Саудиските официјални претставници ги повикаа турските експерти и релевантните официјални претставници да го посетат саудискиот конзулат во Истанбул по исчезнувањето на саудискиот новинар Џамал Кашогија минатата недела и откако денеска властите во Турција објавија дека ќе го пребараат саудискиот конзулат во Истанбул.

Претходно, денеска, „Вашингтон пост“ објави дека според фотографија што тие ја добиле од извори билски до истрагата, новинарот влегол во зградата на саудискиот конзулат во Истанбул, но, како што тврдат медиумите, тој никогаш не излегол или барем досега не биле објавени докази дека тој ја напуштил зградата.

Ријад, пак, вели дека новинарот од конзулатот си заминал жив.

Државниот секретар на САД, Мајк Помпео, ја повика владата на Саудиска Арабија да поддржи темелна истрага за исчезнатиот саудиски новинар и транспарентно да ги објави резултатите од истрагата, пренесуваат медиумите. По изјавата на Помпео, се огласи и шефицата за надворешни работи на ЕУ, Федерика Могерини, која изјави дека целосно го поддржува Помпео.

59-годишниот новинар исчезна за време на посетата на саудискиот конзулат во Истанбул, каде што отиде по документи што му беа потребни за да може да се ожени со својата свршеница, која е од Турција, наведува агенцијата од САД.

Турските власти и неговите пријатели изјавија за АП дека стравуваат оти новинарот бил убиен во конзулатот, а Саудиска Арабија таквите изјави ги карактеризира како неосновани, но, како што забележуваат медиумите, никогаш не дала ниту докази дека тој по влегувањето, ја напуштил зградата на конзулатот.