Регион
Обелоденето сведочењето на мајката на двегодишната Данка
Родителите на двегодишната Данка Илиќ беа сослушани во текот на истрагата во Вишото јавно обвинителство во Заечар, а нивните изјави беа вклучени во обвинението против Дејан Драгијевиќ, Срѓан Јанковиќ и таткото на Драгијевиќ, Радослав Драгијевиќ.
„Телеграф.рс“ го поседува обвинителниот акт, кој сè уште не е потврден и е предмет на промена со оглед на тоа што е можно судот да го врати на измена. Мајката на девојчето, Ивана Илиќ, беше сослушана во Обвинителството на 17 април, а „Телеграф“ ја објави нејзината изјава.
Таа пред Обвинителството изјави дека планирала да оди во Општината за да поднесе барање за породилно отсуство. Ги повикала свекорот и свекрвата да ги чуваат нејзините две деца.
„Не можам да се сетам дали сум им се јавила тој ден или претходниот. Мислам дека им се јавив на телефон. Дојдоа од 9.30 до 10 часот и веднаш се спремив и отидов во Општина Бор, од каде што тргнав околу 10.45 часот, по пет до 10 минути си заминаа свекорот и свекрвата, а јас останав со децата.
Јас го чистев станот со син ми, а Данка си играше цело време. Кога завршив со средувањето на станот, седнав на подот и си играв со децата. Не знам колку траеше таа игра, на син ми му беше досадно, а кога му е здодевно, сака да излезе“, вели таа.
Рекла дека го прашала синот дали сака да си игра со топка, на што тој одговорил потврдно, па решила со децата да оди во Бањско Поле.
„Таму живеев како дете во 2013 и 2014 година додека не почина мајка ми. Целото мое семејство живееше таму – мама, тато, брат ми и јас. Му се јавив на татко ми и го прашав дали е таму, на што тој ми одговори – не, но слободно можам да одам со моите деца бидејќи е исчистено, а тој сечел гранки и трње“, рече таа.
Таа рече дека мисли оти со децата заминала за Бањско Поле околу 12.45 или 12.50 часот, дека ги ставила децата во автомобилот, дека потоа му се јавила на сопругот и го известила за своите планови.
„Возев до Бањско Поле, излегов од автомобилот, ја отворив капијата, се вратив во него и отидов зад куќата, каде што се наоѓа ливадата. Сето ова беше околу 13.06 или 13.07 часот. Мислев децата може тука да си играат“, рече таа.
Рекла дека ги фотографирала децата, „но Данка веќе се упатувала кон патеката што води до тумбата во дворот, која била на пет-шест метри од совозачката врата на автомобилот“, вели Ивана Илиќ.
„Кога ја видов Данка на таа патека, беше на метар од почетокот на ридот и на самата патека.
Данка одела со трчање, не одеше бавно, а не трчаше ниту бргу. Таа тој ден имаше 22 месеца. Данка го преминала ридот и свртела лево кон купот гранки од левата страна на патеката.
Бев околу еден и пол метар зад неа. Кога стигна до купот гранки, јас бев зад неа и Данка направи круг околу него и потоа отиде до автомобилот. Мојот син беше со мене цело време и ја држеше топката“, рече таа.
Таа рече дека децата цело време биле пред автомобилот и трчале.
„Седев на тулите додека ги фотографирав, а потоа го ставив мобилниот телефон во џебот и продолжив да ја шутирам топката со син ми, а Данка цело време трчаше, доаѓаше до нас, ја земаше топката фрлајќи ја и се смееше.
Најдалеку што се оддалечив од нив беше три метри и тоа беше пред возилото, каде што беа и тие. Игравме 10-ина минути додека син ми не побара вода. Видов дека Данка повторно се качува на ридот и дека е на околу пет метри од автомобилот, односно на самиот почеток на патеката што ја опишав“, раскажува таа.
Таа опишала дека син ѝ бил до неа кога отишла да земе вода во автомобилот и дека сè траело околу две минути.
„Кога го кренав погледот кон ридот, видов дека ја нема. Почнав да ја викам, погледнав во ливадата каде што си играа, а кога сфатив дека ја нема, го фатив син ми за рака и почнавме да ја бараме по патеката на ридот. Поминавме низ отворена капија, која беше на еден или два метра од ридот“, рече таа.
Таа додала дека му се јавила на сопругот околу 13.42 часот и му рекла дека Данка не е таму. Таа го завршила повикот со него и веднаш повикала полиција, се вели во соопштението, по што повторно се движела по споменатата патека.
„Видов паркиран бел автомобил, на кој пишуваше ‘Водовод’. Едниот човек, кој не можам да го опишам, беше на возачкото место, а другиот на левата страна од капијата. Не можам да го опишам ни него бидејќи ми беше свртен со грбот. Останав и до две минути и за тоа време човекот се врати во автомобилот и седна на совозачкото седиште, а потоа си заминаа“, изјавила мајката на Данка.
