Регион
Сослушан таксистот што беше киднапиран од масовниот убиец во Младеновац

Таксистот Драгослав А. (58), кој Урош Блажиќ (21) го киднапира и го држеше како заложник по масакрот што го направи во Младеновац, денеска беше сослушан во Обвинителството во Смедерево.
Како што пренесе „Информер“, таксистот детаљно опишал како Блажиќ налетал на неговиот автомобил и со закани му наредил да го вози до Вињиште во Крагуевац, каде што бил уапсен.
Тој детаљно раскажа сè што му се случило кобната ноќ кога Блажиќ упаднал во неговиот „форд“. По сослушувањето, тој не сакаше да разговара со новинарите бидејќи се плаши од семејството на осомничениот Блажиќ – според извор на „Информер“ од истрагата.
Блажиќ, по убиствата, налетал на такси-возило, во кое имало девојка која го лажела дека е бремена за да ја поштеди неа.
Храбриот таксист успеал да го убеди Блажиќ да ја пушти девојката по што го однел до Вињиште кај Крагуевац, каде што масовниот убиец бил уапсен.
Блажиќ колежот го почна вечерта на 4 мај во Мали Орашје, при што без причина ги уби Марко Митровиќ (18), потоа Лазар Миловановиќ (20) и неговиот братучед Александар М. (17), како и Немања Стевановиќ (21) и малиот Никола М. (15).
Тешко ранил уште шест млади лица. Потоа во Дубона ранил четворица, кои ја поправале капијата, а потоа на 500 метри во училишниот двор ги убил Далибор Тодоровиќ (25), како и полицаецот Милан Паниќ (22) и неговата сестра Кристина (19).
Следуваше драматична потера по Блажиќ во која учествуваа повеќе од 600 полицајци, а тој беше уапсен следното утро во куќата на дедо му по мајка во Вињиште кај Крагуевац. При апсењето ги молеше специјалците да не го тепаат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Регион
Не успеа ниту новиот обид за избор на претседател на косовското собрание

Собранието на Косово и енеска не го избра Аљбуљен Хаџиу за претседател на собранието.
При гласањето Хаџиу доби поддршка од 54 пратеници, 44 беа против, а три лица беа воздржани.
За него гласаа пратениците на Самоопределување, како и пратениците на малцинските заедници, освен Адем Хоџа, кој гласаше против.
На седницата не учествуваше пратеничката Дуда Баље, која досега гласаше против.
Против гласаа членовите на Демократската партија на Косово, Демократскиот сојуз на Косово и Алијансата за иднината на Косово.
Претставниците на досегашната опозиција, по седницата, изјавија дека сè ова личи на театар и ја обвинија победничката партија дека намерно го спречува конституирањето на парламентот бидејќи нема гласови за формирање на новата влада на Косово.
Од друга страна, Самоопределување ги обвини пратениците на поранешната опозициска партија дека го блокираат нивниот предлог.
Продолжението на конститутивната седница на косовскиот парламент е закажано за 1 мај.
Регион
По две недели, студентите ја прекинуваат блокадата на РТС

Студентите во Белград вечерва објавија дека ја прекинуваат блокадата на зградата на Радио и телевизија на Србија, објави Б92.рс.
Тие на социјалните мрежи објавија дека ја прекинуваат блокадата што беше воведена од 14 април, откако Комисијата за култура и информации донесе одлука за откажување на стариот конкурс и распиша нов конкурс за избор на членови на Советот на Регулаторното тело за електронски медиуми (РЕМ).
Министерот за информации и телекомуникации, Борис Братина, синоќа изјави дека верува оти распишувањето на нов конкурс за избор на членови на советот на РЕМ, кој беше поставен како услов за прекин на блокадата на РТС, нема да ја заврши кризата околу јавниот сервис.
„Прво, оние што протестираат пред РТС всушност се на погрешна адреса. Бидејќи РЕМ се наоѓа на различна адреса од РТС, и тоа е она што всушност најмногу ги интересира, како и многу други. Генерално, тоа е еден вид борба за тој РЕМ, бидејќи највредните работи таму се всушност овие природни ресурси, со други зборови, фреквенциите што ги доделуваат“, истакна Братина.
Тој рече дека Владата добила писмо од директорот на РТС, во кое се наведува дека новинарите немаат услови да работат од дома, дека ситуацијата е тешка, дека програмата е доведена во прашање, но дека никаде не е наведено зошто.
Поради блокадата, РТС ја емитува својата програма според изменет распоред, а јавниот медиумски сервис објави дека вработените вложуваат големи напори за реализација и емитување на програмата, и покрај, како што велат, нелегалната блокада на зградата, студиото, емитувачката и другата опрема, како и прогонот на новинарите и снимателите на терен.