Регион
Црна Гора би можела да го повлече признавањето на Косово, но дури по влезот во ЕУ
Црна Гора набргу би можела да го повлече признавањето на независноста на Косово, вели Жаклин Настиќ, пратеничката на левицата во германскиот Бундестаг, додавајќи дека не ја исклучува можноста тоа да се случи дури кога земјата ќе стане членка на ЕУ, пренесува „РТ Балкан“.
Во опширно интервју за подгоричката „Адрија ТВ“, Настиќ вели дека повлекувањето на признавањето на Косово ќе ѝ создаде на Црна Гора пречки на патот кон ЕУ.
„Морам да признам дека не верувам оти Црна Гора ќе го повлече признавањето на Косово во блиска иднина. Како членка на НАТО и кандидат за влез во ЕУ, со големи шанси да стане членка на Унијата, повлекувањето на признавањето би ѝ создало пречки на патот. Ова неодамна го потврди новоизбраниот претседател Јаков Милатовиќ. Можно е повлекување на признавањето, но дури по влезот во ЕУ. Сепак, и многу членки на ЕУ сè уште не го признаваат Косово, вклучувајќи ги Шпанија, Грција, Романија, Кипар и Словачка“, вели таа.
На прашањето дали во иднина и Германија би можела да го промени ставот по прашањето за независноста на Косово и да го повлече признавањето, Настиќ не верува дека такво нешто би се случило во блиска иднина.
„Не мислам дека германската влада набргу ќе го промени ставот за Косово. Сегашната влада на Бербокова ја следи традицијата на претходните влади на Герхард Шредер и Јошка Фишер, кој го поддржа нелегалното бомбардирање на Југославија од НАТО“, вели Настиќ.
Таа посочува дека до денес германските политичари од зелените, без никакви докази, тврдат дека Србија извршила геноцид на Косово.
„За нив е многу срамно што јас, како што ми рекоа, сум првиот германски политичар што учествувал на комеморацијата на годишнината од бомбардирањето на НАТО во Сомбор минатата година. Ова покажува колку е малку веројатно актуелната влада да го смени ставот“, вели Настиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Комбе излета од автопат во Србија: едно дете загина, седум повредени
Едно дете загина, а седум други се повредени, како и возачот на комбе, во тешка сообраќајна несреќа што се случи околу 3:30 часот наутро на автопатот Нови Сад-Белград, објавија регионалните медиуми во среда.
Детето родено во 2009 година почина на местото на настанот од повредите здобиени во несреќата, објави Радио телевизија Србија (РТС).
Седум други деца, родени помеѓу 2009 и 2012 година, се здобиле со тешки повреди и се пренесени во Детската болница во Нови Сад.
Возачот, исто така, е тешко повреден
Возачот на комбето, маж роден во 1982 година, исто така е тешко повреден и е пренесен во Ургентниот центар на Клиничкиот центар на Војводина.
Несреќата се случила кога комбето во кое се превезувале децата излетало од патот, пробило ограда и паднало во канал, објави Радио телевизија Војводина (РТВ).
фото: архива
Регион
(Видео) Тензично во Подгорица: приведени осум лица поради напади врз Турци
Црногорската полиција објави дека осум лица се уапсени во Подгорица за кривични дела со елементи на поттикнување национална и верска омраза и насилство.
Исто така, беше кажано дека полицијата ќе користи камери и беспилотни летала за снимање на јавни места со цел документирање кривични дела, а дека вчера во Подгорица се преземени 55 мерки против странци.
Според соопштението, полицијата го идентификувала и по наредба на државниот обвинител во Вишото државно обвинителство во Подгорица, го уапсила П. М. (35) од Подгорица.
Полицијата објави дека постои сомневање дека на 26 октомври, преку своите профили на социјалните мрежи „Инстаграм“ и „Фејсбук“, објавил заканувачка и навредлива порака упатена кон турските граѓани што живеат во Црна Гора, со која поттикнува омраза и нетрпеливост на национална и верска основа.
Geniş Özet: Karadağ’da “Türkü Öldür” sloganları
Karadağ’ın başkenti Podgorica’da geçtiğimiz hafta sonu yaşanan bıçaklama olayının ardından Türk vatandaşlara yönelik saldırılar gerçekleşti. 45 Türk vatandaşı gözaltına alınırken, 8 Türk vatandaşı da sınırdışı edildi. Karadağ… pic.twitter.com/9181ixW80j
— Selâmi Haktan (@slmhktn) October 28, 2025
Поради сомнение дека сториле кривично дело насилно однесување на штета на тројца турски државјани, по наредба на државниот обвинител во Основното државно обвинителство во Подгорица, уапсени се Б. С. (26), Ф. Ѓ. (25) и М. П. (31) од Подгорица.
„Се сомнева дека тие физички нападнале турски државјани во населбата Забјело удирајќи ги со тупаници, со нозе и користејќи палки, а кои на овој начин добиле телесни повреди. При претресот од нивното возило се пронајдени и одземени факли и фантомки“, се вели во соопштението на Полициската управа.
Додаваат дека Т. Б. (24), Б. Б. (22) и Ф. Ј. (18) се уапсени за сторен прекршок од член 7 од Законот за јавниот ред и мир на штета на турски државјанин. Тие се осомничени дека синоќа физички нападнале турски државјанин во населбата Забјело.
Полицијата соопшти дека службеници на Секторот за гранична полиција – инспектори за странци, презеле 55 мерки против странски државјани.
„За време на активностите спроведени на територијата на Подгорица, издадени се 30 прекршочни налози, две лица се насилно отстранети, две се протерани од земјата, а на тројца странски државјани им е откажан престојот“, посочи црногорската полиција.
Пред два дена во подгоричката населба Забјело дојде до физичка пресметка пред угостителски објект, во која едно лице од Подгорица, М. Ј., беше повредено со нож. Полицијата идентификува и приведе две лица – еден турски и еден азербејџански државјанин – поврзани со случајот.
По нападот, следуваа масовни полициски контроли и приведувања – околу 45 турски и азербејџански државјани беа задржани во рамките на проверка на престој и документи, што предизвика реакции и во Турција од страна на државниот врв.
Во вечерните часови некои од граѓаните на Подгорица излегоа на улиците, при што беа забележани ксенофобични скандирања, оштетување возила и дополнителни полициски интервенции.
Регион
(Видео) Се урна дел од таван на пазар во Загреб
Дел од таванот се урна во хала на пазарот „Долац“ во Загреб. Пред влезот има редица муштерии, но на вратата е истакнат предупредувачки знак, а работниците објаснуваат дека халата денес е затворена.
Според информациите на хрватските медиуми, таванот се урнал утрово во левиот дел од пазарот, а влезот е блокиран додека не заврши поправката.
Работниците велат дека штетата треба да се санира до утре.