Таа рече дека не знае зошто не ги прашала дали ја виделе Данка, мислела дека девојчето е во близина и дека ќе дојде, дека е исплашена и дека не ѝ паднало на памет да ги праша за Данка. Кога возилото на „Водовод“ се оддалечило, вели таа, се упатила кон главната капија за да види дали Данка паднала во блиската бара.
„Кога видов дека детето не е во барата, се вратив во дворот со син ми. На враќање го видов соседот. Го видов мојот сопруг како пристигнува со службеното возило, тој беше на совозачкото седиште, а возеше неговиот колега. Дојде полициска патрола и почнавме да ја бараме. Разговараа со мојот сопруг, а потоа полицијата побара засилување. Луѓето почнаа да се собираат и да ја бараат Данка. Дојдоа свекорот и свекрвата и во периодот од 14 до 14.30 часот го оставив син ми кај нив и продолжив да ја барам Данка на блиските ливади по што се вратив во дворот и разговарав со инспекторите“, додаде таа.
Додала дека Данка немала навика да ги напушта родителите. Таа рече дека Данка не се плаши од странци.
„Данка, освен мене, ја чуваше и мојот сопруг, неговите родители и татко ми, ја чуваше и снаа ми. Немаме непријатели. Не ги познавам осомничените и никогаш не сум ги видела“, заклучи таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Продолжува да сведочи момчето-убиец од Рибникар: прашања ќе му поставуваат родителите на децата што ги убил
Во зградата на Специјалниот суд во Белград денеска продолжува судењето на Милјана и Владимир Кецмановиќ, родителите на момчето Коста што уби девет ученици и обезбедувањето во основното училиште „Владислав Рибникар“.
Момчето убиец и денеска продолжува да дава исказ во постапката. Со оглед на тоа дека за време на масакрот имал 13 години, нема да сноси кривична одговорност за своето дело. Денеска ќе му поставуваат прашања родителите на убиените деца, пренесува Нова.рс.
Распитот на Коста почна на рочиштето што се одржа пред десет дена, а продолжува и денеска. Момчето на првиот распит одговараше на прашањата на судот, обвинителството, адвокатот и оштетените. За време на сведочењето Коста К. изговорил реченица која ги оставила во неверување родителите на убиените деца, пишува српски Телеграф.
„Чувствував дека другите деца ме отфрлија и затоа ги убив. Тој 3 мај донесов пиштол за да го направам тоа, но се уште не бев сигурен дека ќе пукам“, изјави Коста К.
„Мајка ми постојано бараше да бидам најдобар. Се лутеше и викаше кога не бев најдобар. Бидејќи постојано бараше повеќе од мене, јас бев лут на неа. Нејзиното однесување влијаеше на мене да го направам тоа што го направув. Да ги немав пиштолите на татко ми, немаше да го сторам ова“, рекол во судот Коста К., пренесува Блиц.
Прашања до момчето-упиец поставил и главниот јавен обвинител на Вишото јавно обвинителство во Белград, Ненад Стефановиќ, а ова е првпат шеф на обвинителство во Србија директно да учествува во процесот.
Во еден момент, како што пренесува Телеграф, очигледно му се слошило, односно лицето видно поцрвенело кога мајката на убиеното момче му поставувала прашања. Лекарите во зградата на Специјалниот суд му го измериле притисокот и потоа продолжил распитот.
Според неофицијални информации кои претходно беа објавени во медиумите, Коста пред обвинителството изјавил дека на 3 мај минатата година во 08:02 часот во дневната соба го фотографирал оружјето на неговиот татко, а потоа го ставил во ранецот и отишол на училиште, планирал да задоцни на првиот час за секој да биде во училницата кога ќе пристигне.
Тој нагласи дека кога стигнал до училиштето се двоумел и размислувал да се врати дома.
„Сакав да разговарам со мајка ми и да си одам дома, но во тој момент ми пријде чуварот и ме праша дали сакам да влезам во училницата. Имаше уште две минути до ѕвончето. Реков дека ќе почекам, но до тогаш бев веќе под стрес ме фати паника и го гледав како закана, можеби во смисла дека може да ме спречи да се вратам дома“, рече тој.
Според неговото сведочење, тоа било повод за да пука во училишниот чувар, по што влегол во училиштето и пукал во учениците. Во обвинителството опиша и што направил откако пукал во училиштето. “Имав уште куршуми, не знам зошто престанав да пукам. Скокнав низ прозорецот и повикав полиција. Мислев дека е правилно да се предадам. Се плашев дека некој ќе ме повреди или убие”, рече момчето.
Регион
„Плачеше, викаше дека ја нема Данка“: таткото на убиеното девојче во Обвинителството раскажа за исчезнувањето на детето и за обвинетите
Во текот на истрагата за исчезнувањето на Данка Илиќ беа сослушани повеќе од 20 сведоци, а покрај обвинетите и сведоците, во Обвинителството беа сослушани и родителите на девојчето. „Телеграф.рс“ го објави сведочењето на таткото на Данка, Милош Илиќ.
Исчезнувањето на Данка било пријавено на 26 март, а таткото бил сослушан во Обвинителството на 17 април.
