Регион
Новиот бугарски министер за одбрана најави воена помош за Украина

Бугарскиот парламент во вторникот ја одобри новата влада предводена од Николај Денков, а функцијата министер за одбрана ја презеде воениот експерт Тодор Тагарев, кој го водеше Министерството за одбрана во март-мај 2013 година, пренесува БТА.
Тагарев во своето обраќање ја објави својата намера да обезбеди воена помош за Украина. Во говорот по парламентарното гласање тој рече дека неговото министерство има намера да продолжи со напорите за зајакнување на одбранбената способност на земјата.
Дефинирајќи ги главните цели на својата идна работа како министер за одбрана, Тагарев рече дека Бугарија и нејзината армија мора да придонесат за осигурување безбедност и стабилност во регионот на Црното Море и Југоисточна Европа.
„Втората точка е придонесот на нашата армија за безбедноста на Црното Море… Ќе имаме безбедност кога последниот окупатор ќе ја напушти границата на Украина и кога ќе се блокираат агресивните намери на Кремљ. Само на тој начин може да се гарантираат нашиот регион и нашата иднина“, рече Тагарев.
„Мора да го направиме она што е потребно и да ги зајакнеме нашите одбранбени способности и да ѝ дадеме помош на Украина за да може да ја продолжи контраофанзивата, која очигледно почна, и да ги ослободи своите територии“, додаде тој.
Тагарев рече дека помошта нема да ѝ наштети на одбранбената способност на Бугарија.
Бугарија е една од ретките членки на Европската Унија што не обезбеди воена помош за Украина по инвазијата од страна на Русија во февруари 2022 година.
Бугарските пратеници гласаа за испраќање оружје во ноември, но претходната влада никогаш официјално не продолжи со испраќање помош. Сепак, повеќе медиумски извештаи укажаа дека Бугарија испратила оружје во Украина преку трети земји.
Русија почна специјална воена операција во Украина на 24 февруари 2022 година како одговор на повиците на народните републики Донецк и Луганск за заштита од украинските трупи.
Руското Министерство за одбрана соопшти дека операцијата, чија цел е украинската воена инфраструктура, има цел да ја демилитаризира и денацифицира Украина и целосно да го ослободи Донбас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Плинска боца експлодира во стан на српски туристи во Грција, има повредени

Пет туристи од Србија се повредени денес во експлозија на плинска боца во изнајмена соба во Аспровалта, во регионот на Солун, од кои еден доби тешки изгореници, објавува Катимерини.
Несреќата се случила денес околу 15:30 часот под сè уште неразјаснети околности.
Најтешко повреден е 41-годишен маж, кој се здобил со изгореници, додека другите се здобиле со повреди од скршено стакло, објавува Катимерини, додека Прототема објавува дека маж со изгореници од прв и втор степен и жена со изгореници од прв степен се пренесени во свесна состојба во Општата болница во Солун.
Полицијата го уапси 86-годишниот сопственик на куќата, а надлежните органи ги истражуваат причините за несреќата.
Регион
Полицијата на Истра уапси Германец: снимал голи деца со рачен часовник

Истарската полиција приведе германски државјанин (31), кој е обвинет за експлоатација на деца за порнографија откога е откриено дека снима голи деца на плажа со рачен часовник со интегрирана камера.
Граѓаните ја известиле полицијата во вторникот околу 18 часот кога забележале дека мажот снима деца со рачен часовник. Полицијата ги претресла неговите простории, автомобилот и друга техничка опрема и пронашла инкриминирачки снимки. Еден ден подоцна тој бил предаден на притворската единица на Полициската управа на Истра со кривична пријава.
„Полицијата апелира до родителите да ги следат своите деца и да гледаат каде се и што прават на плажа. Облечете ги вашите деца во костими за капење, а доколку забележите сомнително лице што снима деца, веднаш известете ја полицијата на 192“, велат од полицијата додавајќи дека ваквите акции покажуваат дека јавноста е сè повеќе свесна за проблемот со снимањето деца и дека препознавањето на сомнителното однесување овозможува навремен одговор и апсење на сторителот“.
Фото: принтскрин
Регион
Словенците воведуваат скратена работна недела за оние што се блиску до пензија

Од 1 јануари 2026 година во Словенија делумно ќе стапи во сила закон кој претставува вистинска револуција на пазарот на трудот. Освен зголемување на надоместоците за невработеност и јавни работи, како и олеснување на пристапот до пазарот на трудот за младите, студентите, но и пензионерите, законот ќе им овозможи на лицата што се блиску до пензија да ја намалат работната обврска.
Конкретно, работниците постари од 58 години, како и оние со најмалку 35 години работен стаж, практично ќе може да изберат помеѓу слободен петок или скратен работен ден во траење од шест часа, потврдија од Министерството за труд, семејни и социјални прашања и еднакви можности за словенечките медиуми.
Според моделот наречен 80-90-100, што значи 80 отсто работно време, 90 % плата и 100 % уплатени придонеси – Словенија делумно ќе ги преземе искуствата на земји како Исланд, Ирска и Германија. Во овие земји ваквите закони довеле до позитивни ефекти, како зголемена продуктивност, помалку отсуства од работа и поголема ефикасност. Словенците веќе имаат неколку пилот-проекти, претежно во технолошки компании, кои покажале слични резултати.
Од Министерството за труд најавија дека, доколку измените се покажат успешни, ќе се оди во насока на дополнителна либерализација на прописите. До крајот на 2028 година се очекуваат и промени, како додаток за работа во сабота, задолжителен божиќен бонус за сите вработени, па дури и воведување 38-часовна работна недела.
Во оваа прва рунда на измени донесени се и други мерки. Така, од 2026 година невработените Словенци ќе имаат повисоки надоместоци за невработеност. Максималниот износ што ќе го примаат во првите три месеци по отказ или раскин на договорот за работа ќе изнесува 130 проценти од просечната минимална бруто-плата во државата, што моментно е нешто повеќе од 1.660 евра. Ако ни по три месеци, не најдат нова работа, ќе имаат право на 110, па 100 отсто, па сè до 70 проценти од просечната минимална бруто-плата.
Значајни промени и зголемени надоместоци ги очекуваат и учениците, студентите и учесниците во јавни работи, кои покрај повисоки минимални часовни тарифи, ќе имаат и подобрени работни услови. Планирани се и стимулации за вработување невработени лица постари од 59 години во износ од 40 проценти од месечниот нето-надоместок, а оваа категорија ќе има право на зголемен број дозволени часови за привремена или повремена работа. Месечното ограничување за работа на пензионерите се зголемува од 60 на 85 часа месечно, соодветно со зголемување на максималниот годишен приход.
Законот на крајот беше усвоен по итна постапка бидејќи неговото донесување беше услов за повлекување 140 милиони евра европски средства за оваа цел.