Регион
Детали од сведочењето на таткото на Коста за масакрот во српското училиште – ја префрлал вината и барал почит

Одбраната на Владимир Кецмановиќ, таткото на момчето убиец од ОУ „Владислав Рибникар“ се обидува да ја префрли вината на сопственикот на стрелиштето Ратко Ивановиќ, за тоа што неговиот син се фатил за оружјето со кое во мај ги уби своите врсници и училишниот чувар во најголемиот училишен масакр во Србија.
Како што пишува „Блиц“, на вчерашното судење на родителите на момчето убиец, Владимир Кецмановиќ продолжил да се брани со напад кон главниот јавен обвинител Ненад Стефановиќ, на распитот, секогаш кога ќе го прашал нешто за момчето убиец.
„На секое прашање на кое не одговараше, веднаш почнуваше да му вика на обвинителот, да кажува дека не го почитува“ вели извор на „Блиц“ запознаен со случувањата во судницата.
Прашањата кои го „извадиле од такт“ Кецмановиќ, меѓу другото, се однесувале на начинот на кој момчето убиец било тренирано да пука со пиштол, но и како дошло до оружјето со кое ги убивал своите врсници.
Како што објаснува изворот на „Блиц“, одбраната на Кецмановиќ имала тактика да ја префрли вината врз сопственикот на стрелиштето.
„При сослушувањето на Кецмановиќ донесоа очигледни заклучоци со кои се обидоа да укажат дека Владимир Кечмановиќ не му го дал на синот оружјето, туку сопственикот на стрелиштето“, вели изворот на „Блиц“.
Владимир Кецмановиќ на вчерашното судење одбил да одговори на прашањата на родителите на убиените деца.
Тој не сакал ниту да одговори на прашањето кој е одговорен што неговиот син на 3 мај земал пиштоли и извршил масакр во училиштето.
Изворот наведува дека Кецмановиќ молчел на прашањето на главниот јавен обвинител кој е одговорен, а кога му било повторено прашањето, тој кратко одговорил: „Не знам“.
„Не го кажа ни името на синот, иако многу добро знае дека тринаесетгодишникот извршил грозоморно злосторство“, вели изворот на „Блиц“.
Сведочењето на Владимир Кецмановиќ уште еднаш ги вознемири родителите на убиените деца во основното училиште „Владислав Рибникар“, кои на крајот од рочиштето многу потресени ја напуштија судницата.
Инаку, пред почетокот на рочиштето, мајката на момчето убиец застанала на сред ходникот пред судницата и не ни погледнала назад бидејќи околу неа биле родителите на децата убиени од нејзиниот син.
Ден претходно започна сослушувањето на Владимир Кецмановиќ, кој, како што пишаат српските медиуми, изјавил дека не може да прифати некој да го смета за одговорен за она што се случило на 3 мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пукањето во Белград на само 300 метри од куќата на Мирослав Илиќ, пејачот се огласи: „Боже господе, што се случува“

Во пукањето во Вишњичка бања се повредени пет лица, меѓу нив и една жена за чијшто живот се борат лекарите.
Според неофицијални информации, на пукањето му претходела тепачка, а сè се случило на нешто повеќе од 300 метри од куќата на познатиот пејач на народна музика, Мирослав Илиќ, пишува „Блиц“.
Илиќ по повод настанот се огласи за домашните медиуми.
„Живеам во мирна улица, во мирен крај. Чувај Боже што се случува. Не сум гледал вести и не сакам да знам“, изјави Мирослав за Телеграф.
Иако првичните информации укажуваа дека една жена починала, докторите во Ургентниот центар успеале да ја оживеат.
Неофицијално, повеќе вооружени лица излегле од бело комбе и почнале да пукаат. Овие информации засега не се официјално потврдени, а во тек е полициска потера по напаѓачите.
Очевидци опишале дека од белото комбе излегле неколку лица и почнале да пукаат насекаде.
Регион
(Видео) Полицијата се’ уште трага по напаѓачите по пукањето во кафулето во Белград

Пет лица беа ранети во пукање во кафуле во белградската населба Вишњичка бања, а едно лице е во животна опасност. Напаѓачите, кои пристигнале со бело комбе, влегле во локалот и отвориле оган по гостите.
Повредените – две жени и три мажи – се пренесени во Ургентниот центар. Полицијата покрена акција и сè уште трага по сторителите, јавува „Н1“.
Очевидци раскажаа дека на автобуската станица во близина имало голем број деца кои се разбегале уплашени, а пристигнувањето на итната помош се чекало долго. Жителите потсетуваат дека веќе подолг период имаат проблеми со навивачки групи во оваа населба.
Регион
Детали за пукањето во Белград: Напаѓачите дошле со комбе до кафулето и почнале да пукаат кон гостите

Репортерка на „Н1 Белград“ од Вишњичка бања, каде денеска околу 14:30 часот се случи пукање во кое пет лица беа ранети, јави дека едно комбе дошло по Сланачки пат до локалниот бар и почнало да пука по присутните.
Претходно повеќе медиуми објавија дека починала жена, но според информациите од српската полиција, петмина се повредени. „Еуроњуз“ јави дека жената била донесена во болница без знаци на живот, но спасена е со реанимација. Во моментот се наоѓа во тешка состојба.
На местото на настанот има полиција и форензичари, а полицајците ги замолиле медиумските екипи да се оддалечат бидејќи е во тек увид.
Според жителите, кафулето е познато по тоа што таму се собираат и навивачи, а во него има и простор наменет за деца.
Не е познато дали во моментот на пукањето имало деца во кафулето, но жители и очевидци изјавиле дека на автобуската станица имало голем број деца кои се уплашиле и се разбегале, и додале дека долго се чекало на пристигнувањето на итната помош.
Жителите посочиле дека последните месеци имале големи проблеми со навивачки групи, за што редовно пријавувале во полиција. Полицијата и обвинителството реагирале кога медиумите укажувале на тоа.
„За нив ова е шокантно, но не толку изненадувачко, затоа што навивачките групи одамна прават проблеми,“ јави репортерката на „Н1“.
Засега нема официјални информации за мотивот за пукањето, а српски „Телеграф“ пишува дека станува збор за пресметка меѓу навивачи.