Регион
Крах на сезоната во Црна Гора, плажите полупразни: „Не ни требаат скржави туристи“

Полупразните плажи, градините со кафулиња и рестораните, како и повеќе од 50 проценти од достапните апартмани и соби во приватниот сместувачки капацитет, потсетуваат на пандемските денови, а жителите на црногорското крајбрежје сè уште чекаат конечно да почне сезоната иако крајот на јули се приближува, пишува „Нова.рс“.
И покрај малиот број гости оваа година, цените не паѓаат – неодамна јавноста беше зачудена од веста за лежалките во Пржно, недалеку од Свети Стефан, кои чинат дури 200 евра, а на градските плажи цените се движат помеѓу 15 и 120 евра. Приватното сместување чини од 40 до 90 евра и повеќе, во зависност од локацијата и капацитетот.
View this post on Instagram
Иако странските јазици се слушаат на секој чекор – италијански, германски, шпански – и иако поголемите крајбрежни градови во Црна Гора се преполни со Руси, Украинци и со Турци во текот на целата година, локалното население вели дека чека само – Срби.
„Гостите од Србија трошат сè што ќе донесат за седум дена и се враќаат дома. Не штедат пари, не штедат на одмор, а другите се скржави. Не ни требаат такви туристи. Оваа година имаме невообичаено малку гости од Србија и од Босна. Луѓето очигледно немаат пари за сместување или храна од продавницата бидејќи сè е толку скапо што не знаеме ни како преживуваме. Ги нема ни оние т.н. домат-туристи. Сепак, мислам дека цените треба итно да се намалат, можеби август ќе нè спаси“, нагласува Милјана, сопственичка на салон за убавина во Будва.
Некои локални жители ја обвинуваат политиката за слабата посетеност на гостите од Србија.
„Оние што годинава почнаа бизнис на море веќе се плашат од долгови и можен банкрот. Еден мој пријател отвори кафуле на плажа, киријата е огромна – десетици илјади евра за сезоната – и сигурно нема да може да го покрие тоа. Ова не е како во периодот на короната, но е доста слично. Цените во кафулињата се високи, но ние келнерите не одлучуваме за тоа, туку шефовите и државата. Ако сакаат да привлечат туристи, нека ги намалат цените“, вели Јовица, келнер, кој работи во кафуле на црногорскиот брег.
Повеќето сопственици или закупувачи на плажни објекти, ресторани и кафулиња поседуваат и дел од плажата, каде што наплаќаат за лежалки и за чадори за сонце.
„На градските плажи цените се пониски, се движат од 15 до 40 евра, но штом се оддалечите малку подалеку од центарот, каде што има поголема удобност, цените растат – до 120, 150, па дури и 200 евра. Малкумина може да си го дозволат тоа денес. Оние што водат бизниси остануваат без клиенти и тонат во долгови, а оние што би дошле на море не доаѓаат затоа што не може да платат“, објаснува тој.
Луѓето се принудени да плаќаат за сончање
Најскапата работа е плажата. За четиричлено семејство, за еден ден – или поточно, неколку часа на плажа – потребни се минимум 50 евра. Плажите се полни со лежалки, а туристите се принудени да платат за сончање, иако многумина би го простреле својот пешкир, што не би ги чинело ништо.
На места на кои има лежалки – пешкирите се забранети, а цените на кафето, соковите, алкохолот и на оброците се и до трипати повисоки отколку на местата далеку од плажата или од центарот на градот. Дури и сладоледот е два или трипати поскап отколку во продавница.
„Минатата година сезоната почна подоцна, но веќе во ова време имавме гости и сè беше полно. Оваа година мај и јуни беа подобри од јули, а ќе видиме што ќе се случи во август. Не знаеме што се случува. Добиваме повици од стари гости, кои доаѓаат со години во ова време и велат дека не може да земат одмор затоа што се плашат дека ќе ги изгубат работните места. Политичката ситуација во Србија очигледно ги загрижува луѓето, се плашат за своите плати и за работни места, па затоа нема да одат никаде“, вели Драган Поповиќ, кој изнајмува сместување во близина на Петровац.
„Ние што изнајмуваме приватно сместување се потпиравме најмногу на гости од Србија и од Босна. Ги намаливме цените колку што можевме, но повеќе не можеме бидејќи не се исплати. Имаме многу даноци и трошоци. Очигледно е дека е поприфатливо за туристите да одат во Грција оваа година, штом нема никој тука. Имаме гости од целиот свет, но Србите ни се омилени – живееме од нив. Туристите што не се од регионот не трошат многу. Доаѓаат на три или четири дена, а потоа продолжуваат понатаму. Вечераат во ресторани, спијат во хотели, не оставаат бакшиш, не излегуваат во клубови“, вели Драган.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Кремљ негира вмешаност во инцидентот со ГПС со авионот на Урсула фон дер Лајен во Бугарија

