Регион
Приштина набрзина го менува законот за попис поради српските општини

Властите во Приштина имаат намера многу бргу да го променат законот за попис на населението за наесен да се спроведе попис во четири општини на северот од Косово со мнозинско српско население, пренесува „РТ Балкан“.
Првиот човек на Агенцијата за статистика на Косово, Илир Бериша, изјави дека поради оставките на градоначалниците на четири општини на северот од Косово и поради тоа што не биле навреме доставени предлозите за членови на комисиите, не биле формирани општински комисии, кои како што налага сегашниот закон мора да бидат активни шест месеци пред почетокот на пописот.
Градоначалниците на Северна Митровица, Звечан, Зубин Поток и Лепосавиќ поднесоа оставки лани во ноември, новоизбраните градоначалници сè уште немаат положено заклетва, а почетокот на пописот е закажан од 1 до 16 септември, па законот за попис мора итно да се смени за да се формираат комисии и се да се вклопи во правните норми на државата.
Бериша вели дека законот многу бргу ќе биде испратен за дополнување, со кое ќе се предвидат случаи во кои рокот од шест месеци нема да се однесува на локалните избори бидејќи законот предвидува да не се одржуваат локални или централни избори шест месеци пред пописот, а во Косово имаше локални избори во четири општини.
Последниот попис во Косово е одржан во 2011 година, а според тогашната статистика на Приштина, во земјата живееле 1.739.825 жители, од кои 1.616.869 или 93 % Албанци и 25.532 или 1,47 отсто Срби.
Ваквите податоци се резултат на тоа што во четирите општини на северот од Косово за кои Приштина сега го менува законот пописот не е ни спроведен, а во српските енклави јужно од Ибар, Србите само делумно учествувале на пописот, односно се попишале само малку повеќе од 25.000.
Според пописот од 2011 година, Србите биле мнозинство во 10 општини во Косово: во четири на северот – Митровица, Звечан, Лепосавиќ, Зубин Поток – и во шест јужно од Ибар – Штрпце, Грачаница, Клокот, Ранилуг, Партес, и Ново Брдо.
Според процените на ОБСЕ од 2013 година ОБСЕ, во Косово живеат повеќе од 140.000 Срби. Според други процени, во Косово живеат околу 100.000 Срби, од кои 40 отсто живеат на северот и 60 отсто јужно од Ибар.
Претседателот на Србија, Александар Вучиќ, во едно обраќање од 2019 година изјави дека во 2017 година во Косово живееле 94.998 Срби, од кои 47,1 % живееле во четирите општини на северот, а 52,8 отсто јужно од Ибар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Кралски питон снимен на улица во Загреб

Во загрепската населба Кајзерица вчера вечерта човек наишол на кралски питон како талка по улицата. Ја снимил змијата и го објавил видеото во соседските групи во обид да го пронајде нејзиниот сопственик.
Еден од членовите на групата вклучен во безбедното враќање на змијата потврдил за „Дневник.хр“ дека сопственикот е пронајден.
„Ја најдовме сопственичката и змијата ќе ѝ биде вратена. Пред да ја најдеме сопственичката, стапив во контакт со Зоолошката градина во Загреб. Од таму ни кажаа дека можеме да им ја доставиме змијата, но бидејќи сопственичката во меѓувреме ни се јави, проблемот е решен“, рече тој.
Регион
Пицула: Србија живее во вонредна состојба, се плашам од 17-та жртва

Европратеникот Тонино Пицула, известувач на Европскиот парламент за Србија, коментира за тековните протести во Србија за „Н1“, како и за најновите настани поврзани со војната во Украина и за обидот за наоѓање мирно решение.
„Ми се чини дека Србија живее во вонредна состојба не само во последните еден или два месеца туку и подолго. Не е прогласена, но со текот на времето сите протагонисти со своите постапки покажуваат дека Србија е во ситуација во која некои стандардни механизми, што помагаат во решавањето на внатрешните конфликти во демократиите, не постојат“, рече тој на почетокот.
„Ова е еден вид институционална блокада. Ова не функционира во Србија со месеци и подолго. Ова е сериозна ескалација на насилството, што, имам чувство, почна по масовниот митинг на 18 јуни кога режимот на Александар Вучиќ ги извади ракавиците и почна да користи сила во поголема мера, не дека тоа не го правел претходно“.
Пицула исто така го изрази својот најголем страв кога станува збор за ескалацијата на насилството во Србија.
„Се плашам од 17-тата жртва. Зборуваме за 16 лица, кои ги загубија животите кога падна настрешникот на 1 ноември минатата година. Доколку овие конфликти доведат до нова жртва, можеме да зборуваме за уште поголема ескалација, што може да биде фатална“.
Каков е односот на Европската Унија кон претседателот Вучиќ?
„Во моментот ЕУ нема мотив, ниту капацитет да се однесува поинаку кон малигниот режим на Александар Вучиќ. За разлика од Украина, во ЕУ недостига компонента на единство, што би претставувала притисок, што би довел до компромис и можеби до одење на избори. Европскиот парламент е многу осамена институција во архипелагот на европски институции, што е многу критична кон Србија“, додаде Пицула.
Со кого може да се разговара тогаш во Србија?
„Ова е многу сложена ситуација и тешко е да се даде јасен одговор. Би било добро ако разговараат едни со други во Србија. За да се обезбеди мирна транзиција, да се најде компромисен механизам за да се стигне до избори. Сепак, проблемот е што изборите во Србија се случуваат релативно често. Вучиќ прибегнуваше кон избори секојпат кога проценуваше дека може да добие дополнителен легитимитет. Мислам дека имаше само два или три редовни циклуси, сè друго беа вонредни циклуси“.
„Треба да бидеме целосно јасни тука и да кажеме дека во Србија сè што е против Вучиќ не е нужно и за Европа во исто време, таму постои хетерогеност, што ја комплицира ситуацијата“, вели европратеникот.
Тој тврди дека сè уште нема обединет фронт во ЕУ што ќе изврши вистински притисок врз претседателот на Република Србија.
фото: принтскрин
Регион
(Видео) Автобус со српски туристи каменуван во Грција, има повредени

Автобус со 38 српски туристи бил каменуван синоќа на автопатот Егнација во Солун.
Според полицискиот извештај, инцидентот го предизвикале четири лица, најверојатно малолетници, пишува „Прототема“.
Θεσσαλονίκη: Επίθεση με πέτρες σε τουριστικό λεωφορείο – 3 τραυματίες
Άγνωστοι, πέταξαν πέτρες σε τουριστικό λεωφορείο με αποτέλεσμα να σπάσουν τα τζάμια και να τραυματιστεί ο οδηγός, και δύο επιβάτες – Το συμβάν σημειώθηκε στα διόδια Ωραιοκάστρου στη Θεσσαλονίκη.#ingr #innews pic.twitter.com/M3l3Ft1yv8
— in.gr/news (@in_gr) August 21, 2025
Во нападот врз автобусот, во кој се превезувале српски туристи, кои се враќале од одмор, неколку прозорци биле скршени со камења.
Двајца патници и еден од возачите добија полесни повреди, објавува „Катимерини“.
Полицијата приведе две лица во врска со инцидентот, но не биле утврдени докази против нив и лицата биле ослободени.