Тој рече дека на денот на нејзиното исчезнување бил на работа и работел на нива во местото Слатина, како и дека знаел оти сопругата Ивана треба да оди во Општината за да провери „нешто поврзано со детски додаток и дека мисли дека тоа било околу 10 часот“.
Тој рече дека не знаел колку е часот кога му се јавила сопругата да му каже дека со децата оди во Бањско Поле.
„Таму живееше додека не ѝ умре мајка ѝ. Не знам точно која година умре бидејќи јас и Ивана тогаш не бевме заедно. Околу 13.10 часот сопругата ми испрати фотографии од децата како си играат. Децата беа до автомобилот и мислам дека на сите фотографии беа и ќерката и синот“, рече тој и продолжи:
„Околу 13.40 часот ми се јави, плачеше и викаше дека Данка ја нема, а јас прашав зошто Данка ја нема. Таа рече дека зела шише од автомобилот за синот да пие вода и дека кога се свртела наоколу, Данка не била таму, ѝ реков да се јави во полиција и веднаш заминав од Слатина за Бањско Поле“, изјави тој во Обвинителството.
Тој рече дека не знае со која брзина стигнал до Бањско Поле бидејќи го возел колега во службено возило.
„Дојдовме на улицата каде што се наоѓа куќата на семејството на Ивана и во неа наидовме на автомобил ‘фиат панда’, колегата го запре автомобилот, го спушти прозорецот и двајцата прашавме дали виделе мало девојче во јакна во маслинесто-зелена боја, со врзана коса наназад. И двајцата одговорија дека не ја виделе. Не видов дали возилото има ознака ‘Водовод’. Мислам дека задните стакла на возилото беа затемнети и дека човекот што возеше е сед и ќелав, а сопатникот е постар маж со седа коса, така ми изгледаше“, додаде тој.
Рече дека биле под адреналин и дека го продолжиле патувањето кон куќата пред која неговата сопруга си играла со децата.
„Ѝ реков да остане со синот, а јас да ја барам Данка. Ивана рече дека го бара детето во дворот, а јас продолжив понатаму. Набргу дојде полициска патрола, а потоа засилување и ни забранија да се движиме затоа што тргнаа во потрага по Данка“, рече тој и потоа додаде:
„Ивана ми кажа следниот ден дека видела двајца мажи како стојат покрај капијата и гледаат нешто во дворот. Не ми кажа дека видела нешто друго, освен луѓе. Учествував во потрагата додека полицијата не ми рече да седнам во дворот за да не се наруши потрагата бидејќи донеле кучиња“, рече тој.
Тој рече и дека Данка е повлечено дете и дека најмногу била врзана за својот брат.
„Таа сакаше цуцли и розови ќебиња. Одеше на една година, имаше ситен од. Сакаше да гледа сè, да ползи под столот и масата, креветот… Таа не зборуваше, но знаеше да промрмори мама и брат“, рече тој.
„Секогаш го користевме слободното време да излеземе со децата за да си играме со топката. Ден пред да се случи ова, бевме во Зоолошката градина во Јагодина. Не забележав дека сака да биде со други луѓе, дури ни со мајка ми, која најмногу се грижи за неа. Некогаш сакаше да остане со неа, а некогаш не“, додаде тој.
Тој раскажа и дека децата најмногу ги чувале неговите родители.
Тој додаде дека тој и сопругата немаат непријатели и дека имале добар брак.
„Не ги познавам осомничените и никогаш не сум ги видел“, рече тој и дополнително го опиша изгледот на своето дете.
Претходно, српските медиуми го обелоденија и сведочењето на мајката на Данка.
Регион
Се огласи Клиничкиот центар во Сараево за смртта на девојчето по вадење заб
Шеснаесетгодишно девојче почина на Клиничкиот центар на Универзитетот во Сараево (КЦУС) кога доживеа тешки компликации при стоматолошка процедура во приватна ординација во Сараево.
Во врска со овој трагичен настан КЦУС излезе со соопштение.
„Колективот на КЦУС изразува искрено сочувство до семејството по повод овој немил настан, смртта на шеснаесетгодишно девојче. Како професионалци, колку и да сте подготвени, смртта е секогаш тежок удар, особено кога станува збор за млад човек. Поради оваа причина, раководството на КЦУС и Министерството за здравство на кантонот Сараево побараа да се спроведе внатрешен стручен надзор над целокупниот третман на пациентот со цел да се утврдат сите околности и точниот тек на лекувањето“, пишува во соопштението на КЦУС, пренесуваат медиумите во регионот.
Во написите потсетуваат дека по извршена стоматолошка процедура во приватна ординација, девојката добила сериозни компликации поради што итно била префрлена во КЦУС. И покрај сите напори на лекарскиот тим да ѝ го спасат животот, таа починала.
Точната причина за смртта ќе биде утврдена по обдукцијата, а од Обвинителството на кантонот Сараево потврдија дека се поведени истраги во врска со овој случај.
„Постапката е во тек, се преземаат дејства со цел да се утврдат сите околности на смртта. Со оглед на тоа дека се работи за малолетно лице, Ообвинителството во моментот не може да даде повеќе информации“, велат од обвинителството за „Н1“.