Регион
Мицотакис бара нов круг избори за апсолутно мнозинство
Еден ден по изборите, Грција се подготвува за уште едно гласање кое би можело да ѝ овозможи на партијата на премиерот Киријакос Мицотакис сама да управува со земјата, пренесува „Еурактив“.
Резултатите од изборите во Грција покажуваат убедлива победа на Нова демократија, но Мицотакис сака уште едно гласање за да добие „бонус“ од 50 места во парламентот. Тој претходно изјави дека Нова демократија бара само еднопартиска влада.
„Сметам дека ми е должност што поскоро да ја надминам пречката за формирање влада во форма на едноставен пропорционален изборен систем и имам намера да го вратам мандатот попладне за да можеме да одржиме втор круг избори, евентуално на 25 јуни“, рече Мицотакис.
Грчката претседателка Катерина Сакеларопулу сега ќе ги покани лидерите на втората и третата партија на консултации за создавање коалициска влада. Ако не можат да се договорат, тогаш таа ќе ги собере лидерите на сите партии во обид да формира министерски кабинет. Во случај и тоа да не успее, парламентот ќе се распушти, ќе се именува привремена влада и ќе се одржат нови избори.
Конзервативната Нова демократија освои 20% повеќе гласови на изборите во неделата од Сириза предводена од левичарот Алексис Ципрас. Најголемиот број од гласовите се преброени и според досегашните податоци, Нова демократија освоила 40,8%, а Сириза 20,1 отсто од гласовите.
Грчкото Министерство за внатрешни работи соопшти дека Нова демократија би можела да освои 145 места во парламентот, што е само шест помалку од апсолутното мнозинство. Резултатите од гласањето се во тотална спротивност со предизборните анкети во Грција кои предвидуваа потесна разлика.
Ова е најдобриот резултат на конзервативците во последните 14 години, но тие сега сакаат нови избори на крајот на јуни.
„Гласачките ливчиња кажуваат се. Тие покажуваат дека Нова демократија ја доби довербата на народот да владее, да биде силна и автономна. Милиони грчки граѓани гласаа за Нова демократија. Одличниот резултат ја покажува волјата на народот кој ни дал согласност за политичка независна влада. Народот побара нешто повеќе – да се движи побрзо на патот на напредокот и големите реформи“, рече Мицотакис, според грчкат редакција на Си-ен-ен.
Мицотакис изјави дека резултатот од првиот круг е „политички земјотрес“ во Грција и голема победа која ги надмина дури и очекувањата на партијата, но бидејќи нема апсолутно мнозинство, Мицотакис сега може или да коалицира или да бара уште едно гласање.
„Од утре ќе се бориме заедно за на следните избори Нова демократија да може да се потпре само на себе. Ќе продолжиме напред, храбро и стабилно, за да го завршиме денешниот важен чекор и да бидеме конечни победници. Грција сака силна влада“, истакна тој.
И Ципрас ја поддржа идејата за уште еден изборен круг, велејќи дека изборниот циклус сè уште не е завршен.
„Следната битка ќе биде критична и одлучувачка“, посочи тој.
Мицокатис е на власт четири години и за тоа време успеа да ја води државата низ пандемија која ја уништи виталната туристичка индустрија. Но, поранешната „европска економска главоболка“ успеа да заживее по пандемијата и забележа економски раст од 5,9% во 2022 година.
Невработеноста и инфлацијата се намалуваат, а за 2023 година се предвидува двоен раст во однос на просекот во ЕУ, па Грција е далеку од долгот и кризата што ги имаше пред десет години.
Владеењето на Мицотакис го одбележа и скандалот со прислушувањето и страшната железничка несреќа во февруари годинава, во која загинаа 57 лица. Владата првично го обвини човечкиот фактор за несреќата, иако железницата со години страдаше поради недоволно инвестирање.
Но, ниту скандалот со прислушувањето ни последиците од несреќата не успеаја да ја намалат поддршката за конзервативците.
Грција има нов закон за избори, кој ќе почне да се применува од следното гласање. Според тој закон, победникот може да добие „бонус“ од 50 пратенички места, што би гарантирало победа на Нова демократија.
Но, левицата веројатно ќе се обиде да го промени јавното мислење со фокус на кампањата на зголемените трошоци за живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Грција во состојба на готовност поради можност за грабежи на музеи
Поради грабежот на Лувр во Париз и можноста за сличен инцидент во еден од бројните и важни музеи во Грција, надлежните органи се во состојба на висока готовност.
Според весникот „Катимерини“, грчките министерства за внатрешни работи и култура планираат да го доверат чувањето на музеите, а можеби и на некои археолошки локалитети, на грчката полиција.
Според надлежните службеници кои разговараа со новинарите на весникот под услов да не бидат именувани, почнувајќи од следниот март, не само цивили вработени во Министерството за култура, како што беше случај досега, туку и униформирани полицајци ќе учествуваат во чувањето на културните богатства од непроценлива вредност. 300 специјални чувари кои наскоро ќе бидат интегрирани во грчките полициски сили ќе учествуваат во оперативниот план.
