Регион
Додик не планира да се повлече од политиката: „Ќе бидам првиот претседател на независна Република Српска“

Лидерот на босанските Срби, Милорад Додик, најави дека ќе биде првиот претседател на независна Република Српска, а верува дека тоа ќе се случи до крајот на оваа деценија.
Во интервју за локалната комерцијална телевизија „К3“, Додик посочи дека не планира да се повлече од политиката и дека верува оти неговата позиција само ќе зајакне. Одговарајќи на новинарско прашање каде се гледа себеси во 2030 година, тој рече дека тогаш планира да биде првиот претседател на РС, која ќе се отцепи од Босна и Херцеговина.
„Ќе бидам во првиот мандат на претседателот на независна РС“, рече Додик, кој ги повика гласачите во тој ентитет цврсто да се држат до него и неговата политика. Оваа негова најава е во спротивност со неодамнешната отворена поддршка за формирање нова голема Србија, во која, покрај РС, би биле вклучени и Косово и Црна Гора, а овој концепт за промена на границите во регионот беше претставен на крајот на октомври во интервју за рускиот пропаганден сервис „Спутник“.
Провокативните изјави на Додик зачестија како што се приближува 22 ноември, кога тој мора да се појави како обвинет пред Судот на Босна и Херцеговина. Тој потоа ќе се соочи со обвинение, во кое се товари дека не ги спроведувал одлуките на високиот претставник за Босна и Херцеговина, а во случај на осуда му се заканува казна затвор од шест месеци до пет години и автоматска забрана за вршење на функцијата претседател на РС.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Темпирана бомба е пат во Грција изграден врз поток – „Стравуваме секојпат кога паѓа дожд“

Науса на Парос, скапоцен камен на островите Киклади и една од најпосетуваните туристички дестинации во Грција, се обидува да заздрави откако силно невреме го погоди островот во понеделникот попладне.
Интензивниот дожд за неколку минути ги претвори улиците во порои, додека штетите на имотите и инфраструктурните објекти предизвикаа загриженост кај локалното население и претприемачите, кои гледаат како се приближува Велигден и незапирливо истекува времето.
Катастрофата беше широко распространета, што резултираше со поплавени домови и продавници, одрони од кал на улиците, соборени дрвја и превртени возила – од кои некои дури завршија во морето. Прекрасното пристаниште Науса, кое ќе биде домаќин на илјадници посетители во наредните недели, се претвори во огромна јама од кал.
Најголемиот проблем е концентриран на едно единствено место: една единствена улица што води до пристаништето. Станува збор за улица која според мештаните била изградена на стар поток – природен порој кој со текот на времето се пополнувал и асфалтирал, но без предвид за правилно одведување на водата. Резултат? Секој силен дожд го претвора ова место во стапица, заробувајќи возила и луѓе.
„Не може секогаш кога врне да се плашиме да не се удавиме. Таму е потокот, само го покривме со асфалт. Некој треба сериозно да го разгледа ова пред да ги загубиме животите“, изјавува револтиран локален жител.
Проблемот, познат со децении, останува нерешен. Еднонасочниот сообраќај на таа улица, заедно со немањето алтернативен пристап до Науса, ја влошуваат состојбата. И покрај постојаните барања на жителите за решение, не е направен суштински план за заштита на просторот од вакви појави.
Харис Гиурцидес, одговорен за цивилната заштита на општина Парос, за „Прототема“ изјави дека се преземени сите неопходни мерки за предупредување на граѓаните.
„Испративме известувања за возилат паркирани на патот кон пристаништето, за жал, многумина не ги следеа, па возилата беа поплавени“, посочува тој.
Сепак, сликата што ја пренесуваат мештаните е поинаква и открива недостаток на реална информираност и превенција.
„Не може секојпат одговорноста да падне врз граѓаните, општината мора да преземе реални мерки и да не спроведува само половични чекори“, велат тие.
Од вторникот во раните утрински часови, екипи на општината со машини почнаа со реконструктивните работи, со цел чистење на улиците, отстранување на калта и наталожените материјали и што поскоро враќање на пристапот до пристаништето. Бизнисите во областа, рестораните и туристичките работници, исто така, прават паралелни напори за да ја вратат Науса „во функција“ до Велигден.
Оваа природна катастрофа на најтешкиот начин потсети дека туристичките дестинации треба да го спојат развојот со основната безбедност на нивната инфраструктура. Сега се повикани општинските власти да се соочат со проблемот и да преземат реални мерки за заштитата од поплави. Случајот со улицата што минува низ прекрасното пристаниште Науса веќе не може да се игнорира: целата област е изложена на опасност и постоењето на единствената улица, изградена на затрупан поток, претставува „темпирана бомба“.
На жителите на овој прекрасен приморски град им поминува само една мисла: Замислете што ќе се случеше доколку оваа природна катастрофа се случеше за време на велигденскиот викенд, со илјадници посетители на островот? Кој би управувал со хаосот тогаш?
Регион
Вучиќ: Светските лидери тајно разговараат со Путин

