Регион
(Фото) Во Белград запленети 8,5 килограми кокаин вреден над еден милион евра

Српското Министерство за внатрешни работи пријавило дека во Белград биле уапсени двајца мажи М.П. (37) и М.Б. (55) поради постоење на основано сомнение дека сториле кривично дело неовластено производство и пуштање во промет на наркотични дроги.
Полицијата го привела М.П. и М.Б. на територијата на Пожега во Србија при примопредавање на 100 грама кокаин, а при претрес на станови и простории користени од нив на повеќе локации во Белград, околу 8,5 килограми кокаин, околу 13.000 евра, 160.000 динари, како и неколку патнички моторни возила.
Од Вишото јавно обвинителство во Белград соопштуваат дека при претреси на повеќе локации во Белград е пронајден кокаин со улична вредност од над еден милион евра, како и поголеми количества маса за зголемување на количината на дрога, пишува Н1 Србија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека „суштината на обоената револуција“ е дека Србија мора да биде послаба во споредба со сите во регионот, како и тој да биде „неспособен претседател кој би клекнал пред сите што не ѝ посакуваат добро на Србија“, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да можат да бидат задоволни“, рече Вучиќ во Палатата на Србија, одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека од друга страна напредува побрзо од другите, „што никому не му одговара“.
„Тоа е една од причините зошто го прават тоа, бидејќи би сакале да имаат некомпетентен претседател кој би клекнал на колена пред сите оние кои не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се „водачи на блокади“, дека ја мразат Србија и ѝ посакуваат најлошо на својата земја, наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот и многу економски гранки“.
„Дури и меѓу блокадите има такви кои ја сакаат Србија, но не можат да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.
Регион
Гори во Грција: издадена наредба за итна евакуација

Голем шумски пожар избувна денес во областа Каравадос на грчкиот остров Кефалонија, а издадена е наредба за евакуација на три области, јавуваат грчките медиуми.
Пожарот избувнал во земјоделска и шумска зона, а ангажирани биле 20 припадници на противпожарната служба со седум возила, како и членови на планинската спасувачка служба и волонтери, објави „Катимерини“.
„Доколку се наоѓате во областите Каравадос, Доризата и Керамис, засолнете се и упатете се во правец на Аргостоли. Следете ги упатствата на властите“, се наведува во известувањето на противпожарната служба.
Четири авиони и два хеликоптера исто така помагаат во гаснењето на пожарот, пишува грчкиот весник.
Фото: принтскрин