Регион
Мицотакис ќе се соочува со тешки предизвици

Тешки одлуки го очекуваат новиот премиер на Грција, доколку тој планира да ги одржи ветувањата што ги даде пред предвремените парламентарни избори минатата недела.
Киријакос Мицотакис, лидер на централно-десничарската партија Нова демократија, даде заклетва откако беше избран за нов премиер во понеделникот. Тој е следбеник на Алексис Ципрас, лидерот на левичарската Сириза која повика на избори во мај, откако беше поразена во европски и општински избори.
Иако Мицотакис доаѓа на функцијата во земја која полека излегува од економска криза, тој сепак ќе се соочи со многу предизвици.
Грција излезе од рецесија и постигна пораст од 2%, но за време на економската криза бруто-домашниот производ на земјата падна за 25%.
Во својата кампања Мицотакис даде ветување дека ќе ги намали даноците, ќе направи реформи во бирократијата и ќе создаде економија поволна за инвестиции.
Другото прашање важно за Грција е невработеноста, која е намалена од 28% во екот на економската криза на 18%, но сепак Грција останува земја со една од највисоките стапки на невработеност во Европа.
Во врска со надворешната политика, Мицотакис го осуди договорот со кој Северна Македонија го смени името, додека Атина се противеше земјата да стане член на НАТО и ЕУ.
Иако овој договор се здоби со меѓународна популарност, сепак, во Грција не беше одобрен од јавноста и опозицијата, па така Мицотакис вели дека тој ќе направи промени во делот каде Атина ги прифаќа македонската националност и јазик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Конечна судска одлука: Додик повеќе не е претседател на Република Српска

Апелациониот совет на Судот на Босна и Херцеговина ја отфрли жалбата на Милорад Додик против одлуката на Централната изборна комисија (ЦИК) со која му беше одземен мандатот на претседател на Република Српска.
Како резултат на тоа, според сараевските медиуми, Додик официјално повеќе не е на таа позиција, а ЦИК е должна да распише предвремени избори за претседател на ентитетот.
Да потсетиме дека ЦИК претходно донесе одлука за прекин на неговиот мандат, но таа можеше да стапи на сила дури откако ќе стане конечна, или потврдена од Апелациониот совет на Судот на БиХ. Денешната одлука конечно утврди дека Додик повеќе не е претседател на Република Српска.
Во образложението на пресудата, Судот наведе дека мандатот на избраниот функционер завршува на денот на правосилност на пресудата со која е осуден на затворска казна од најмалку шест месеци, што во случајот на Додик беше 12 јуни 2025 година, кога беше донесена второстепената пресуда. Судот ги отфрли и тврдењата за ретроактивна примена на законот, нагласувајќи дека пресудата станува правосилна на денот на нејзиното донесување, додека нејзината извршност е поврзана со доставување до странките, што не ги менува правните последици за мандатот.
Фото: ЕПА
Регион
Маж фрли молотов коктел врз Куќата на цвеќето, го фати обезбедувањето

Белградската полиција го уапси 55-гпдишниот Г.М. под сомнение дека фрлил молотов коктел врз Куќата на цвеќето, објави српски Телеграф. По наредба на обвинителството, му е одреден притвор до 48 часа.
Тој е осомничен дека се обидел да го запали Музејот „25 Мај“, местото каде што е погребан поранешниот југословенски претседател Јосип Броз Тито, околу 6 часот утрово.
Човекот е уапсен по интервенцијата на полицијата. Нема повредени.
Пожарот ја оштетил влезната врата од Куќата на цвеќето. Според Телеграф, полицијата била повикана од обезбедувач. Тој пријавил дека еден човек дошол пред Музејот, најверојатно држејќи молотов коктел, и се заканувал дека ќе ја запали зградата.
„Се приближил до зградата и фрлил запалива течност. За среќа, обезбедувачот го фатил и ја повикал полицијата“, пишува Телеграф.
Неофицијално, се дознава дека човекот при апсењето рекол дека сакал да го запали „усташкото гнездо“.
фото: принтскрин
Регион
(Видео) Изгоре луксузна јахта во Будва: сопственикот бил на бродот кога избувнал пожарот

Црногорските противпожарни екипи го изгасија пожарот што избувна на јахта во марината во Будва.
Ова за црногорски „Вијести“ го потврди и раководителот на Службата за заштита и спасување на Будва.
Полициската управа соопшти дека околу 20:15 часот во неделата, полицијата во Будва била известена од сопственикот на јахта закотвена во пристаништето во Будва дека избувнал пожар додека сопственикот бил на бродот.
Јахтата е во сопственост на бизнисменот Б. М., а полицијата објави дека сопственикот на јахтата рекол дека пожарот најверојатно се случил поради дефект.
Пловилото било извлечено од пристаништето откако избувна пожарот кратко по 20 часот, заради безбедност на другите бродови. Седум екипи беа ангажирани за гаснење на пожарот.
фото: принтскрин