Регион
Евакуираните жители се вратија по експлозијата и затекнаа ужас, Неа Анхијалос како град на духови

Пожарот во околината на Волос, во централна Грција, кој предизвика експлозии во воен магацин, е ставен под контрола, соопшти Противпожарната служба на таа земја.
Како што јави телевизијата ЕРТ, 90 пожарникари од четири групи воена пешадија, 31 возило, пет авиони и еден хеликоптер биле ангажирани во гаснењето на пожарот во областа Магнезија, во Тесалија, каде што се наоѓа Волос.
Пожарот доведе до серија силни експлозии во четвртокот во складиште за муниција на воздухопловните сили недалеку од Неа Анхијалос во Тесалија.
По експлозиите, жителите на Неа Анхијалос, Ступи, Веланидија, Маратос, Критарија, Сорос, Кастраки, Кокино и на Перивлептос биле известени да се евакуираат.
Од експлозиите нема жртви или повредени, јавува ЕРТ.
Во Неа Анхијалос крајбрежната стража ги качуваше граѓаните на приватни чамци, кои се собраа во пристаништето. Граѓаните беа пренесени на пристаништата во Волос, а потоа во градскиот изложбен центар. Во тој простор се сместени повеќе од 1.000 луѓе.
Новинарите на ЕРТ јавуваат дека Неа Анхијалос утринава изгледа како град на духови, со знаци на уништување предизвикани од повторените експлозии на воена опрема.
Искршените прозорци, оштетените фасади на куќите и отворените порти сведочат дека нешто лошо се случило во тоа гратче, кое жителите биле принудени да го напуштат.
Еден корисник на „Твитер“, дури ја спореди ситуацијата во Неа Анхијалос со експлозиите со Перл Харбор.
„Градот е празен од вчера и полека некои се враќаат за да видат колкава штета е направена. Жителите ги напуштија Неа Анхијалос во 18 часот попладне оставајќи ги своите автомобили зад себе“, велат новинарите на ЕРТ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Поскок касна девојче на Јадран: седела со родителите на плажа кога се слушнал вресок

Кон крајот на август едно украинско семејство доживеало сериозен инцидент за време на нивниот одмор во Хрватска. Додека се релаксирале на плажата со камчиња во заливот Дубовица на Хвар, нивната петгодишна ќерка била касната од отровна змија.
„За време на ручекот девојчето си играше со своите пријатели во близина на кафулето на неколку метри од нас. Одеднаш дотрча и рече дека ја каснала змија, не можевме да веруваме“, вели Марта (31), која сè уште лежи со своето дете во КБЦ – Сплит на лекување, за 24sata.hr.
Мајката исто така истакнува дека на детето веднаш му се слошило, почнало да повраќа и да ја губи свеста, а ногата, каде што било каснато, целосно помодрела.
„Сопственикот на кафулето веднаш повика брза помош. За да забрза, нè однесе до патот со својот автомобил. На пат кон градот се префрливме во брзата помош, која нè однесе до хеликоптерот, а потоа до болницата во Сплит. За време на возењето детето постојано ја губеше свеста и повраќаше, беше ужасно да се гледа“, рече мајката.
Таа додаде дека за помалку од еден час биле во Сплит.
„Ногата постепено помодрувуше на местото на каснувањето. Болницата потврди дека станува збор за змија. Кога пристигнавме во болницата, на детето му беше даден противотров и нè предупредија за можни компликации со ногата. По противотровот, детето се чувствуваше подобро, но ногата беше отечена. Ќерката беше на интензивна нега“, вели мајката.
Лекарите се потрудиле да ѝ ја спасат ногата на малата Украинка, а мајката истакнува дека сè било многу исцрпувачки.
„Ни кажаа дека постои сериозен ризик да ја изгуби ногата. Следното утро лекарите ме повикаа и ми рекоа дека е потребна итна операција“, додава мајката, која признава дека ѝ било тешко да ги потпише документите за да го однесе своето дете на таква операција.
По операцијата, која била успешна, детето било префрлено на хируршкото одделение. Таа сè уште е во болница, а вчера била подложена на уште една операција за затворање на раните.
„Тешко ми е дури и да ја погледнам. Нозете ѝ се полни со конци, сè уште прима инфузии и антибиотици. Но, лекарите направија чудо. Ѝ го спасија животот, но и ногата. Бескрајно сум им благодарна“, вели мајката.
Фото: принтскрин
Регион
(Видео) Невреме во Умаг: поплавени улици, речиси 2.000 удари од гром регистрирани во изминатите 2 часа

Силна бура и обилни врнежи од дожд го погодија подрачјето на Умаг во Истра утрово.
До 7:30 часот наутро веќе наврнаа 84 мм дожд, а словенечката станица во Порторож исто така измери над 50 мм. Исто така, се регистрира екстремно силна активност на грмотевици, со речиси 2.000 удари од гром регистрирани во изминатите 2 часа, а атмосферата не покажува знаци на смирување, објавува ИстраМет.
Порталот Неверин објавува дека наврнале 100 мм дожд за помалку од еден час.
За денес и утре во Хрватска е најавено нестабилно време со локални врнежи од дожд и грмотевици, а издадени се предупредувања за потенцијално опасно време за некои региони.
фото: принтскрин
Регион
Кремљ негира вмешаност во инцидентот со ГПС со авионот на Урсула фон дер Лајен во Бугарија

Портпаролот на Кремљ, Дмитриј Песков, ги отфрли тврдењата дека Русија се мешала во услугата на Глобалниот систем за позиционирање (ГПС) во времето кога авионот на претседателката на Европската комисија, Урсула фон дер Лајен, требаше да слета во градот Пловдив, Бугарија.
„Вашите информации се лажни“, изјави Песков за „Фајненшл тајмс“, кој прв ја објави веста.
Претходно денес, британскиот весник „Фајненшл тајмс“ напиша дека наводното руско мешање довело до прекини во ГПС навигацијата на авионот за време на приближувањето кон аеродромот.
Портпаролката на Европската комисија, Аријана Подеста, изјави дека инцидентот со летот на претседателката Урсула фон дер Лајен за Бугарија ја истакнал важноста на нејзината мисија во земјите-членки на првата линија.
Таа потврди дека, според информациите добиени од бугарската влада, наводниот руски напад врз Фон дер Лајен за време на нејзиниот лет во неделата ги оневозможил ГПС навигациските услуги на аеродромот Пловдив, принудувајќи го авионот да слета.