Регион
Лајчак: Се очекува Косово и Србија целосно да ги исполнат своите обврски од дијалогот

Специјалниот претставник на ЕУ за дијалог меѓу Белград и Приштина, Мирослав Лајчак, по посетата на Белград и Приштина, каде што беше со претставниците на САД, Франција, Германија и Италија, истакна дека очекуваат Косово и Србија целосно да ги исполнат своите обврските од дијалогот за нормализација на односите, како и дека тој факт не го менуваат настаните од 24 септември кои тие ги осудуваат.
Во редовна објава синоќа на Фејсбук, Лајчак напиша дека штотуку се вратил од заедничката посета на Косово и Србија, каде што бил со главните советници за надворешна политика и безбедност на Франција, Германија и Италија, како и со американскиот пратеник за Западен Балкан, Габриел Ескобар.
Како што напиша тој, во Белград и во Приштина разговарале со претседателот Александар Вучиќ и премиерот Албин Курти како да се оди напред во нормализацијата на односите и да се постигне напредок во спроведувањето на Договорот на патот кон нормализацијата.
Темата беше и безбедноста на северот на Косово, напиша Лајчак и додаде дека на двајцата лидери им укажале дека настаните од 24 септември претставуваат „јасна и невидена ескалација што исто така покажува дека сега деескалацијата и нормализацијата се поитни од кога било“.
„Заедно со нашите партнери, ние сме обединети во осудувањето на терористичките напади и нагласуваме дека сите сторители мора да бидат изведени пред лицето на правдата и дека очекуваме целосна соработка на Србија во овој поглед“, напиша Лајчак.
Тој додаде дека настаните од 24 септември (во селото Бањска на северот на Косово) „не го менуваат фактот дека Косово и Србија го склучија Договорот за нормализација на почетокот на оваа година“.
„Во нашите разговори ги пренесовме нашите очекувања дека Косово и Србија целосно ќе ги исполнат своите обврски од дијалогот. Секое условување или одложување е неприфатливо“, укажа Лајчак.
Тој им се заблагодари на партнерите за посетата и рече дека „наскоро ќе продолжат со разговорите“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин
Регион
Милановиќ: Луѓето на водечките позиции, особено во Европа, работат многу лошо

„Времињата во кои живееме денес се депресивни и не се добри. Луѓето што се на лидерски позиции, особено во Европа, работат многу лошо и воопшто не се на ниво на задачата. Некои работи се нерешливи, а начинот на кој се решаваат води кон понатамошен антагонизам и евентуално војна“, рече хрватскиот претседател Зоран Милановиќ во неделата вечерта во Њујорк.
Споредувајќи го времето на Студената војна со денешната ситуација, Милановиќ потсети дека тогаш било исклучително тешко и дека се потребни голема концентрација за разни луѓе да седнат и да разговараат за важни прашања.
„Во последните дваесет години сè е нарушено, безбедносната архитектура на светот, особено на западниот свет и на северната хемисфера, повеќе не постои“, рече тој и додаде дека денес живееме во тешки времиња и затоа мора да се погледнеме себеси, нашата работа и нашите интереси и да видиме дека не се истакнуваме премногу во сојузите во кои сме – НАТО и Европската Унија“.
Зборувајќи за ситуацијата во ЕУ и улогата на Хрватска, Милановиќ нагласи: „За жал, работите не функционираат онака како што требаше. Не мислам на привремени и повремени пласмани на пари што доаѓаат во Хрватска за претежно непродуктивни проекти и работи што нема да ја направат Хрватска технолошка сила и нема да ја направат побогата земја. Но, подобро е да го имаме тоа бидејќи кога ќе престане, ќе имаме нови сериозни предизвици. Денес, Хрватска мора да биде лојална на сојузите во кои е членка и мора да ги почитува обврските што ги презела, но исто така никогаш не смееме да дозволиме да бидеме вовлечени во комбинации и авантури што не сме ги кроеле бидејќи тоа не е солидарност. Никој не може да го бара тоа од нас и нема да го добие, според мене“.
Осврнувајќи се на војната во Газа, Милановиќ изјави: „Можеме да се залагаме за признавање на Палестина. Велат дека нема многу да се промени. Па, нема, но некои работи треба да се решат за да се продолжи понатаму. Светот нема да биде подобар и поубав, секогаш ќе биде исполнет со кризи, дефекти и недостатоци и ние мора да се приспособиме на тоа“.
Фото: принтскрин