Градските власти на Атина стравуваат дека бројот на жртви во пожарите ќе се искачи над 100. Противпожарната служба соопшти дека прима стотици повици со пријави за исчезнати лица, па со тоа бројот на лица по кои се трага не може да се прецизира.

Според последните податоци на Пожарната служба, во пожарот во Атина загинале 74 лица, а 164 се повредени. Жртвите, меѓу кои има и деца, сè уште не се идентификувани.

Според тамошните медиуми, ваква огнена стихија не се памети изминативе десет години.

Шумските пожари избувнаа во западниот и источниот крај на Атина по високите температури, кои беа над 40 Целзиусови степени, и силниот ветер. Пожарникарите соопштија дека имало и над 150 повредени, некои од нив потешко и оти може бројот на жртвите да биде поголем. Грчкиот премиер, Алексис Ципрас, ја прекина посетата на Босна и Херцеговина и се врати во земјата, при што побара помош од Европската Унија и војската.

19.30 ч. Македонија ќе испрати 100 000 евра помош за Грција

Како приоритетни мерки, Владата на Република Македонија на денешната седница донесе одлука да испрати финансиска помош во висина од шест милиони денари до Владата на Република Грција за справување со катастрофалните пожари што овие денови ја зафатија пошироката околина на главниот град Атина, соопштија од Владата.

Дополнително, Владата донесе одлука да формира координативно тело кое на дневно ниво ќе ја следи состојбата и ќе координира соодветна хуманитарна помош, што ќе се договори како потреба со надлежните институции во Грција и со градот Атина.

19.05 ч – Грчките медиуми објавија дека се пронајдени уште две тела

17.15 ч – Грчкиот Црвен крст отвори сметка за поддршка на жртвите

Грчкиот Црвен крст отвори банкарска сметка на која луѓето и фирмите може да донираат средства за помош на лицата погодени од пожарот

17 ч – Одморалиштето Мати, ден по смртоносните пожари

16 ч – Застрашувачки видеа од пожарите во Атина снимени од авион

Колку е голем размерот и силата на смртоносните пожари што ја зафатија Атина и околината покажуваат видеата направени од авион и од хеликоптер кои се објавени на социјалните мрежи.

15.10 ч – Итна солидарна помош на Град Скопје за Атина

Градоначалникот Шилегов денеска телефонски разговараше со градоначалникот на Атина, Јоргос Каминис, и му изрази длабоко сочувство за загинатите граѓани во стихијниот пожар што ја зафати околината на Атина.

Градот Скопје ќе ѝ испрати милион денари помош на Атина за настраданите во пожарите. Ова е прва итна мерка на Градот Скопје и тој останува отворен за каква било помош доколку дополнително се побара.

15:29 – Помош и од Меркел

Германската канцеларка, Ангела Меркел, понуди денеска помош за Грција во борбата против пожарите што избувнаа во близина на Атина, јавија германските медиуми.

Во телеграмата со сочувство упатено до грчкиот премиер, Алексис Ципрас, Меркел наведе дека Германија цврсто стои покрај грчките пријатели.

13.49 ч – Путин понуди помош 

Рускиот претседател, Владимир Путин, изрази сочувство до грчките власти во врска со смртоносните пожари во земјата и им понуди помош за санирање на последиците, соопшти Кремљ.

13.20 ч – Тридневна жалост во Грција

Грчкиот премиер, Алексис Ципрас, прогласи тридневна жалост во Грција.

13.00 ч – Грчки доктор тврди дека луѓето во Мати загинале за само еден час

„Сè се случило за само еден час, дури и помалку. Дувал силен ветер и луѓето не можеле да реагираат. Тие се обиделе да побегнат кон морето. Во текот на целата ноќ жителите се обидувале да се спасат, качувајќи се во чамци. Се плашам дека бројот на жртви може да биде двојно поголем. Сè уште се трага по исчезнатите“, вели лекарот.

12.30 ч – Војската ги зајакнува патролите

Грчкиот совет за одбрана испрати специјално обучени членови на вооружените сили и на Националната гарда во помош на патролите за цивилна заштита за спречување на пожарите, пишува грчкиот портал „Катимерини“.

Министерот за одбрана, Панос Каменос, свика седница на Советот, откако ја надлета и од воздух ја виде состојбата во областа зафатена од пожарите. Советот одлучил грчките и сојузните дронови и летала да ѝ помогнат на цивилната одбрана во собирање податоци за состојбата од различни делови на земјата коишто се под ризик од пожари или од намерно подметнување огнови. Мерките се воведуваат по шпекулациите дека пожарите во источна Атика, како и неколку пожари во регионот на Коринт се подметнати.

12.15 – Бројот на мртви над 60

Најмалку 60 лица загинаа во шумските пожари кои од вчера го зафатија регионот источно од Атина.

12.00 ч – Новинар стигна до местото каде што изгореа 26 луѓе

„Ова е најужасната сцена што некогаш сум ја видел“, сведочи грчкиот новинар Костас Коукумакас, кој е на  местото на настанот во одморалиштето Мати, каде што во вила на 25 километри североисточно од главниот град беа пронајдени 26 запалени тела.

