Регион
Откриено кој му кажал на тројниот убиец каде се крие Низама чие убиство го зави Градачац во црно

Во медиумите на БиХ се појави тврдење дека лице поврзано со убиената Низама Хеќимовиќ од Градачац му открило на тројниот убиец Нермин Сулејмановиќ каде се крие со бебето, пишува Аваз.
Инспекторите, наводно, стасале до роднината преку мобилниот телефон на убиецот додека ги пребарувале неговите контакти, повици и пораки. Се испоставило дека Сулејмановиќ не само на денот на масакрот туку и денови пред тоа ја барал својата невенчана поранешна сопруга. Им се јавил на сите нејзини пријатели, блиски и подалечни роднини, па дури и отишол до нивните врати, пишува Аваз.
Роднината наводно признала дека од страв ја открила локацијата на Низама.
„Братучетката знаела дека Нермин е криминалец, наркодилер и насилник и се плашела од него. Од страв му признала каде се кријат Низама и бебето. Таа горко плачејќи му рекла дека мислела Нермин имал намера да ги одведе сопругата и бебето дома и дека му е жал што ја претепал Низама и дека никогаш повеќе нема да го направи тоа. Мислела дека Низама и Сулејмановиќ ќе се помират. Не ѝ паднало на памет дека ќе ја убие“, извор близок до истрагата изјави за Република.
Вчера беше откриено дека Сулејмановиќ планирал да се ожени со друга жена во среда на 16 август и да замине во Германија да отвори таму теретана.
Оваа информација за Аваз неофицијално ја потврдија од полициски кругови. Сулејмановиќ требало да се венча во Брчко, а неговата избраничка е од германски град.
Тој, покажа истрагата, по венчавката планирал да замине во Германија.
Потсетуваме дека во својот крвав поход тој ја уби својата невенчана сопруга Низама Хеќимовиќ и уште две лица, рани уште тројца, а потоа се самоуби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео/Фото) Србите и Унгарците одржаа заедничка воена вежба

Србија и Унгарија одржаа заедничка воена вежба „Соседи 25“ со цел зголемување на нивото на соработка меѓу армиите на двете земји и размена на борбени искуства, соопшти српското Министерство за одбрана.
Вежбата се одржа на воениот полигон Пасуљанске ливаде со учество на припадници на Првата бригада на српската армија и 30-та механизирана бригада на Унгарија.
За време на повеќедневната вежба, војниците заедно ги вежбаа дејствата на единиците во тактички операции, вклучително и употребата на современи борбени возила, комуникациски системи и опрема за собирање и обработка на разузнавачки информации.
Ова е десетта заедничка вежба наречена „Соседи“ што ја спроведуваат вооружените сили на Србија и Унгарија.
Регион
Во Бугарија и Романија на сила црвен метео аларм поради обилни дождови

Во Бугарија и Романија на сила е црвен метео аларм поради обилни дождови. Обилните дождови продолжија да ја погодуваат Бугарија, што доведе до затворање на патишта, прогласување црвен метео аларм во неколку области, а 51 населено место останаа без електрична енергија поради бурата. Надлежните органи го интензивираат надзорот над сите мостови и инфраструктура што е потенцијално оштетена од поплавите, пишува денес „Новините“. Службениците предупредија дека секоја локација што е изложена на ризик ќе биде веднаш затворена.
Граѓаните се повикуваат да бидат внимателни, да избегнуваат патувања и да ги следат упатствата на надлежните служби. Бугарскиот национален институт за метеорологија и хидрологија прогласи црвен метео аларм, највисоко ниво на предупредување, за осум области каде што се очекуваат повеќе од 65 литри дожд на квадратен метар, пренесува Танјуг.
Во исто време, властите објавија дека Бугарија ќе побара помош од Европскиот фонд за солидарност за погодените места поради предизвиканите штети.
Метеоролозите во Романија денес го продолжија црвениот временски аларм поради предвидените обилни врнежи од дожд за пет области и градот Букурешт со можност за врнежи до 140 литри на квадратен метар.
Според најновото предупредување на Романската национална метеоролошка управа (ANM), од 21 часот на 7 октомври до 15 часот на 8 октомври се очекуваат обилни врнежи од дожд во неколку области, пишува романската новинска агенција Аѓерпрес.
Фото: принтскрин
Регион
Убиен судија на Апелациониот суд, во судница во Тирана

Судијата Астрит Каљаја беше убиен денес во Апелациониот суд во Тирана додека траеше рочиштето.
Напаѓачот, засега непознат, влегол во судницата и го застрелал Каљаја, кој бил однесен во болница каде што му била пружена медицинска помош, објавува „Албанија пост“.
На местото на настанот, според медиумот, има бројни полициски сили, кои веднаш го уапсиле осомничениот сторител, а како што се наведува, идентитетот на напаѓачот и мотивите на нападот засега се непознати.
Судијата Астрит Каљаја служел со години во албанскиот судски систем, а неодамна во Апелациониот суд во Скадар.
Тој го поминал процесот на верификација во 2019 година, каде што бил потврден на функцијата од Независната квалификациска комисија, а потоа и од Специјалниот жалбен панел во 2022 година.
Фото: принтскрин