Регион
„Помогни ми тето“ – тетката ги раскажа последните моменти од животот на Назима која ја уби монструмот од Градачац

Регионот е се’ уште во шок по бруталното убиство на Низама Хечимовиќ, која минатиот петок беше брутално убиена од нејзиниот невенчан сопруг Нермин Сулејмановиќ откога го пријавила за семејно насилство, а убиството го пренесуваше во живо на социјалните мрежи.
Покрај Низама, Сулејмановиќ, кој со години сеел страв во Градачац, ги убил и Џенгиз и Денис Ондер, а тешко ја ранил Хариса Ондер. Пукал и во полицаец и во Недим Памуковиќ, син на тетката на Низама, Зијада Вуковиќ-Памуковиќ.
Зијада за „Дневни аваз“ зборуваше за последните часови од животот на Низама и ја раскажала драмата.
„Дојде, ја паркираше колата долу на патот. Не можеше да влезе во главниот влез. Тој испука неколку куршуми. Некако успеа да влезе во куќата и да ми стави пиштол на глава викајќи: „Каде е таа?“, изјави Зијада Памуковиќ-Вуковиќ.
Кога неговата сопруга Низама сфатила дека дошол, се сокрила во собата на синот на тетка си и се заклучила.
„Тука го испука куршумот, не можеше веднаш да влезе во собата. Се шеташе низ куќата. Не се сеќавам дали прозорецот беше отворен. Успеа да ја скрши вратата и да влезе во просторијата во која се наоѓаше Низама. Го рани син ми Недим во ногата и го избрка надвор. Излегов со синот надвор, повикав полиција, плачев“, изјави Зијада.
Нермин Сулејмановиќ го зел бебето и го однел до автомобилот. Тој потоа се врати во куќата каде што се уште била Низама.
„Имаше врескање, драма, тој ја тепаше… Јас плачев и викав помош. Кога излегоа од дома, тој ја влечеше Низама за коса, тоа никогаш нема да го заборавам. Застана на сред пат и плачеше, ме погледна и ми рече: „Помогни ми тето.“ Не можев да и помогнам. Ме викаше, молеше за помош“, рече Памуковиќ-Вуковиќ.
Таа вели дека Низама побарала заштита од полицијата, судот и пријателите на Нермин.
„И сега кога доаѓам дома го гледам на врата со пиштол и го гледам моето дете облеано во крв. Со нас се чувствуваше најбезбедно“, рекла тетката на Низама.
Кој му кажал каде е Низама?
„Не знаеме кој е, но знаеме дека бил во врска со полицајка. Не знам ни дали кажала, немам доказ, но знам дека била со него. Јас лично слушнав кога и кажа дека е во врска со неа“.
Застрашувачка закана
„Нермин ѝ рекол, секогаш кога ќе излезам со неа, кога ќе дојдам дома, ќе те претепам. Затоа повеќе не можеше да го праша Нермин за неа. Имаше нивни слики, па Нермин ги бришеше, ја тепаше“, открива Зијада Вуковиќ-Памуковиќ.
Тетката тврди дека во една од расправиите што започнале кога Низама дознала за врската помеѓу Нермин и полицајката, тој и рекол: „Прво ќе го убијам детето. Ќе го гледаш, а потоа ќе те убијам, а потоа ќе се вратам и ќе ги убијам сите што те поддржуваа“.
Во Универзитетската болница во Тузла се наоѓа синот на Зијад и Самир, Недим, кој беше ранет од Нермин Сулејмановиќ.
„Го посетивме. Добро закрепнува. Наскоро му треба домашно лекување. Траумата ќе му остане, како и сите нас, до крајот на животот“, рече Зијада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Поевтини цени на околу 25 видови производи ќе има во Србија во следните шест месеци

