Регион
Вучиќ: Ќе се повлечам ако СНС ги загуби изборите, не сакам да ја делам власта со опозицијата

Завршувањето на предизборната кампања во Србија неделава беше одбележано со пораката на српскиот претседател Александар Вучиќ дека доколку загуби владејачката Српска напредна партија (СНС), за која тој отворено лобира од самиот почеток, тој ќе се повлече од местото шеф на државата затоа што не сака да ја дели власта со опозицијата.
Предвремените парламентарни избори, веќе вообичаени за повеќе од една деценија владеење на СНС, се најавени за 17 декември.
Вучиќ од самиот почеток на кампањата отворено ја промовираше листата на Српската напредна партија наречена „Александар Вучиќ – Србија не смее да запре“, на која и го „позајми“ името за изборите, откако формално се повлече од челото на СНС во мај.
„Доколку листата на СНС ги загуби парламентарните избори, ќе се распишат претседателски избори следната година, кога тоа ќе го посака новата влада, во мај или септември“, рече Вучиќ синоќа во емисијата „Ќирилица“ на српската ТВ Хепи.
Тој рече дека нема да „учествува во власта без легитимитет“, потсетувајќи дека вториот претседателски мандат го добил со околу 2,3 милиони гласови.
„Ако народот сака промена на власта, за точно шест дена ќе бидам првиот што ќе и честитам на опозицијата и ќе кажам: „Не сакам да владеам заедно со вас“, рече Вучиќ, обвинувајќи ја опозицијата дека не и посакува добро на Србија.
„Знам дека ќе ја срушите државата, знам какви капацитети, знам какви соништа имате, а што немате“, додаде тој.
Овој став го додаде на претходните пораки во кампањата дека опозицијата нема друг план и програма „освен да го урне Вучиќ“.
Остануваат уште пет дена до гласањето, а досегашните испитувања на јавното мислење покажуваат дека СНС има предност, но недоволна за „апсолутниот поединечна победа“, која Вучиќ ја бара од поддржувачите во речиси сите секојдневни предизборни средби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Деканката на филозофскиот факултет од Ниш нападната со нож, вечерва собир за поддршка

Вечерва во Ниш се случува собир за поддршка на нападнатата деканка Наталија Јовановиќ.
Студентите велат дека ова е втор напад врз деканката Наталија Јовановиќ, но и уште еден во низата напади врз оние кои сакаат на фер начин да дојдат до вистината.
„Никогаш не сме молчеле за насилството, ниту ќе поминеме со наведнати глави покрај него. Ги повикуваме сите граѓани кои се желни за правда да ни се придружат на овој митинг“, се вели во повикот.
Деканката на Филозофскиот факултет на Универзитетот во Ниш, Наталија Јовановиќ денеска беше повредена со нож за време на собир на студенти и други граѓани.
Таа беше пренесена во Ургентниот со исеченица на раката, а потоа пуштена на домашно лекување.
„Доживеав голем стрес, останува само да се распарчиме. Нема потреба вака да продолжат тензиите, а знаеме кој ги шири, обвинувам една личност, таа ми извади нож, а тоа е претседателот на оваа држава“, изјави Јовановиќ, пренесе Н1.
За нападот уапсена е 69 годишна жена, поради сомнение дека сторила кривично дело насилничко однесување на спортски настан или јавен собир.
Регион
Осомничена за убиство на мајка си била кандидат на последните избори во Хрватска

Полицијата ја сомничи Милена Крамер (62), членка на Работничкиот фронт и поранешна членка на Социјалдемократската партија, за убиство на сопствената мајка во Загреб.
Лицето осомничено од полицијата дека во саботата ја задавила сопствената мајка во Врбани, е член на политичката партија Работнички фронт и кандидат на таа партија на последните парламентарни избори. Претходно, таа била долгогодишен член на СДП и член на претседателството на Месниот комитет во Чрномерец.
Крамер е наставничка во едно од загрепските основни училишта, а на последните избори за хрватскиот Сабор беше на 6. место на листата на Работнички фронт за избор на пратеници во 1. изборна единица, но како и целата партија не го помина изборниот праг.
„Јас сум во шок. Не ми се верува“ рече Катарина Пеовиќ, првиот човек на Работничкиот фронт.
Полицијата во саботата попладнето соопшти дека во Заагреб, 62 годишна жена ја усмртила 84 годишната мајка.
Регион
Се огласи „Кроација ерлајнс“ за авинот кој се врати назад по полетувањето од Загреб

Авион од Загреб утрово полета за Франкфурт, но по 20 минути итно се врати назад. „Кроација ерлајнс“ објасни што се случило.
Авионот со турбопропектор „Даш 8 – К400“, кој лета веќе 17 години, по оваа кратка пауза повторно полетал за Франкфурт.
„Дневник.хр“ пренесува дека се работи за превентивно враќање и дека сето тоа се случило поради лажно укажување на технички дефект.
„За време на почетната фаза на редовен меѓународен лет на „Кроација ерлајнс“ од Загреб до Франкфурт, имаше индикации за технички дефект на авионот Даш 8-К400. Во согласност со пропишаните безбедносни процедури на компанијата и производителот на авиони, донесена е одлука за превентивно враќање на аеродромот во Загреб, каде што е сместен техничкиот центар на компанијата. Треба да се нагласи дека споменатиот настан не влијаеше на безбедноста на летовите, што е приоритет во работењето на хрватската национална авиокомпанија.
Откако експерти од техничкиот сектор на компанијата извршиле безбедносен преглед и утврдиле дека се работи за лажно укажување на дефект, леталото е вратено во редовен сообраќај, а патниците повторно полетале кон својата дестинација во 8 часот и 5 минути. „Кроација ерлајнс“ им се извинува на патниците на летот Загреб-Франкфурт за нарушувањето на планираното патување, објави „Кроација ерлајнс“, пренесува „Дневник.хр“.