Потрагата по телото на убиената Данка Илиќ (2) се уште трае, а додека полицијата се обидува да го пронајде местото каде што го однеле убијците, осомничениот Дејан Драгијевиќ во сведочењето тврди дека не се сеќава на точната локација.

Адвокатот Радомир Мунизаба за „Блиц“ објаснува кои се можните исходи од ова страшно злосторство, во случај телото никогаш да не биде пронајдено.

На прашањето дали е можно да се гонат осомничените за убиството на Данка Илиќ врз основа на собраните докази и покрај тоа што телото на Данка Илиќ не е пронајдено, адвокатот одговара дека тоа е теоретски можно.

„Обвинителството врз основа на сите докази досега може да ги процесуира осомничените, пред се, ако се земат предвид ДНК трагите на Данка Илиќ од автомобилот и во внатрешноста на автомобилот кои се пронајдени, врз основа на утврденото време и место каде детето последен пат било видено, а и врз основа на признанијата на осомничените“, изјави адвокатот за „Блиц“.

Се поставува прашањето што ќе се случи во самата истрага доколку осомничените ги сменат изјавите во кои го признале делото и детално го опишале.

„Осомничените беа сослушани во полиција, а и во надлежното обвинителство, и согласно правилата на кривичната постапка можат да ја менуваат и дополнуваат одбраната во текот на постапката, дури и пред судот“, вели Мунизаба.

Соговорникот посочува дека е многу важно да се најде телото на убиената Данка Илиќ за да се утврди точната причина за смртта, како и повредите настанати додека била жива. Врз основа на тоа може да се утврдат квалификациите на кривичните дела кои би им се ставиле на товар на осомничените.

Само признанието на осомничените не би било доволно за обвинение, туку врз основа и на други докази кои се пронајдени и донесени, обвинителството може да ги обвини, додава.

Зошто убијците го кријат телото?

„Сите го чекаат одговорот на ова прашање, имајќи предвид дека во оваа истрага и откривањето на телото на малолетната Данка се вклучени сите граѓани и јавноста. Една од причините зошто не сакаат да кажат каде е телото на девојчето е тоа што со пронаоѓање на телото би можело да се утврдат други повреди нанесени на девојчето за кои осомничените не кажале, а кои не би сакале да се знаат“, рече адвокатот за „Блиц“.