Во Србија од утре и во следните шест месеци, цените на околу 25 видови производи треба да бидат пониски, бидејќи Владата, со усвојување на Уредбата за посебни услови за вршење трговија за одредени видови стоки, ги ограничи маржите на до 20 проценти. Новите правила ќе важат за сите трговски субјекти кои во 2024 година оствариле приходи од над 4,5 милијарди динари или околу 38 милиони евра, што значи дека сите трговски синџири ќе мора да ги применуваат, а некои од нив лани имале повеќе од една милијарда евра профит.
Министерот за финансии на србија, Синиша Мали, изјави дека од утре, цените на 20.000 производи од 23 категории ќе бидат намалени на полиците на сите малопродажни синџири, како што е предвидено со уредбата на Владата за ограничување на маржите.
„Очекуваме намалување на цената од 10-15-20 проценти во просек, во зависност од тоа колку била маржата на одреден производ претходно. Важно е да не станува збор само за неколку производи, туку за целиот асортиман на храна што сите ја купуваме секој ден“, рече Мали во интервју.
Тој изјави дека анализата утврдила дека цените на прехранбените производи, безалкохолните пијалоци и сличните производи во голема мера го диктираат нивото на инфлација и дека тоа мора да се ограничи.
Српскиот претседател Александар Вучиќ и министерката за трговија на Србија, Јагода Лазаревиќ, објавија дека морала да се дополнува Уредбата бидејќи одредени трговски синџири се обиделе да најдат начин да ги заобиколат новите правила.
„Прерано почнаа со трикови. Мислат дека се доволно мудри за да ја измамат државата“, рече Вучиќ, коментирајќи ги реакциите на малопродажните синџири на ограничените маржи.
Како што објасни Вучиќ, трговците барале од добавувачите да ги зголемат цените за 14 до 20 проценти пред да стапи во сила Уредбата, а разликата подоцна да ја вратат преку попусти. На тој начин, трговците би ја пресметале маржата на новата, вештачки зголемена цена и би ги избегнале потенцијалните загуби што можат да настанат поради Уредбата. Во исто време, на тој начин формално би ги исполниле барањата, но со иста заработка како и претходно.
Попустот, патем, е попуст што добавувачите или производителите му го даваат на трговецот, најчесто при купување одредена количина стока.
Вучиќ додаде дека трговците на мало им кажуваат на добавувачите дека ќе ја повлечат својата стока од полиците ако не го исполнат овој услов. Иако не прецизираше за кои пазари станува збор, тој ги замоли луѓето од „трите најголеми малопродажни синџири“ доколку се одговорни, „да не се обидуваат да ја поразат државата“ и „да не мислат дека се многу паметни, а ние сме многу глупави“.
Вучиќ додаде дека на трговците им е дозволено да имаат маржа од 20 проценти, но сепак, според него, трговците сега сакаат да ги пресметуваат логистичките трошоци по стапка од 10 проценти. Тие логистички трошоци, патем, ги претставуваат сите трошоци направени при набавка на стоки, како што се транспорт или складирање во магацин.
Министерката Лазаревиќ рече дека сите во Министерството „биле шокирани“ што на денот на усвојувањето на Уредбата за посебни услови за вршење трговија за одреден вид стока, некои трговски синџири „започнале со сериозен притисок врз своите добавувачи“, инсистирајќи на склучување анекс на договорот, за да направат одредени корекции, и тоа пред да стапи во сила Уредбата.
Токму поради тие притисоци, е изменета и Уредбата.
Како што објави Министерството за трговија по вонредната седница на Владата на Србија, промените го ограничија попустот за логистика и другите надоместоци. Така, Уредбата за посебни услови за вршење трговија за одреден вид стока сега содржи одредби со кои се ограничува „логистичкиот рабат“ и „надоместокот за недостиг на стока и отпис на стока“ на три и еден процент, соодветно.
Уредбата за посебни услови за вршење трговија за одреден вид стока предвидува дека ограничувањето на маржите до максимум 20 проценти се однесува на околу 25 видови производи кои треба да имаат пониски цени во продавниците почнувајќи од утре.
Регион
(Видео) Силна бура го парализираше црногорското приморје, најкритично во Котор

Силна бура го погоди црногорскиот приморски појас утрово, оставајќи го Котор и околните градови под тежок пороен дожд. Которскиот Залив е целосно погоден од силниот дожд и ветрови, а морето е разбрането, со големи бранови кои се спојуваат со сивото небо.
Туристите, кои вчера уживале во пливање, денес се соочуваат со потполно нестабилни услови.
„Колку и да уживавме во пливањето вчера, денес можеме да пливаме на улица“, изјавил еден од нив.
Ситуацијата е особено критична во близина на Вирпазар, каде што сообраќајот е прекинат поради несреќа, објави РТЦГ. Локалните власти апелираат на внимание и ги советуваат граѓаните да ги следат предупредувањата за безбедност.
Регион
(Видео) Драма на скопскиот аеродром: Aвион од Крит со 200 лица слета во Скопје наместо во Белград

Патници на авиокомпанијата „Виз ер“ кои требаше да летаат од Крит за Белград, наместо тоа завршија на аеродромот во Скопје околу 4 часот утрото, пренесува N1.rs.
Летот, кој бил закажан 15 минути по полноќ, првично бил пријавен како празен, што ги изненадило и полицијата и вработените на скопскиот аеродром.
Јелена, една од патничките, изјавила дека околу 200 лица излегле од авионот, без претходна информација за пренасочувањето. Патниците најпрво добивале СМС-пораки за одложување, а потоа, во 4:20 часот, полетале кон Скопје. На аеродромот биле задржани во авионот подолго време, а не им било дозволено да излезат сè додека една жена не почувствувала влошување на здравјето. На крајот, патниците останале на празен аеродром додека не им бил обезбеден автобус за Белград.
Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле целосно збунети бидејќи им било пријавено дека авионот е празен. Патниците се обратиле и до Амбасадата на Србија, но добиле одговор дека не може ништо да се стори, со образложение дека „аеродромот во Белград не работи и не прима авиони“.
Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На веб-сервисот FlightRadar се забележува дека авионот наместо во Белград, слетал во Скопје, без објаснување за причините.