Надлежниот извор објаснува дека Министерството за внатрешни работи претходно планирало вработување на 600 нови специјални чувари со цел зајакнување на полициските служби. Сепак, по одлуката на владата и според една верзија, по препорака на Министерството за култура, беше одлучено вкупниот број на специјални стражари кои ќе се приклучат на полициските сили да се зголеми на 900, така што 300 од нив ќе бидат распоредени да чуваат музеи и археолошки локалитети. Нови специјални стражари ќе се приклучат на полицијата во периодот февруари-март.
Во Грција, грабеж сличен на оној во Лувр се случи во 2012 година, кога сторителот успеа да провали во Националната галерија и да украде три уметнички дела од голема вредност, меѓу кои имаше и слика од Пикасо. Истата година кога се случи грабежот во Галеријата, беше забележан и грабежот на Музејот на историјата на Олимписките игри во Стара Олимпија. Овој случај го открија и полицајците на Службата за безбедност во Патра, кои ја презедоа истрагата.
Фото: принтскрин
Регион
Рама: Фактот што Србија не го признава Косово е суштински проблем на регионот
Албанскиот премиер Еди Рама, на Форумот за мир во Париз изјави дека непризнавањето на Косово од страна на Србија е „суштински проблем“ на регионот.
Рама рече дека Балканот мора да избере помеѓу поделба и соработка.
„Косово е проблем затоа што за нас е земја со свои права. Но, за Србија или за другите земји – не е. Тоа е голем проблем. Или ќе продолжиме да гледаме наназад, да разгоруваме тензии и негативна енергија и да нанесуваме штета на себе и на нашата економија – ние сме мали пазари – или да бидеме заедно. Другата алтернатива беше да не се согласуваме и да не соработуваме“, рече Рама, пренесува Koha.net.
Тој додаде дека денес Европа се соочува со истите предизвици што некогаш го карактеризираа балканскиот регион.
„Европа стана многу балканизирана. Мислам дека Франција е исто така многу балканизирана – тие не можат да донесат буџет. Погледнете ја Британија, таму е уште полошо. Сега ние сме добрите, затоа им велам: склучете мир, не заканувајте се, разговарајте, затоа што доаѓаме од пеколот и ние сме гласници на мирот“, нагласи Рама.
Рама изјави дека Албанија, без оглед на тоа дали другите ја слушаат или не, ќе продолжи да работи за регионална стабилност.
„Ако светот стане подобро место, ќе кажеме дека сме ја завршиле нашата работа. Ќе добиеме место во рајот како Албанци“, рече тој со насмевка, според медиумот.
Албанскиот премиер ги оцени односите со Италија и улогата на Европската Унија.
„Италијанците се Албанци облечени во Версаче. Имате премиер – исклучителна и фасцинантна жена. Таа не е висока, но верувајте ми, кога зборува, таа е повисока и од мене. ЕУ е најголемиот политички проект што човештвото некогаш го доживеало“, рече Рама.
На крајот од своето обраќање, Рама истакна дека членството на Албанија во Европската Унија е историски благослов.
Фото: принтскрин
Регион
Вучиќ: Најмоќните сили сакаат да ни ја украдат територијата, во следните 10 дена ќе имаме нешто што ќе ги направи среќни
Српскиот претседател Александар Вучиќ денес се обрати до јавноста од Самарканд, каде што присуствуваше на отворањето на 43-та сесија на Генералната конференција на УНЕСКО.
Тој изјави дека разговарал со претседателот Пелегрини за европскиот пат на Србија, но и за билатералните односи, за кои верува дека можат да се подобрат.
Вучиќ, исто така, изјави дека е многу важно што Генералната конференција на УНЕСКО за прв пат се одржува надвор од Париз, честитајќи им на домаќините за организацијата.
Кога станува збор за средбата меѓу Трамп и Џјинпинг, Вучиќ очекува работите да почнат да се менуваат дури од јануари.
„И јас тогаш реков дека е важно Кина да се вклучи бидејќи без неа е тешко да се постигне голем договор. Мислам дека е добро за светот. За нас е важно што помина добро, а не ни треба ни да ги знаеме сите важни детали. Имаме многу добри односи со Кина и би рекол дека се обидуваме да изградиме подобри односи и со Америка“, рече Вучиќ.
Во врска со веста дека Сирија го признала Косово, тој рече дека тоа била очекувана вест.
„Ја зачувавме нашата позиција во УНЕСКО и позицијата на меѓународното јавно право. Веста дека Сирија го призна Косово беше очекувана и сега разбираме колку ни значеше слободарскиот пристап на Башар Ал Асад кога беше на власт. Јасно е кога доаѓа некој што е под огромно влијание на една од клучните земји во регионот, како што е Турција. Тоа е истиот ракопис како минатата година од Анталија. Го повикаа нашиот министер за надворешни работи, немаа време за билатерален, а потоа Судан ја призна независноста на Косово“. Добиваат наредба и се однесуваат соодветно, но бидејќи гледам дека се премногу среќни, ќе имаме нешто да им угодиме во следните 10 дена. Ова е маратон, а не трка на 50 метри“, рече Вучиќ, пренесуваат медиумите во соседството.

