Регион
Револт во Германија поради новите правила за работниците од Западен Балкан, меѓу кои и македонските

Идната Демохристијанско-социјалдемократската влада планира да инвестира 500 милијарди евра во наредните години во реконструкција на дотраената инфраструктура: железници, патишта и мостови. Во исто време, има намера да се фокусира на уште еден итен проблем, а тоа е недостатокот на станови во Германија, пишува Дојче веле.
Но, за тие планови, покрај пари, ќе бидат потребни и многу работници, квалификувани и неквалификувани. Токму во овој сектор Правилото за Западен Балкан, воведено во 2016 година, ги покрива потребите на германскиот пазар на труд во последните години бидејќи, за разлика од другите програми за имиграција на работна сила, Правилото за Западен Балкан не ја условува квалификацијата, туку само договорот за вработување на германскиот работодавач. Ова и овозможи на градежната индустрија особено да вработува неквалификувани работници кои исто така се дефицитарни на германскиот пазар на труд.
Погрешна и штетна одлука
Минатата година, социјалдемократско-зелено-либералната влада, во екот на имиграциската либерализација, ја зголеми годишната квота како дел од правилото за Западен Балкан од 25 на 50 илјади работни дозволи годишно. Но, во својот коалициски договор, идната влада минатата недела повторно ја намали таа квота на 25.000 годишно.
Сега многу работодавци се прашуваат која е причината за ова намалување.
„Правилото за Западен Балкан се покажа како испробан инструмент за регрутирање работна сила без прекумерна бирократија, што инаку е реткост во секторот за миграција“, изјави за „Штутгартер цајтунг“ заменик-директорот на Германската индустриска и трговска комора, Ахим Деркс. Затоа одлуката на идната влада повторно да ја преполови квотата за Западен Балкан, според него, оди во погрешна насока.
Тим-Оливер Милер, директор на Централната асоцијација на германската градежна индустрија, дели слично мислење. Тој за „Штутгартер цајтунг“ изјави и дека намалувањето на годишната квота особено влијае на градежната индустрија.
„Значаен дел од странските работници на германските градилишта доаѓаат од некои од земјите на поранешна Југославија… сегашната одлука за намалување на овој контингент е изненадувачка и штетна за индустријата. Особено ако се земат предвид планираните инфраструктурни проекти кои ќе ја зголемат побарувачката за работна сила“, вели Милер.
Зошто да се намалат квотите?
Намалувањето на квотата нема да влијае само на големите инфраструктурни проекти, туку и на станбената изградба, смета Аксел Гедашко, директор на чадор-асоцијацијата за изградба на станови (ГдВ).
„Ако протокот на работници од Западен Балкан се преполови, тоа би можело да го влоши недостигот на работна сила на градилиштата“, смета Гедашко.
Ниту Јан Даненбринг од Централното здружение на германски занаетчии (ЗДХ) не ја разбира причината за намалувањето на контингентот.
„Федералната влада неодамна ја удвои оваа квота и сега ја враќа назад иако околностите во споредба со минатата година не се променети“, вели Даненбринг, исто така за „Штутгартер цајтунг“ и заклучува: Ако сакаме да промениме нешто во секторот за домување, ќе ни треба секој човек.
Негативни коментари и недоволно разбирање за одлуката на идната влада за правилата за работниците од Западен Балкан доаѓаат и од редот на експертите за пазарот на трудот. Херберт Брикер од Институтот за истражување на пазарот на труд (ИАБ) смета дека потегот на владата испраќа погрешен сигнал. Тој посочува дека вработувањето на Западен Балкан досега се покажало како успешен механизам.
„Од 95 до 98 отсто од оние кои пристигнале во Германија како дел од ова правило се вработени една година по нивното пристигнување во Германија и редовно ги плаќаат своите придонеси“, заклучува Брикер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Милановиќ: Никој нема да влезе во ЕУ, можеби само една земја, другите ги мамат со лажни ветувања