Српскиот претседател Александар Вучиќ изјави дека некои светски лидери тајно се во контакт со рускиот претседател Владимир Путин, и покрај напорите на Западот да ја изолира Москва.
Во денешното интервју со Марио Навфал, основач на IBC Group и водител на The Roundtable Show на социјалната мрежа „Икс“, Вучиќ рече дека тој лично не се сретнал со Путин од ескалацијата на конфликтот во Украина во 2022 година.
„Кога се согласивме дека тоа не е направено во согласност со меѓународното јавно право, не го видов Путин три години“, посочи тој.
Сепак, Вучиќ тврди дека многу лидери ја одржуваат комуникацијата зад сцената.
„Знам за најмалку двајца главни лидери кои имале тајни разговори со него – затоа што, се разбира, сè уште имам пријатели во Кремљ и во некои други земји“.
Иако не ги именуваше лидерите кои наводно разговарале со Путин, тој нагласи дека тоа не се унгарскиот премиер Виктор Орбан, австрискиот канцелар Карл Нехамер или словачкиот премиер Роберт Фицо, кои не ги криеле своите контакти со рускиот претседател.
Вучиќ најави и дека ќе се сретне со Путин на 9 мај за време на неговата посета на Москва по повод Денот на победата, кој ја слави победата на Советскиот Сојуз над нацистичка Германија во Втората светска војна.
Тој, исто така, потсети на неговата последна средба со Путин на крајот на 2021 година, неколку недели пред да избијат непријателствата меѓу Москва и Киев.
„Откако го напуштив кабинетот на Путин, јавно кажав дека очекувам многу тешки времиња… Никој не ми веруваше“, изјави Вучиќ.
Тој објасни дека рускиот лидер обично долго зборува за настаните во постсоветските републики, но овој пат темата била исцрпена за само 45 секунди. Знаев дека донесе одлука“, додаде Вучиќ.
Во април 2022 година, Нехамер одржа лични разговори со Путин за конфликтот во Украина, подоцна велејќи дека тоа не е пријателска посета. Орбан ја посети Русија во јули 2024 година за да ја промовира, како што рече, мировната мисија.
Во меѓувреме, разговорите меѓу Путин и Фицо во декември се фокусираа на одбивањето на Украина да го продолжи договорот за транзит на гас со Русија, клучно прашање за Словачка, која е многу зависна од руската енергија.
Американскиот претседател Доналд Трамп, исто така, учествуваше во разговорите со Путин за да се обиде да го реши конфликтот во Украина.
Регион
Додик: Само што ми се јави Вучиќ, Интерпол одби да издаде налог за апсење против мене

Претседателот на Република Српска, Милорад Додик, објави дека Интерпол одбил да издаде налог за негово апсење и на претседателот на Народното собрание на Република Српска, Ненад Стевандиќ.
„Претседателот Александар Вучиќ штотуку ми се јави да ми каже дека добил известување од Дирекцијата на Интерпол дека жалбата на Србија е прифатена и дека Интерпол го отфрлил барањето на Судот на БиХ да издаде потерница за мене и Стевандиќ. Благодарност до претседателот на Србија, Александар Вучиќ, за неговата поддршка и јасната и принципиелна жалба до претседателот на Интерпол, разбирајќи ја политичката позадина на судскиот прогон на кој сум изложен“, напиша Додик на мрежата X.
Судот на БиХ побара распишување меѓународна потерница за Додик и Стевандиќ, откако тие ја преминаа државната граница додека по нив беше распишана внатрешна потерница. Судот на БиХ го поднесе барањето за меѓународна потерница до канцеларијата на Интерпол во Сараево.
Граничната полиција на БиХ истражува како Додик ја поминал границата, со оглед на тоа што има информации дека делегацијата со ротација, без задолжително застанување, го поминала граничниот премин Рача.
Претходно, Стевандиќ ја мина и државната граница, кој замина во Србија на денот на големите студентски блокади на 15 март. Тој по неколку дена се врати во БиХ, а на јавноста и е непознато како се вратил во земјава.