11.10 ч – Јункер вети помош 

Претседателот на Европската комисија, Жан Клод Јункер, разговараше со грчкиот премиер, Алексис Ципрас, и му ветил дека ЕК ќе ѝ помогне на Грција на секој можен начин. Јункер изрази и сочувство поради жртвите во пожарите во Грција.

11.04 ч – Снимка од авион

Грчкиот премиер, Алексис Ципрас, кој ја прекина посетата на Босна и Херцеговина поради големите пожари во околината на Атина, изјави дека ова е тешко време за Атика и за Грција. Според последните податоци, во пожарите настрадаа 54 лица, додека околу 150 се повредени.

10.45 ч – Нема повредени македонски државјани

Министерството за надворешни работи досега нема добиено информаци за македонски државјани кои се обратиле за помош во дипломатско-конзуларните претставништва во Грција, како засегнати од пожарите што ја зафатија Атика. Тие додаваат дека во овој момент се комуницира и со институциите од регионот на Атина, но и со засегнатите служби.

10.26 – Шпанија испрати два авиона 

Шпанската влада соопшти дека испратила два авиона во Грција за гаснење на пожарите со цел да им помогнат на грчките пожарникари. Шпанското Министерство за земјоделство соопшти дека секој од авионите може да носи по 5,5 тони вода.

9.45 ч – Пристигнува помош од Европа

Авиони за гаснење на пожарите во Грција пристигнуваат од Италија, Германија, Франција и Полска.

La Grecia brucia: https://t.co/yNXcc6UuJk
emergenza incendi vicino Atene, almeno 50 morti

??#Grecia #incendi #greecefire ?
Foto: Forecast Weathere Greece pic.twitter.com/zZdMnDpcmR

— 3B Meteo (@3BMeteo) July 24, 2018

9.27 ч – Пронајдени 26 изгорени тела

Во една вила во одморалиштето Мати, на 25 километри североисточно од главниот град, пронајдени се 26 запалени тела. Како што пренесува грчкиот Црвен крст, се претпоставува дека станува збор за членови на едно семејство, а повеќето од нив се пронајдени прегрнати.

9.09 ч – Прогласена вонредна состојба

Грките власти прогласија вонредна состојба во околината на Атина поради силните пожари што синоќа ја зафатија земјата.

9.01 ч – Спасени туристи од Данска  

Спасителите пронашле група од десет туристи од Данска, кои минатата ноќ, бегајќи од огнот, со чамец отпловиле во непознат правец.

9 ч – Македонија ќе испрати два авиона за гаснење на пожарите во Грција

Првиот човек на Дирекцијата за заштита и спасување, Аднан Џаферовски, вели дека од синоќа се во постојан контакт со центрите во Грција, каде што околината на Атина ја има зафатено огнена стихија каква што не се памети изминативе десет години.

8.52 ч – Повеќе од 300 пожарникари се борат со огнената стихија

Досега се спасени 80-ина луѓе, а во акциите за гаснење на пожарите се ангажирани над 300 пожарникари, со повеќе од 60 возила. Пожарникарите се борат да ја заштитат зоната околу летувалиште што се наоѓа североисточно од Атина.

Според зборовите на портпаролот на грчката влада, Димитрис Ѕанакопулос, 15 пожари избиле во исто време на три локации околу Атина.

8.20 ч – Грција бара помош од ЕУ

Грција побара помош од ЕУ, а Шпанија и Кипар сами ѝ понудија помош за справување со пожарите во кои изгореа над 100 куќи и повеќе од 200 возила.

8.07 ч – Пронајдени двајца од исчезнатите туристи

Грките медиуми јавија дека десет лица, најверојатно, туристи од Данска, исчезнале кога бегајќи од огнот, влегле во чамец и се упатиле во непознат правец. Грчката крајбрежна стража почна акција за нивно пронаоѓање и спасување, при што двајца се пронајдени, а по другите се трага.

7.55 ч – Населбата Мати веќе не постои 

„Мати повеќе не постои како населба. Видов тела, изгорени автомобили. Се чувствувам среќна што сум жива“, сведочат жителите на Грција за огнената стихија што ја зафати околината на грчкиот главен град Атина.

7.40 ч – Меѓу жртвите има и бебе

Извлечени се уште четири тела од водата, а меѓу жртвите има и шестмесечно бебе, кое, најверојатно, се задушило од чадот. Бројот на жртвите порасна на 24.

7.35 ч – Пожарот ги зафати регионите источно и западно од Атина

Пожари беснеат источно и западно од Атина поради што жителите мораа да ги напуштат своите домови.

Исто така, владата го затвори за сообраќај еден од главните автопатишта на релација Атина-Коринт, а ги запре и возовите што сообраќаат на тој дел од Атина. Еден од локалните градоначалници, Евангелос Бурнус, за „Катимерини“ сведочел дека видел како биле запалени повеќе од 100 дома и 100 автомобили.