Косовскиот претседател, Хашим Тачи, на прес-конференција рече дека нема да се сретне со специјалниот пратеник на ЕУ за дијалог меѓу Белград и Приштина, Мирослав Лајчак, освен ако не каже нешто конкретно.

Бидејќи Лајчак потврди дека е на пат за Приштина, косовскиот претседател најави два услова за средба со него, пренесува „РТК2“. Првиот услов, според Тачи, треба да биде позитивен став на земјите членки на ЕУ за визната либерализација, а вториот услов е Косово да се третира како независна земја, со цел да се олесни дијалогот.

Тачи исто така рече дека поканата на САД упатена до Косово и Србија за состанок на 27 јуни во Белата куќа во Вашингтон ги зголемува надежта, оптимизмот и вербата дека процесот ќе биде успешен. Тој истакна дека основата за дејствувањето на косовската страна е целосно почитување на Уставот и дека во никој случај не се обидува да се загрози територијалниот интегритет на Косово.

„Ги повикувам сите да не шират дезинформации за размена на територии или нешто слично“, рече Тачи. „Косово оди таму како независна, суверена и обединета држава, со јасна политика. Секое дезинформативно тврдење, кое има цел да донесе забуна кај домашната и меѓународната јавност, е неосновано и е лажна вест“, додаде Тачи на прес-конференција во Приштина.