Регион
Евакуираните жители се вратија по експлозијата и затекнаа ужас, Неа Анхијалос како град на духови

Пожарот во околината на Волос, во централна Грција, кој предизвика експлозии во воен магацин, е ставен под контрола, соопшти Противпожарната служба на таа земја.
Како што јави телевизијата ЕРТ, 90 пожарникари од четири групи воена пешадија, 31 возило, пет авиони и еден хеликоптер биле ангажирани во гаснењето на пожарот во областа Магнезија, во Тесалија, каде што се наоѓа Волос.
Пожарот доведе до серија силни експлозии во четвртокот во складиште за муниција на воздухопловните сили недалеку од Неа Анхијалос во Тесалија.
По експлозиите, жителите на Неа Анхијалос, Ступи, Веланидија, Маратос, Критарија, Сорос, Кастраки, Кокино и на Перивлептос биле известени да се евакуираат.
Од експлозиите нема жртви или повредени, јавува ЕРТ.
Во Неа Анхијалос крајбрежната стража ги качуваше граѓаните на приватни чамци, кои се собраа во пристаништето. Граѓаните беа пренесени на пристаништата во Волос, а потоа во градскиот изложбен центар. Во тој простор се сместени повеќе од 1.000 луѓе.
Новинарите на ЕРТ јавуваат дека Неа Анхијалос утринава изгледа како град на духови, со знаци на уништување предизвикани од повторените експлозии на воена опрема.
Искршените прозорци, оштетените фасади на куќите и отворените порти сведочат дека нешто лошо се случило во тоа гратче, кое жителите биле принудени да го напуштат.
Еден корисник на „Твитер“, дури ја спореди ситуацијата во Неа Анхијалос со експлозиите со Перл Харбор.
„Градот е празен од вчера и полека некои се враќаат за да видат колкава штета е направена. Жителите ги напуштија Неа Анхијалос во 18 часот попладне оставајќи ги своите автомобили зад себе“, велат новинарите на ЕРТ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Камион налетал на запрен автомобил, загинаа сестри: тешка сообраќајна несреќа во Загреб

Две лица загинаа, а трето е повредено во тешка сообраќајна несреќа што се случи утрово на обиколницата на Загреб.
Хрватската полиција објави извештај за тешката несреќа во која настрадаа две сестри, а трето лице е повредено.
„Денес во 9 часот наутро, 40-годишен маж управувал камион со загрепски регистарски таблички, а се движел се по автопатот А3 во североисточен правец. При достигнувањето на 39-тиот километар, тој не ја прилагодил брзината на возилото на состојбата и карактеристиките на патот и атмосферските услови за да може навреме да го запре своето возило пред секоја пречка што можел да ја предвиди во специфичните услови.
Во таа прилика, предниот дел од возилото се судрил со задниот дел од патничко возило со дубровнички регистарски таблички управувано од 67-годишна жена, која се движела по десната лента од горенаведениот коловоз во правец североисток, и во моментот на судирот била запрена на горенаведената лента.
Како резултат на судирот, патничкото возило со дубровнички регистарски таблички било фрлено надесно, а неговиот преден дел се судрил со предниот дел од патничко возило со загрепски регистарски таблички управувано од 62-годишен маж, кој се движел по десната лента на автопатот А3 во правец североисток.
Во сообраќајната несреќа загинаа 67-годишниот возач на патничко возило со дубровнички регистарски таблички и 65-годишна сопатничка од возилото, додека 56-годишната сопатничка од истото возило е тешко повредена и ѝ е укажана лекарска помош во Клиничката болница Дубрава“, соопшти Полициската управа во Загреб.
Регион
(Видео) Еколошка катастрофа – нафта истече во Јадранското Море

Големи количини гориво истекоа во Јадранското Море на островот Хвар во Хрватска. Неофицијално, инцидентот се случил кога пукнал резервоар на танк на бензинската пумпа ИНА, објави „Далмација данас“.
Полицијата е на терен и се истражува како се случил инцидентот.
„Утрово, околу 9.30 часот, е примена информација дека во градот Хвар, заливот Крижна Лука, имало загадување со нафта во морето. Припадници на Полициската станица Хвар и Поморската полициска станица, пожарникари, Хрватската крајбрежна стража и припадници на Капетанијата на пристаништата се на местото на настанот. Покрај спроведувањето на постапката за санирање на штетите, ќе се спроведе и постапка за утврдување на сите факти и околности на настанот“, соопшти сплитската полиција.
Регион
Вучиќ оди во Русија на прославата на Денот на победата, ќе се сретне со Путин

Српскиот претседател Александар Вучиќ потврди дека на 9 мај ќе отпатува за Москва, каде ќе присуствува на парадата за Денот на победата и ќе се сретне со рускиот претседател Владимир Путин, јавува Анадолија.
При гостувањето на ТВ Пинк, Вучиќ изјави дека „со гордост ќе ја претставува Србија“ на обележувањето на 80-годишнината од крајот на Втората светска војна.
„Пред осум месеци реков дека ќе одам во Москва. Ќе одам во Москва“, рече Вучиќ.
Тој додаде дека најверојатно сам ќе отпатува во руската престолнина и дека поради тоа „ќе ги прими сите удари на светот, и однадвор и од внатре“.
„Не сакам владата на Ѓуро Мацут да ја плати цената. Сакам тој да има можност правилно да соработува со Европската унија и никој да не го обвинува за ништо. Тешко дека армијата ќе оди, бидејќи би била изложена на притисоци и санкции“, рече Вучиќ.
Тој најави дека со рускиот претседател ќе разговара за новиот гасен аранжман, како и за иднината на Нафтената индустрија на Србија (НИС), која е загрозена од американските санкции поради рускиот сопственички удел.
„Мораме да го потпишеме договорот за гас до 30 мај. Мора да го решиме прашањето за нафтената компанија. Мора да разговараме и за сите други теми“, рече Вучиќ.
Тој ја најави и посетата на еврокомесарката за проширување Марта Кос на Белград на крајот на април и изрази надеж дека ќе има можност да разговара со претставници на Републиканската партија и американското раководство пред да замине за Москва.