Регион
Целосна реконструкција во кабинетот на Еди Рама: албанскиот премиер разреши шест министри, меѓу кои и шефот на дипломатијата

Албанскиот премиер Еди Рама изврши реконструкција на владата и разреши шестмина министри во својот кабинет, меѓу другите и шефицата на дипломатијата Олта Џачка, пишува „Албанијан пост“
Рама побара од претседателот на Албанија да донесе указ за оваа работа, а најавено е дека измените ќе му ги достави денеска на Бајрам Бегај.
Олта Џачка повеќе нема да биде министер за европски и надворешни работи и на таа функција ќе биде именуван Игли Хасани.
Делина Ибрахимај ќе му ја препушти функцијата министер за финансии и економија на Ервин Мета. Ибрахимај сега ќе биде министерка за претприемаштво, а претходно таа функција ја извршуваше Едона Биљаљи.
Актуелната министерка за здравство, Огерта Манастирлиу, наместо Евис Куши, ќе биде министерка за образование и спорт, а нејзината функција ќе ја преземе Албана Кочи, објави „Албанијан пост“.
Рама ја разреши и министерката за земјоделство Фрида Крифца, која ќе ја замени Анила Денај, која беше министерка за економија. Ново име во кабинетот ќе биде Арбјан Мазнику, кој ќе биде министер за локална администрација.
Рама најави дека во октомври ќе биде свикан конгрес на неговата Социјалистичка партија на Албанија, на кој ќе бидат одобрени промени во структурата на секретаријатот на партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пленковиќ: Моето семејство е длабоко трогнато од фактот што се сретнавме со папата во неговите последни часови

Хрватскиот премиер Андреј Пленковиќ упати сочувство по повод смртта на светиот отец Франциско до кардиналот Кевин Фарел, Камерленго на Светата Римска црква.
„Во името на Владата на Република Хрватска и во мое лично име, изразувам длабоко и искрено сочувство за смртта на Светиот Отец Франциско, чиј животен и духовен пат оставија неизбришлива трага во современиот свет.
Хрватскиот народ, кој чувствува блискост и длабока почит кон папата Франциско од самиот почеток на неговиот понтификат, денес жали за загубата на човекот со вера, едноставност, понизност и сила.
Тој остави длабока трага не само на Католичката црква, туку и на меѓународната заедница. Неговиот постојан повик за солидарност, милост и блискост со исклучените, заборавените, сиромашните и болните инспирираше и поттикна милиони луѓе ширум светот на акција.
Имав особена чест да се сретнам лично со Светиот Отец вчера на Велигден, во Неговите последни часови, заедно со мојата сопруга и нашите три деца. Тоа беше краток, но длабоко трогателен момент – средба исполнета со добрина, насмевки и благослови кои ќе останат трајно врежани во сеќавањето на целото мое семејство како скапоцен подарок во моментот на збогување.
Република Хрватска и хрватските верници остануваат благодарни за сè што беше и направи папата Франциско – за Црквата, за светот и за секој од нас“, напиша Пленковиќ.
Регион
Вучиќ: Папата Франциско ќе биде вечна инспирација

Светот изгуби исклучителен духовен водач кој ширеше љубов, мир и солидарност преку своето апостолско дело, објави денеска српскиот претседател Александар Вучиќ по повод смртта на папата Франциско, оценувајќи дека животот на папата посветен на верата, љубовта и служењето на другите треба да биде инспирација за целиот свет.
На платформата Х, Вучиќ истакна дека работата на папата Франциско за зајакнување на меѓурелигискиот дијалог и неговата посветеност на хуманизмот оставиле неизбришлива трага во историјата. „Папата Франциско беше гласник на надежта и помирувањето, секогаш во служба на најранливите, а неговото заминување е загуба и тага за сите нас, бидејќи својот живот го посвети на верата, љубовта и служењето на другите. Тој ќе биде вечна инспирација за сите нас“, рече тој.
Вучиќ, во име на граѓаните на Република Србија и во свое лично име, изрази длабоко сочувство до Римокатоличката црква и до сите верници ширум светот. „Нека му е вечна слава“, напиша тој на социјалната мрежа Икс.
Регион
Додик: Британски специјалци се дојдени во Република Српска да ме убијат

Милорад Додик, претседателот на Република Српска и осуден бегалец кој е наведен како бегалец во Федерацијата на Босна и Херцеговина, во интервју за Новости упати сериозни обвинувања.
Тој тврди дека „тројца претседатели на европски земји и еден премиер“ му кажале дека во Босна и Херцеговина е префрлена британска воена единица со многу специфична задача – негова ликвидација.
„Тоа не е класична единица. Станува збор за четириесет војници кои пристигнаа со јасна наредба – не да ме уапсат, туку да ме убијат. И тоа под изговор дека давам отпор. Мафијашки принцип – ако отстраните човек, го отстранивте проблемот. Лидерите од Европа ми го потврдија тоа. Тие не се откажаа, но засега молчат“, вели Додик.
Тој во интервјуто нагласува дека не живее во страв и дека слободно се движи, отфрлајќи ги тврдењата дека е изолиран.
„Никогаш нема да бидам скршен од политичките процеси. Нема да се откажам од борбата за Република Српска“, вели тој.
Додик открива и дека официјални лица од Брисел наводно го советувале да се засолни.