Регион
Ердоган: Нема разлика помеѓу грчките граничари и нацистите

Турскиот претседател Реџеп Тајип Ердоган рече дека не постои разлика меѓу грчките сили што се обидуваат да ја заштитат границата и нацистите, пренесува грчкиот весник „Катимерини“.
Исламистичкиот лидер ја засили реториката во актуелниот спор со ЕУ додека десетици илјади баратели на азил се обидуваат да влезат во блокот преку грчката граница. Ердоган ги обвини грчките граничари дека се однесуваат како варвари и фашисти.
„Нема разлика помеѓу она што го направија нацистите и сликите што ги гледаме од грчката граница“, рече Ердоган за грчките граничари кои користат солзавец за да ги спречат мигрантите да се пробијат преку граничните бариери.
Коментарите на Ердоган доаѓаат по вжештениот самит во Брисел на кој исламистичкиот лидер го напушти состанокот со претседателот на Европската комисија, Урсула фон дер Лејен, и со претседателот на Европскиот совет, Шарл Мишел, откако двете страни не успеаја да дојдат до договор за условите на договорот за миграција од 2016 година.
Според условите на договорот, ЕУ се согласи да испрати помош за Турција во висина од 6 милијарди евра, а за возврат Ердоган требаше да ја држи под контрола мигрантската криза.
Турскиот претседател побара ЕУ да одобри безвизен режим за турските граѓани и да испрати повеќе пари, тврдејќи дека проценетите 3,6 милиони баратели на азил ја чинеле турската влада 40 милијарди евра.
„Ќе продолжиме со сегашната мерка на отворени граници додека не се исполнат сите наши барања“, рече Ердоган за „Асошиетед прес“.
Турција распореди околу 1.000 специјални сили до грчката граница за да ги спречи мигрантите да се вратат во Турција откако беа запрени од грчките сили, пренесува „Тајмс“. Грција проценува дека спречила 42.000 мигранти нелегално да влезат во земјата откако Ердоган ги отвори портите за миграција во февруари.
Ердоган повика на уште еден самит за мигрантската криза, што ќе се одржи во Истанбул следната недела, со германската канцеларка Ангела Меркел, францускиот претседател Макрон и евентуално со британскиот премиер Борис Џонсон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Снаата на убиените во Чачак повикала полиција: пожарникарите влегле во станот низ прозорецот

Јован (77) и Милица (72) Баковиќ синоќа околу 22 часот се убиени во семејниот стан во Чачак.
За убиството е осомничен нивниот син Михајло, а како што дознаваат медиумите, неговата сопруга повикала полиција.
„Беа прекрасни луѓе, синот им доаѓаше секој ден, не разбираме што можеше да се случи. Слушнав дека на Михајло му се слошило, но не знам за што се работи. Синоќа му се јавила сопругата, тој не одговорил. Ниту тие не се јавиле, па таа дошла во станот. Таа тропнала на вратата, но никој не одговорил, не знаела што се случило и ја повикала полицијата, која ги пронашол телата во станот“, изјавил соседот за медиумите.
Убиениот Јован бил лекар во пензија, според написите.
Припадници на МВР во Чачак го приведоа М. Б. (41) од Чачак поради сомнение дека сторил кривично дело тешко убиство.
Како што беше дополнително соопштено, тој е осомничен за кривично дело тешко убиство и се сомничи дека со остар предмет ги убил родителите. По наредба на Вишото јавно обвинителство во Чачак, одредена му е мерка притвор до 48 часа, во кој рок со поднесување кривична пријава ќе биде изведен на распит во Обвинителството.
Регион
Во хрватскиот Сабор едноминутно молчење за загинатите во Македонија

Хрватскиот Сабор, денеска, со едноминутно молчење им оддаде почит на 59-те лица што завчера загинаа во пожарот во Кочани, Македонија.
„Загубени се многу млади животи и во име на хрватскиот Сабор сакам да изразам сочувство до семејствата на жртвите и да им посакам брзо закрепнување на повредените“, изјави претседателот на Собранието, Гордан Јандроковиќ.
Во пожарот што завчера избувна во „Пулс“ во Кочани загинаа 59 млади лица, а повеќе од 150 се повредени.
Регион
Дачиќ: Полицијата не искористи ништо незаконски на протестот во саботата

Министерот за внатрешни работи Ивица Дачиќ денеска изјави дека Обвинителството ги истражува наводите дека на протестот на 15 март бил употребен звучен топ и нагласи дека полицијата не употребила ништо што е незаконско средство.
„Како човек што раководи со Министерството за внатрешни работи, можам да кажам дека несомнено е оти ние не користиме никакви незаконски средства, така што тоа е почетната точка на приказната што се однесува до нас, а сте слушнале дека и други државни органи го кажале приближно истото, дека српската полиција никогаш во историјата не користела таков тип на средства.
Што се однесува до звукот, нашата полиција има само уреди што се користат за погласни соопштенија на повици или предупредувања бидејќи, според законот, треба да предупредите некого пред да интервенирате кога станува збор за поголеми собири, тоа значи нешто како можеби погласен мегафон“, изјави тој за ТВ „Прва“. Додаде дека дури и тоа не било користено.
Дачиќ рече дека полицијата потоа соработувала со чуварите од Студентската блокада. Тој истакна дека никој од полицајците на терен не забележал ништо што се случило, освен она што подоцна беше соопштено, а кое е поврзано со наводна употреба на звучен топ.
„Имаше одредени дојави дека има луѓе со ножеви, пиштоли, дека е испукан топ, поради што луѓето во одреден момент се нервозни, но подоцна се смири. И тука полицијата ништо не забележала ниту, пак, снимила нешто што би покажало дека имало некој удар.
Од таа страна, уште еднаш ќе повторам дека немаме причина ништо да криеме“, рече Дачиќ.
Тој оцени дека проблемите треба да се решаваат со дијалог, дека е победа што сè заврши мирно во саботата и дека понатамошните чекори не зависат само од едната страна и дека сите заедно треба да видиме што ќе биде понатаму бидејќи, како што заклучи, блокадата на Србија не е решение, пренесува „Танјуг“.