Коронавирусот се појави во градинките во Србија, само два дена по почнувањето со работа по пауза од речиси два месеца. Како што пишува „Телеграф“, Ковид-19 е потврден кај вработена во претшколската установа „Милка Диманиќ“ во Власотинце, која е тријажна медицинска сестра и која ги примала децата кои во понеделникот дошле во градинката.

Исто така, позитивна е и една вработена во претшколска установа во Лесковац, но таа не била на работа.

Заразената вработена во градинката во Власотинце немала никакви симптоми на новиот вирус. Дека е заразена, било откриено кога била на работа и кога од Здравствениот дом пристигнале резултатите од тестирањето на сите вработени во таа претшколска установа, на кои брисовите им биле земени минатата недела.

„Вработените беа тестирани од претпазливост. Ниту еден од вработените во градинката не работеше во ковид-болниците, но бидејќи коронавирусот во Власотинце се појави дури неодамна, кога бројот на пациенти почна да се намалува насекаде, директорот на градинката донесе одлука да ги тестира сите вработени. Поради некоја причина, резултатите од тестовите беа препратени од Здравствениот дом дури во понеделникот и тогаш се дозна дека една вработена е заболена, а таа веќе имаше контакт со децата“, наведува вработен во претшколската установа додавајќи дека во градинката во понеделникот имало речиси 23 деца. За среќа, сите епидемиолошки мерки и процедури биле почитувани во градинката, така што заразената вработена на прием на децата работела со заштитна опрема со визир.

Сепак, стравот од ширење на инфекцијата е присутен.