Одлуката на грчката влада да ги пренесе на копнениот дел мигрантите од преполните острови во Егејското море, доведе до отпор кај локалното население. Жителите на Солун најавија нов бран протести против овој потег во услови на зголемен гнев поради приливот на бегалци што влегоа во земјата, пренсува РТ.

Локалното население во два наврати безуспешно се обиде да го спречи префрлањето на мигрантите од островите на копнениот дел. На вчерашниот антимигрантски собир во Солун пристигнале над 100-тина екстремни десничари, а имало и собир на анархистите.

Мигрантите кои со бродови на грчката воена морнарица вчера беа префрлени од островот Лезбос на пристаниште во близина на Атина, со часови чекале да пристигнат автобусите и да ги пренесат во хотелите чии што сопственици се согласиле да ги примат. Од кампот Морија на островот Лезбос каде што околу 15 илјади мигранти живеат на простор кој што е наменет за најмногу 3.000 луѓе биле пренесени 415 мигранти. Неименуван владин функционер открил дека владата планира да префрли околу 5.000 мигранти на копно во следните пет дена.

Антимигрантски демонстранти во Солун ја повикаа Атина да ги протера сите нелегални мигранти и да ја затвори границата за мигрантите. На снимките од маршот беа прикажани демонстрантите со транспаренти и грчки знамиња, а активист пред почетокот на поворката држеше икона на Богородица. 

Солун и околните градови се избрани за да бидат домаќини на илјадници мигранти кои Атина сака да ги пренесе од пренатрупаните објекти на грчките острови до копното. Според извештаите, во текот на викендот околу 900 луѓе биле пренесени од грчките острови на места на копното. Владата планира да премести вкупно 20.000 бегалци до крајот на годината.

„Грција во последните четири месеци прими 40.000 мигранти и бегалци“, изјави министерот за миграција Јоргос Кумуцакос за локалните медиуми.Тој додаде дека копното мора да покаже солидарност со пограничните региони кои го сносат товарот на приливот на мигранти.

Атина постојано во судир со Брисел околу мигрантската политика на ЕУ. Земјата, веќе загрозена од економските проблеми, е една од главните влезни точки за бегалците кои доаѓаат во Европа – и го носи товарот за сместување на десетици илјади баратели на азил.