За време на нивниот прв официјален состанок во Овалната соба денес, германскиот канцелар Фридрих Мерц му подари на американскиот претседател Доналд Трамп врамена копија од изводот од матичната книга на родените на неговиот дедо, Фридрих Трамп, кој е роден во Германија.

The Chancellor of Germany presents President Trump his grandfather’s birth certificate! 🇩🇪 pic.twitter.com/gMoatjzlND

— Margo Martin (@MargoMartin47) June 5, 2025

Подарокот, сместен во златна рамка, беше симболичен вовед во разговорите за клучни теми како што се одбранбената соработка, трговските односи и поддршката за Украина.

Мерц ги истакна заедничките корени на двете земји, нагласувајќи ја важноста на трансатлантските врски. Трамп, пак, го изрази своето задоволство од подарокот, истакнувајќи го своето германско наследство како основа за зајакнување на билатералните односи.

Средбата се одржа во контекст на затегнати трговски односи меѓу САД и Европската Унија, при што Трамп неодамна ја објави можноста за воведување царини до 50% за европските производи. Мерц ја нагласи потребата од дијалог за да се избегне ескалација на трговската војна што би можела негативно да влијае на двете страни.

Исто така, беше дискутирано и за зголемувањето на германските трошоци за одбрана, при што Мерц ги потврди плановите за зголемување на трошоците на 3,5% од БДП до 2032 година, во согласност со барањата на Трамп за членките на НАТО.

Се очекува состанокот да ги постави темелите за идна соработка меѓу двете земји, и покрај постојните разлики во пристапите кон одредени прашања.

Претседателот на САД, Доналд Трамп, откри нови детали од неговиот разговор со рускиот претседател на прес-конференцијата одржана со германскиот канцелар Фридрих Мерц во Белата куќа денес. Тој го предупредил Владимир Путин да не возвраќа на Украина, но вели дека тој не го послушал.

Трамп изјави дека Путин му ставил до знаење дека Русија „нема друг избор“ освен да одговори на украинскиот напад врз воените аеродроми. Трамп тврди дека се обидел да го одврати од тој план, но без успех.

„Тие навлегоа длабоко во Русија“, им рече Трамп на новинарите. „И Путин буквално ми рече: „Немаме избор, мора да се бориме за ова“ и дека веројатно нема да биде убаво.“ Додаде дека му рекол: „Немој да го правиш тоа, не треба да го правиш, треба да запреш.“

Трамп рече дека има „многу омраза“ меѓу двете страни, но изрази оптимизам дека прекин на огнот сè уште може да се случи: „Верувам дека ќе се случи во одреден момент.“

Кога го прашаа дали ќе продолжи да ја поддржува Украина, Трамп одговори: „Да, јас сум со Украина. Токму потпишавме голем договор за ретки метали со Украина и… Знаете за што сум? Запирање на убивањето, навистина. За тоа сум, повторно – запирање на војна што никогаш не требаше да започне“, рече тој.

Кога го прашаа дали ќе воведе дополнителни санкции против Русија, американскиот претседател Доналд Трамп рече дека ќе биде „многу, многу строг“ ако стане јасно дека војната нема да заврши наскоро.

Но, во изјава што веројатно ќе ги загрижи сојузниците на Украина, тој потоа додаде: „Можеби за двете страни, да бидам искрен. Потребни се двајца за танго.“

„Ќе бидеме многу цврсти, без разлика дали е Русија или некој друг. Таму се лее крв“, рече тој.

Трамп потоа се послужи со хокеарска аналогија, велејќи дека понекогаш мора да дозволите двете страни „малку да се пукаат една во друга“ пред да интервенирате.

Но, тој заклучи дека ситуацијата е исклучително тешка: „Има многу лоша крв. Морам да се справам со тоа, канцеларот Мерц мора да се справи со тоа… неверојатно е колку омраза има меѓу тие две страни што се во војна. Многу омраза.“

Еден ден претходно, Трамп објави дека разговарал со Путин по телефон и изјави дека рускиот претседател „му кажал многу јасно“ дека Русија ќе одговори на украинскиот напад. Кремљ потоа денес го потврди ова, велејќи дека ќе одговори „кога војската ќе смета за соодветно“.

Украинската безбедносна служба СБУ спроведе историска операција наречена Пајажина, погодувајќи неколку стратешки руски воздухопловни бази. Повеќе од 20 воени авиони, вклучувајќи бомбардери и авиони за надзор А-50, беа уништени или сериозно оштетени во најмоќниот напад на руска територија од почетокот на војната.

Американската амбасада во Киев издаде предупредување за растечкиот ризик од големи руски напади врз Украина.

Објавата на Амбасадата на нејзината веб-страница следуваше кратко откога Доналд Трамп и Владимир Путин, претседателите на САД и Русија, разговараа по телефон синоќа.

Путин му кажа на Трамп дека Кремљ ќе мора да одговори на украинската операција „Пајажина“, во која руски стратешки бомбардери беа цел во неделата.

„Русија го зголеми интензитетот на ракетните и на беспилотните напади врз Украина во последните недели и во моментот постои континуиран ризик од значителни воздушни напади. Амбасадата на САД во Киев ги повикува американските граѓани да бидат претпазливи. Како и секогаш, препорачуваме да бидат подготвени веднаш да се засолнат во случај да се издаде предупредување за воздушен напад“, се наведува во соопштението на Амбасадата.

Последното слично предупредување беше издадено од Амбасадата на САД на 9 мај наведувајќи тогаш дека постои ризик од големи воздушни напади во текот на следните неколку дена.

Речиси две недели подоцна, Русија ја почна својата најголема серија воздушни напади против Украина, која почна на 25 мај, целејќи ги Киев и други области на земјата, при што загинаа повеќе од 15 лица, а десетици беа ранети.

По синоќешниот разговор со Путин, Трамп напиша дека „разговарале за украинскиот напад врз руските авиони на терен, како и за разни други напади извршени од двете страни“.
„Беше тоа добар разговор, но не разговор што ќе доведе до моментен мир“, рече Трамп.