнале турски државјани во населбата Забјело удирајќи ги со тупаници, со нозе и користејќи палки, а кои на овој начин добиле телесни повреди. При претресот од нивното возило се пронајдени и одземени факли и фантомки“, се вели во соопштението на Полициската управа.
Додаваат дека Т. Б. (24), Б. Б. (22) и Ф. Ј. (18) се уапсени за сторен прекршок од член 7 од Законот за јавниот ред и мир на штета на турски државјанин. Тие се осомничени дека синоќа физички нападнале турски државјанин во населбата Забјело.
Полицијата соопшти дека службеници на Секторот за гранична полиција – инспектори за странци, презеле 55 мерки против странски државјани.
„За време на активностите спроведени на територијата на Подгорица, издадени се 30 прекршочни налози, две лица се насилно отстранети, две се протерани од земјата, а на тројца странски државјани им е откажан престојот“, посочи црногорската полиција.
Пред два дена во подгоричката населба Забјело дојде до физичка пресметка пред угостителски објект, во која едно лице од Подгорица, М. Ј., беше повредено со нож. Полицијата идентификува и приведе две лица – еден турски и еден азербејџански државјанин – поврзани со случајот.
По нападот, следуваа масовни полициски контроли и приведувања – околу 45 турски и азербејџански државјани беа задржани во рамките на проверка на престој и документи, што предизвика реакции и во Турција од страна на државниот врв.
Во вечерните часови некои од граѓаните на Подгорица излегоа на улиците, при што беа забележани ксенофобични скандирања, оштетување возила и дополнителни полициски интервенции.
Регион
(Видео) Се урна дел од таван на пазар во Загреб
Дел од таванот се урна во хала на пазарот „Долац“ во Загреб. Пред влезот има редица муштерии, но на вратата е истакнат предупредувачки знак, а работниците објаснуваат дека халата денес е затворена.
Според информациите на хрватските медиуми, таванот се урнал утрово во левиот дел од пазарот, а влезот е блокиран додека не заврши поправката.
Работниците велат дека штетата треба да се санира до утре.
Регион
Курти: Единствено решение се нови избори
Косовскиот премиер Албин Курти, изјави дека нема друга опција освен одржување нови парламентарни избори, откако неговиот предлог за нова влада не го доби потребното мнозинство во парламентот.
Неговиот предлог бил поддржан од 56 пратеници, а биле потребни најмалку 61.
„Пред секој договор што ја искривува волјата на граѓаните, ние избираме избори. Земјата нема друг пат ниту начин освен нови избори“, изјави Курти.
Тој рече дека Демократскиот сојуз на Косово (ДСK) и Социјалдемократската иницијатива (НИСМА) одбиле да бидат дел од владата што тој ја предлага, и додаде дека тоа ја оневозможило и изборната соработка за изборот на нов претседател на Косово во март идната година.

