Регион
Косово покрена нова трговска војна со Србија

Косовската влада го забрани увозот на стоки од Србија, доколку во документите не стои „Република Косово“, објави Приштина во неделата, потег што официјален Белград го смета за полош од воведувањето на данок од 100 проценти во 2018 година.
„Дијалогот е на респиратор“, рече српскиот министер за надворешни работи Ивица Дачиќ, илустрирајќи ги односите, откако косовската влада донесе одлука за рестриктивната мерка.
Со неа се забранува увоз на производи доколку на документите не е назначено „Република Косово“ и се воведува обврска секое возило со стока од Србија да има посебна дозвола.
„Во трговските односи со Србија, забранета е употреба на документи за земјоделски и индустриски производи кои користат имиња на земји или содржат други елементи што се во спротивност со уставот и законодавството на Косово“, соопшти косовската влада.
На 31 март, Косово одлучи постепено да воведе реципрочни мерки за Србија, кои треба да ја заменат стопроцентната царина за стока, воведена во 2018 година од претходната влада на Рамуш Харадинај. Надоместокот за стока од Босна и Херцеговина беше укинат без реципрочни мерки.
Дачиќ изјави дека со прифаќање на новите мерки, Србија ќе го признае Косово и предупреди дека нема да има продолжување на дијалогот сè додека косовската влада не се повлече.
„Ние немаме намера да го продолжиме дијалогот додека не се укинат таксите. Тоа е неприфатливо за нас и негација на сите договори. Со право очекуваме реакција од меѓународната заедница“, рече тој.
Откако најмалку два камиони стоки од Србија се вратија од границата со Косово, директорот на владината канцеларија за Косово, Марко Ѓуриќ, побара итна реакција од меѓународната заедница.
„Владата на Приштина воведе нова трговска блокада на стоки од централна Србија. Овој нелегален чин е исто така спротивен на здравиот разум и ги поткопува европските вредности и егзистенцијалните интереси и на Албанците и на Србите“, рече Ѓуриќ на Твитер.
Владата на поранешниот косовски премиер Рамуш Харадинај воведе 100 проценти давачки за стоки од Србија и БиХ во ноември 2018 година. Овој потег го прекина дијалогот посредуван од ЕУ меѓу Белград и Приштина. По изборите во Косово во октомври минатата година, тогашниот лидер на опозицијата, а денес техничкиот премиер, Албин Курти, вети дека ќе ги укине даноците и ќе ги замени со реципроцитет.
Новиот специјален претставник на ЕУ за дијалогот меѓу Приштина и Белград и Западен Балкан, Мирослав Лајчак, рече дека е разочаран од последната одлука на косовската влада.
Лајчак на Твитер објави дека еднострани акти ја поткопуваат можноста за продолжување на дијалогот и мора веднаш да се повлечат.
„Брисел очекува обете страни во дијалогот да ги спроведат и почитуваат претходните договори“, рече Лајчак.
Договорот од Брисел за нормализација на односите меѓу Белград и Приштина беше потпишан на 19 април 2013 година и обете страни меѓусебно се обвинуваат за кршење на истиот.
Клучната забелешка на Белград е дека Приштина не ја исполнила својата обврска да формира Унија на српски општини во Косово, што Србија ја смета за клучна за безбедноста и самоуправата на Србите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Снаата на убиените во Чачак повикала полиција: пожарникарите влегле во станот низ прозорецот

Јован (77) и Милица (72) Баковиќ синоќа околу 22 часот се убиени во семејниот стан во Чачак.
За убиството е осомничен нивниот син Михајло, а како што дознаваат медиумите, неговата сопруга повикала полиција.
„Беа прекрасни луѓе, синот им доаѓаше секој ден, не разбираме што можеше да се случи. Слушнав дека на Михајло му се слошило, но не знам за што се работи. Синоќа му се јавила сопругата, тој не одговорил. Ниту тие не се јавиле, па таа дошла во станот. Таа тропнала на вратата, но никој не одговорил, не знаела што се случило и ја повикала полицијата, која ги пронашол телата во станот“, изјавил соседот за медиумите.
Убиениот Јован бил лекар во пензија, според написите.
Припадници на МВР во Чачак го приведоа М. Б. (41) од Чачак поради сомнение дека сторил кривично дело тешко убиство.
Како што беше дополнително соопштено, тој е осомничен за кривично дело тешко убиство и се сомничи дека со остар предмет ги убил родителите. По наредба на Вишото јавно обвинителство во Чачак, одредена му е мерка притвор до 48 часа, во кој рок со поднесување кривична пријава ќе биде изведен на распит во Обвинителството.
Регион
Во хрватскиот Сабор едноминутно молчење за загинатите во Македонија

Хрватскиот Сабор, денеска, со едноминутно молчење им оддаде почит на 59-те лица што завчера загинаа во пожарот во Кочани, Македонија.
„Загубени се многу млади животи и во име на хрватскиот Сабор сакам да изразам сочувство до семејствата на жртвите и да им посакам брзо закрепнување на повредените“, изјави претседателот на Собранието, Гордан Јандроковиќ.
Во пожарот што завчера избувна во „Пулс“ во Кочани загинаа 59 млади лица, а повеќе од 150 се повредени.
Регион
Дачиќ: Полицијата не искористи ништо незаконски на протестот во саботата

Министерот за внатрешни работи Ивица Дачиќ денеска изјави дека Обвинителството ги истражува наводите дека на протестот на 15 март бил употребен звучен топ и нагласи дека полицијата не употребила ништо што е незаконско средство.
„Како човек што раководи со Министерството за внатрешни работи, можам да кажам дека несомнено е оти ние не користиме никакви незаконски средства, така што тоа е почетната точка на приказната што се однесува до нас, а сте слушнале дека и други државни органи го кажале приближно истото, дека српската полиција никогаш во историјата не користела таков тип на средства.
Што се однесува до звукот, нашата полиција има само уреди што се користат за погласни соопштенија на повици или предупредувања бидејќи, според законот, треба да предупредите некого пред да интервенирате кога станува збор за поголеми собири, тоа значи нешто како можеби погласен мегафон“, изјави тој за ТВ „Прва“. Додаде дека дури и тоа не било користено.
Дачиќ рече дека полицијата потоа соработувала со чуварите од Студентската блокада. Тој истакна дека никој од полицајците на терен не забележал ништо што се случило, освен она што подоцна беше соопштено, а кое е поврзано со наводна употреба на звучен топ.
„Имаше одредени дојави дека има луѓе со ножеви, пиштоли, дека е испукан топ, поради што луѓето во одреден момент се нервозни, но подоцна се смири. И тука полицијата ништо не забележала ниту, пак, снимила нешто што би покажало дека имало некој удар.
Од таа страна, уште еднаш ќе повторам дека немаме причина ништо да криеме“, рече Дачиќ.
Тој оцени дека проблемите треба да се решаваат со дијалог, дека е победа што сè заврши мирно во саботата и дека понатамошните чекори не зависат само од едната страна и дека сите заедно треба да видиме што ќе биде понатаму бидејќи, како што заклучи, блокадата на Србија не е решение, пренесува „Танјуг“.