Регион
Српските медиуми: Момчето убиец имало план да застрела повеќе лица, поминаа три месеци од масакрот што ја зацрни Србија

Ученикoт Коста К. (14) од седмо одделение на ОУ „Владислав Рибникар“, кој на денешен ден, пред точно три месеци, изврши грозоморен масакр во кој со пиштолот на татко му уби девет негови врсници и еден возрасен, планирал да убие уште многу деца.
Како што дознава српскиот весник „Информер“, тој им признал на инспекторите дека направил список со деца кои сакал да ги убие, но открил дека неговата прва листа имал над 25 имиња,
„Направив список за стрелање. На него имаше преку 25 имиња и сфатив дека е сепак премногу, па се откажав од него. Тој ден кога дојдов на училиште решив да пукам по ред“, раскажало детето, пишува „Информер“.
На 3 мај во 08:40 часот со ранец и два пиштола момчето убиец влегло во училиштето. Најпрвин пукало во обезбедувањето, а потоа во девојчињата кои ги затекнал во ходникот. Влегол во своето одделение. VII/2 кое било на час по историја и ги убил соучениците во училницата. Тоа утро К.К. уби девет врсници и еден чувар, а рани четворица.
Потоа отишол во училишниот двор, ги фрлил пиштолите и повикал полиција. Се претставил, кажал што направил и мирно чекал инспекторите да дојдат по него.
„Јас сум психопат“, наводно било првото нешто што момчето убиец, кое тогаш имало 13 години, поради што не било кривично одговорно според законот, и го кажало на полицијата.
Истиот ден бил сместен во психијатриска клиника каде и понатаму е под максимално обезбедување. Од станот во кој живеел со родителите, полицијата запленила компјутери, како и списоци и детални училишни планови што ги направил.
Истиот ден кога момчето убиец го изврши масакрот, неговиот татко беше уапсен и се уште е во притвор. Постои сомнеж дека не го обезбедил соодветно оружјето што го поседувал легално, и дека неговиот син го употребил кобниот ден, откога претходно го носел на стрелиште и го научил да пука прецизно .
Во истрагата што ја спроведе Вишото јавно обвинителство во Белград против таткото, момчето убиец беше сослушано и како сведок преку видео врска воспоставена меѓу клиниката и обвинителството.
На распитот, тој признал дека татко му го однел на стрелиште и, наводно, го ангажирал најдобриот инструктор на стрелиштето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Генерален штрајк во Грција по најавата за работа од 13 часа на ден

Животот во Грција денес ќе застане поради генерален штрајк против плановите на конзервативната влада за воведување можност за 13-часовен работен ден. Транспортот во Атина, возовите и фериботите ќе бидат во прекин, а ќе учествуваат и наставници, болнички работници и државни службеници.
Протести се најавени околу пладне во целата земја против реформата што ја заговара конзервативната влада на Киријакос Мицотакис.
Главниот синдикат на приватниот сектор GSEE, кој го предводи штрајкот заедно со синдикатот на јавниот сектор ADEDY, објави дека реформата „ги загрозува здравјето и безбедноста на работниците и ја уништува рамнотежата помеѓу работата и приватниот живот“.
Прокомунистичкиот синдикат ПАМЕ ја обвини владата дека се обидува да воведе модерно ропство за работниците и да ги принуди да трпат нехумано работно време и мизерни плати.
Синдикатот исто така го отфрли она што го нарече сурова дерегулација, што бргу напредува во Грција од должничката криза во 2009 година.
Најавениот закон би овозможил работа од 13 часа на ден за истиот работодавец во вонредни околности и со дополнителни прекувремени часови.
Во земја во која економијата закрепна од должничката криза, но сè уште е кревка, оваа можност веќе постои, но само ако работникот има два или повеќе работодавци.
Мицотакис, кој е на власт од 2019 година, истакна дека многу млади луѓе во моментот работат две работни места и сакаат да работат повеќе за да заработат повеќе.
Министерката за труд Ники Керамеус нагласи дека мерката е исклучителна и нема да стане вообичаена. „Тоа е одредба што важи до 37 дена во годината, само со согласност на работниците и со зголемување на платите од 40 проценти“, изјави таа за „Мега ТВ“ оваа недела.
И покрај намалувањето на невработеноста и континуираниот раст на БДП, кој според Европската комисија минатата година изнесувал 2,3 процента, ниските плати остануваат главен извор на загриженост и еден од главните проблеми за Грците заедно со високите трошоци за живот.
Минималната плата, иако е зголемена, е 880 евра месечно.
Според Евростат, Грците работат просечно 39,8 часа неделно во споредба со просекот на Европската Унија од 35,8 часа.
Во туристичкиот сектор, во текот на шпицот на сезоната, келнерите и готвачите работат многу часови, понекогаш без слободен ден во неделата. Законскиот работен ден во Грција трае осум часа, со можност за платена прекувремена работа.
Грција веќе ја воведе опцијата за шестдневна работна недела, особено во време на голема побарувачка во одредени сектори, како што е туризмот.
Регион
Пукањето во Белград на само 300 метри од куќата на Мирослав Илиќ, пејачот се огласи: „Боже господе, што се случува“

Во пукањето во Вишњичка бања се повредени пет лица, меѓу нив и една жена за чијшто живот се борат лекарите.
Според неофицијални информации, на пукањето му претходела тепачка, а сè се случило на нешто повеќе од 300 метри од куќата на познатиот пејач на народна музика, Мирослав Илиќ, пишува „Блиц“.
Илиќ по повод настанот се огласи за домашните медиуми.
„Живеам во мирна улица, во мирен крај. Чувај Боже што се случува. Не сум гледал вести и не сакам да знам“, изјави Мирослав за Телеграф.
Иако првичните информации укажуваа дека една жена починала, докторите во Ургентниот центар успеале да ја оживеат.
Неофицијално, повеќе вооружени лица излегле од бело комбе и почнале да пукаат. Овие информации засега не се официјално потврдени, а во тек е полициска потера по напаѓачите.
Очевидци опишале дека од белото комбе излегле неколку лица и почнале да пукаат насекаде.
Регион
(Видео) Полицијата се’ уште трага по напаѓачите по пукањето во кафулето во Белград

Пет лица беа ранети во пукање во кафуле во белградската населба Вишњичка бања, а едно лице е во животна опасност. Напаѓачите, кои пристигнале со бело комбе, влегле во локалот и отвориле оган по гостите.
Повредените – две жени и три мажи – се пренесени во Ургентниот центар. Полицијата покрена акција и сè уште трага по сторителите, јавува „Н1“.
Очевидци раскажаа дека на автобуската станица во близина имало голем број деца кои се разбегале уплашени, а пристигнувањето на итната помош се чекало долго. Жителите потсетуваат дека веќе подолг период имаат проблеми со навивачки групи во оваа населба.