Хрватскиот претседател Зоран Милановиќ денеска изјави дека ниту една земја нема да влезе во Европската унија, освен можеби Црна Гора, и дека другите земји се измамени со „лажни ветувања“.
„Никој нема да влезе во Европската унија, можеби уште и Црна Гора, а другите држави се залажуваат со лажни ветувања дека ќе станат членки на ЕУ за да изнудат некакви отстапки. Од другите се очекува да ја потчинат својата надворешна политика на европските интереси, што е пресметката со Москва. Така се работи и со Грузија, која има силен економски раст благодарение на нејзината географска локација“, рече Милановиќ на предавање пред студентите на Универзитетот Север во Копривница, пренесува Индекс.
Зборуваше и за глобалните предизвици и политичкиот амбиент, а пред се за војната во Украина, за која рече дека е „војна на трошење“, а не позициона војна како Првата светска војна.
„Таа војна можеби ќе беше избегната доколку претенциозноста на европскиот начин на размислување не ја прогласеше тезата дека секоја земја има право да одлучува во кој воен сојуз или асоцијација ќе се приклучи, со што Украина драстично ќе и сврти грб на соработката со Русија“, рече Милановиќ.
Тој додаде дека не се водело сметка за тоа како Русија ќе реагира кога западните сили ќе дојдат на нејзината граница.
„Таквата политика можеби доведе до војна во Украина“, рече Милановиќ.
Говорејќи за ЕУ, Милановиќ оцени дека таа повеќе не е моќ каква што се смета.
„Европа оди во Кина и таму држи предавања за човекови права, наместо да зборува за продажба на европски автомобили, чија продажба е во значителен пад. Главни играчи на светската сцена се САД и Кина. Европа веќе нема ресурси, не е лидер во иновациите и знаењето“, рече Милановиќ.
Тој додава дека од друга страна и ЕУ е успех затоа што спречила конфликти и територијални амбиции меѓу членките, без разлика што „нешто пламнува“ овде-онде.
„Земјите живеат релативно хармонично, а што се однесува до Хрватска, таа доби пари од ЕУ, но и даде многу“, рече хрватскиот претседател и додаде дека ја разбира загриженоста на земјите кои граничат со Русија и смета дека Хрватска е во добра позиција во овој поглед.
Говорејќи за членот 5 од НАТО, кој е создаден во 1949 година и се води од принципот „Сите за еден, еден за сите“, Милановиќ вели дека пресудниот дел од текстот е дека „членките на НАТО ќе реагираат на адекватен начин во зависност од проценката, вклучително и воената сила“.
„Тоа не е апсолутна гаранција, тоа е прашање на добра волја, а Хрватска цело време делуваше со добра волја. Нашата армија беше во Полска и Литванија затоа што „се нервозни за Русите“. Воена акција во корист на трета страна!? Во ситуација кога некој однадвор ве напаѓа, едно е кога семејството е помало, а кога е здробено, многу потешко е да се менаџирате“, рече Милановиќ, додавајќи дека Хрватска ќе делува солидарно во воениот сојуз, но до одредена граница.
Регион
Руските разузнавачи лути на Србите: Компании ги снабдуваат Украинците

И покрај прогласената неутралност на Белград, српските воени компании ги снабдуваат вооружените сили на Украина со муниција, објави прес-службата на Руската служба за надворешно разузнавање (СВР).
„И покрај ‘неутралноста’ што ја прогласија српските власти, српските воени компании продолжуваат да ја снабдуваат Украина со муниција. Пaраванот за ова е шема која користи лажни сертификати на крајните корисници и земјите посредници. Најчесто се споменуваат земјите на НАТО, имено Чешка, Полска и Бугарија“, се наведува во соопштението за печатот.
Се додава дека африканските земји неодамна се користени во шемата.
„Придонесот на работниците од српската одбранбена индустрија во војната што ја започна Западот и за која Европа сака да заврши со стратешки пораз на Русија се мери со стотици илјади гранати, како и милиони куршуми. Малку е веројатно дека таквото снабдување може да се оправда со хуманитарни причини“.
„Се чини дека желбата на српските работници во одбранбената индустрија и нивните покровители да профитираат од крвта на братските словенски народи ги натера овие луѓе целосно да заборават кои се нивни пријатели, а кои се нивни непријатели. Русија повеќепати им пружила помош на Србите во најтешките моменти од нивната историја“, се нагласува во соопштението.
„Да се потсетиме, на пример, ослободувањето на Србија од Отоманската империја, спречувањето национални катастрофи за време на Првата светска војна, преговорите со фашистичките окупатори и нивните послушници за време на Втората светска војна, бомбардирањето на НАТО на Белград и трагедиите на Косово“, заклучуваат Русите.
Регион
(Видео) Наезда на стаорци во Сараево: прогласена епидемија на лептоспироза

Објавите на социјалните мрежи од жителите на главниот град на Босна и Херцеговина покажуваат наезда од глодари кои пливаат во реката Миљачка, која тече низ центарот на градот.
Жителите на Сараљево според написите во локалните медиуми, долго време се навикнати на лоши јавни услуги, и споделуваат фотографии од преполни контејнери за ѓубре и нелегално фрлен отпад, заедно со поплаки дека властите не успеваат да ги отстранат мртвите животни од јавните површини, вклучително и детските игралишта.
Štakori preplavili sarajevsko naselje Dobrinja, Vlada Kantona Sarajevo godinama ne radi deratizaciju. pic.twitter.com/gj7B1qCKhH
— VOX (@VGNaroda) August 10, 2024
Здравствените експерти предупредуваат дека неуспехот да се контролира популацијата на глодари во Сараево доведе до алармантно зголемување на болестите што ги пренесуваат стаорците.
За само еден 24-часовен период оваа недела, најголемата болница во земјата регистрираше дванаесет случаи на лептоспироза. Тоа е продолжение на постојаниот тек на инфекции што се случуваат од почетокот на овој месец.
Drvenija pic.twitter.com/HDOYbKlE5O
— nocnamora (@AmilaSamo) August 10, 2024
Болеста најчесто се пренесува на луѓето преку вода или почва контаминирана со урина или измет од глодари.
Симптомите може да варираат од главоболки и болки во мускулите до крварење во белите дробови. Акутната форма на болеста, позната како Вајлова болест, може да предизвика жолтица, па дури и откажување на бубрезите. Локалните власти во Сараево прогласија епидемија, што овозможи воведување итни мерки, вклучително и долго потребна акција за чистење.
Дополнителни општински работници, опремени со средства за дезинфекција, се распоредени за да спроведат „пролетно чистење“ на јавните површини низ градот, а организирано е и дополнително собирање ѓубре. На училиштата им е наложено да ги чистат своите игралишта, да ги косат тревниците и да ги проверат подрумите за глодари.