Портпаролот на Кремљ, Дмитриј Песков, ги отфрли тврдењата дека Русија се мешала во услугата на Глобалниот систем за позиционирање (ГПС) во времето кога авионот на претседателката на Европската комисија, Урсула фон дер Лајен, требаше да слета во градот Пловдив, Бугарија.
„Вашите информации се лажни“, изјави Песков за „Фајненшл тајмс“, кој прв ја објави веста.
Претходно денес, британскиот весник „Фајненшл тајмс“ напиша дека наводното руско мешање довело до прекини во ГПС навигацијата на авионот за време на приближувањето кон аеродромот.
Портпаролката на Европската комисија, Аријана Подеста, изјави дека инцидентот со летот на претседателката Урсула фон дер Лајен за Бугарија ја истакнал важноста на нејзината мисија во земјите-членки на првата линија.
Таа потврди дека, според информациите добиени од бугарската влада, наводниот руски напад врз Фон дер Лајен за време на нејзиниот лет во неделата ги оневозможил ГПС навигациските услуги на аеродромот Пловдив, принудувајќи го авионот да слета.
Регион
(Видео) Костадинов од Бугарија нападнал автомобил мислејќи дека во него е Урсула фон дер Лајен

Во неделата, додека претседателката на Европската комисија, Урсула фон дер Лајен, престојуваше во посета на фабриката за оружје во бугарскиот град Сопот, лидерот на националистичката партија „Преродба“, Костадин Костадинов, бил снимен како блокира влез на автомобилот за кој демонстрантите верувале дека се наоѓа таа внатре.
Според извештаите, Костадинов, кој претходно повикувал Бугарија да излезе од НАТО, организирал демонстрации со друга националистичка партија пред фабриката „Вазов“, противејќи се на европскиот пат на Бугарија и барајќи заштита на националниот суверенитет.
На видеото објавено на социјалните мрежи се гледа како демонстрантите со бугарски и руски знамиња го опкружуваат автомобилот, кој потоа почнува да се движи, но е неколку пати удрен со транспарент. Костадинов се расправа со полицијата, додека демонстрантите продолжуваат да го блокираат возилото со повици „нацисти“ и свирежи.
Не е јасно дали претседателката била во автомобилот за време на инцидентот. Костадинов подоцна тврдел дека фон дер Лајен во фабриката во Сопот пристигнала со хеликоптер, а не со автомобил.
Партијата „Преродба“ редовно организира протести против ЕУ и бара Бугарија да излезе од Унијата, а нејзините приврзаници претходно ја вандализирале и делегацијата на ЕУ во Софија, фрлајќи црвена боја и обидувајќи се да запалат врати, пренесе „Б92“.
Претходно беше објавено и дека авионот во кој претседателката на Европската комисија леташе за Бугарија остана без ГСП-навигација и мораше да слета со помош на хартиени мапи. Тројца службеници запознаени со инцидентот изјавија за „Фајненшл тајмс“ дека се сомневаат во руско попречување.
Регион
(Видео) Уште еден инцидент: нападнато и возилото со кое патуваше Урсула фон дер Лајен во Бугарија

Лидерот на проруската Партија на преродбата, Костадин Костадинов, беше снимен како го блокира влезот на автомобил во фабрика за оружје во бугарскиот град Сопот за време на посетата на претседателката на Европската комисија, Урсула фон дер Лајен, во неделата.
Националистичката партија на преродбата се обиде да ја спречи Фон дер Лајен да влезе во фабриката, напаѓајќи го возилото за кое демонстрантите веруваа дека е нејзино.
На видеото се гледа како Костадинов блокира црн автомобил, тврдејќи дека бугарската полиција, која се обидувала да ги убеди демонстрантите да го пропуштат возилото, „сакала да го прегази“.
Во видеото објавено на социјалните мрежи, демонстрантите со бугарски и руски знамиња го опкружуваат автомобилот, кој потоа се движи напред, но е неколку пати погоден од еден од транспарентите.
Костадинов може да се види како се расправа со полицијата со свирежи, и извици „нацисти“, додека демонстрантите понатаму го опкружуваат возилото.
Не е јасно дали претседателката на Европската комисија воопшто била во возилото во времето на инцидентот. Костадинов подоцна тврдеше дека стигнала до фабриката во Сопот со хеликоптер, а не со автомобил.
Порано денес беше објавено дека во неделата авионот од Фон дер Лајен кружел со часови и едвај успеал да слета во Бугарија поради, како што се тврди, операција за блокирање на GPS.
Фото: принтскрин