Регион
Ердоган бара преговори за две посебни држави на Кипар

Турскиот претседател, Реџеп Таип Ердоган, за време на посетата на самопрогласената Турска Република Северен Кипар, побара преговори за „две посебни држави“ на Кипар, отфрлајќи го обединувањето на островот како решение на кипарското прашање.
„Постојат два народи и две посебни држави на Кипар. Потребни се преговори за да се дојде до решение кое би се засновало на две посебни држави“, кажа тој го говор на северниот дел на Кипар каде што пристигна во текот на денот.
Последните преговори за мир меѓу кипарските Грци и кипарските Турци во 2017 година, под покровителство на Обединетите нации, а врз основа на идејата за обединување на островот, пропаднаа. Ердоган смета дека плановите за обединување се минато.
Турскиот претседател се сретна со новоизбраниот лидер на самопрогласениот Северен Кипар, Ерсин Татар.
Турција е единствената што го признава Северен Кипар
Турција е единствената земја која го признава Северен Кипар како независна држава.
Кипар се раздвои по турската инвазија во 1974, која беше одговор на државниот удар со кој Грција се обиде да го припои островот.
Ердоган истакна дека Северен Кипар и Турција повеќе нема да дозволуваат „дипломатски игри“ околу прашањето за меѓународното право на истражување ресурси во источниот Медитеран.
„Мир и стабилност во регионот не можат да бидат постигнати ако Турција и Северен Кипар не добијат праведен дел од територијалните права“, рече Ердоган.
Кипарскиот претседател Никос Анастасијадес ја оквалификува посетата на Ердоган како провокација и политика на „свршен чин“ која ја спроведува Анкара и со тоа покажува дека не го почитува меѓународното право.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Убиен судија на Апелациониот суд, во судница во Тирана

Судијата Астрит Каљаја беше убиен денес во Апелациониот суд во Тирана додека траеше рочиштето.
Напаѓачот, засега непознат, влегол во судницата и го застрелал Каљаја, кој бил однесен во болница каде што му била пружена медицинска помош, објавува „Албанија пост“.
На местото на настанот, според медиумот, има бројни полициски сили, кои веднаш го уапсиле осомничениот сторител, а како што се наведува, идентитетот на напаѓачот и мотивите на нападот засега се непознати.
Судијата Астрит Каљаја служел со години во албанскиот судски систем, а неодамна во Апелациониот суд во Скадар.
Тој го поминал процесот на верификација во 2019 година, каде што бил потврден на функцијата од Независната квалификациска комисија, а потоа и од Специјалниот жалбен панел во 2022 година.
Фото: принтскрин
Регион
Пронајдени се телата на браќата од Хрватска во словенечките Алпи

Словенечките планински спасувачи ја продолжија својата акција утрово под врвот Тошќ, во Јулиските Алпи, каде што вчера лавина затрупа тројца хрватски планинари.
Исчезнатите лица, по кои се трагаше од вчера, за жал се пронајдени мртви, објавува словенечки 24ur. Како што неофицијално дознава словенечкиот медиум, двајца од нив биле браќа.
„Ги пронајдовме двајцата – едниот беше закопан околу еден метар во снегот, а другиот околу метар и пол. Првиот успеавме да го транспортираме во долината со хеликоптер, додека сè уште чекаме транспорт за вториот. Самиот терен е многу тежок бидејќи е карпеста, стрмна клисура со бројни карпести скокови, што ја направи работата опасна и тешка за спасувачите. За жал, ќе кажам дека сите тројца планинари што ги пронајдовме во лавината починаа. Им изразувам искрено сочувство на нивните семејства“, рече тој.
Регион
Се уште трае потрагата по хрватските планинари заробени од лавина на словенечките Алпи

Потрагата по двајцата исчезнати хрватски планинари во Јулиските Алпи продолжи утрово кратко по 7 часот, потврди Словенечката планинска служба за спасување за хрватски Индекс.
Вчера наутро, под врвот Тошќ во Јулиските Алпи беше предизвикана снежна лавина, при што беа затрупани тројца хрватски планинари.
За време на тешкото пребарување и спасување, еден планинар беше пронајден без знаци на живот, додека двајцата мажи сè уште се бараат.
Во потрагата денес е вклучен и хеликоптер.
Екипите веќе тргнаа кон локацијата, но точниот број на вклучени спасувачи сè уште не е познат.
Службата додава дека денешното време дозволува распоредување на хеликоптер, но условите во планините се сè уште нестабилни и постои ризик од нови лавини. Идентитетите на загинатиот планинар и двајцата исчезнати сè уште не се официјално потврдени, но неофицијално хрватските медоуми објавија дека двајцата мажи по кои се трага се браќа.
Шеф на спасувачката служба: Ситуацијата е сложена и опасна
Заменик-шефот на Словенечката планинска спасувачка служба, Клемен Белхар, изјави за ХРТ дека во областа има околу половина метар снег, што не звучи како многу, но создава висок ризик од лавини. Тој додаде дека во планините сè уште има групи алпинисти кои ќе бидат спасени денес и утре.
„Ситуацијата е доста сложена и опасна“, рече Белхар. На прашањето дали има надеж дека преостанатите двајца Хрвати по кои сè уште се трага се сè уште живи, тој одговори: „Секако ќе се однесуваме како да се живи, но колку надеж има, никој не знае“.