Премиерот на Србија, Милош Вучевиќ вели дека е добро за Ниш и за сите жители на Ниш што е спроведена голема антикорупциска акција и дека се видело дека нема заштитени лица.

На прашањето за апсењето на уште тринаесет лица во Ниш, Вучевиќ им рече на новинарите во Заечар дека останува да се види како обвинителството ќе го квалификува случајот, односно дали се работи за организирана криминална група или дали се работи за поединци или помали групи осомничени за сторени кривични дела.

„Неспорно е дека беше голема акција во Ниш, не знам дека сме имале акција од таков обем и гледате дека нема заштитени лица. Ќе ви кажам како претседател на партијата, не ми е удобно Драгана Сотировска да биде член на претседателството на партијата, Горан Весиќ да биде член на претседателството на партијата, Јелена Танасковиќ да биде член на претседателството на партијата. Не партиски, туку членови на претседателството на партијата. Двајца од нив се обвинети, па се чека да се види дали ќе стапи на сила обвинението за падот на настрешницата на железничката станица во Нови Сад. Ја имате поранешната градоначалничка на Ниш која е под истрага, односно е приведена“, рече Вучевиќ.

Тој додаде дека судот ќе утврди дали некој е виновен или не, односно одговорен за она за што го обвинува обвинителството.

Одговарајќи на прашањето дали актуелниот општествен контекст на некој начин влијаел на брзината на работа, пред се на вишото обвинителство во Ниш, а потоа и на другите правосудни органи, тој рече дека атмосферата во општеството секогаш создава одредени процеси, но дека не смета дека тоа е пресудно во овој случај и посочи дека тоа се постапки кои се подготвувале долго време.

„Тоа се прекршоци кои се подготвуваат подолго време, односно станува збор за обвинителски истраги. Не може некој да организира пар состаноци, протести, па вие набрзина правите се. Очигледно обвинителството долго време ги подготвуваше своите активности“, рече Вучевиќ.

Премиерот вели дека претходно се најавуваше засилена борба против корупцијата, но тоа не треба и нема да го одвлече вниманието од трагедијата што се случи во Нови Сад. Како што истакна, оваа тема е сè уште во фокусот, пред се во однос на обвинението и тоа што Обвинителството за организиран криминал ја презело истрагата за можни коруптивни дејствија околу изградбата на пругата Белград – Нови Сад – Суботица.

– Не само за станицата во Нови Сад, туку за целиот инфраструктурен проект. Тоа се болни, но лековити работи. Лековити работи за сите, пред се за целото општество, добри работи за државата, тешки работи, не секогаш пријатни, но неопходни – заклучи Вучевиќ.

Претседателот на Литванија, Гитанас Науседа денеска предложи 1 јануари 2030 година да биде официјален датум за пристапување на Украина во Европската унија.

Говорејќи на самитот „Поддршка на Украина“ во Киев, Науседа повика на решително лидерство со цел да се забрза интеграцијата на Украина во ЕУ, пишува „Киев Индипендент“.

„Безбедноста на Европа зависи од безбедноста на Украина. Затоа, да го забрзаме пристапот на Украина во ЕУ“, рече Науседа.

Тој додаде дека првата рунда од пристапните преговори може да биде отворена во наредните недели и ги повика европските лидери да го направат патот на Украина кон ЕУ „неизбежен“.

Украина поднесе барање за членство во ЕУ во 2022 година, набргу откако Русија започна целосна инвазија. Земјата доби кандидатски статус за неколку месеци, а официјалните преговори започнаа во јуни 2024 година. Украинскиот претседател Володимир Зеленски си постави амбициозна цел да отвори пет или шест преговарачки кластери оваа година, а првата фаза се очекува во рамките на ротирачкото претседателство на Полска со ЕУ, пренесува Танјуг.

Комесарот за проширување на ЕУ, Оливер Вархеј, претходно сугерираше дека Украина може да се приклучи на блокот до 2029 година, доколку успешно ги спроведе неопходните реформи. Лидерите на Летонија, Литванија, Естонија, Шпанија, Канада, Финска, Данска, Исланд, Норвешка и Шведска, генералниот секретар на ОБСЕ, францускиот министер за европски прашања Жан-Ноел Баро, претседателката на Европската комисија Урсула Фон дер Лајен учествуваат на самитот „Поддршка на Украина“ што се одржува во Киев по повод третата годишнина од нападот на Русија.

Генералното собрание на Обединетите нации денеска ја усвои резолуцијата подготвена од Украина и нејзините европски сојузници по повод одбележувањето на третата годишнина од рускиот напад врз Украина со 93 гласа „за“, 65 воздржани и 18 гласа „против“, пренесува Ројтерс.

Резолуцијата ја подготви Украина во соработка со повеќе од 50 земји, пренесе РИА Новости.

САД беа воздржани, а Вашингтон пак подготви своја, неутрална резолуција, за која денеска ќе гласа и Генералното собрание.

Резолуцијата бара Москва „веднаш, целосно и безусловно“ да ги повлече сите свои вооружени сили од украинска територија.

Резолуцијата содржи и едностран повик до Руската Федерација да ги прекине непријателствата, наведува руската агенција.

Во исто време, како што пренесува РИА Новости, „терористичките напади на Киев врз мирни граѓани на Руската Федерација, како и присуството на вооружените сили на Украина во регионот Курск“, на ниту еден начин не се осудувани или споменати во нацрт-резолуцијата, пренесува Танјуг.

Во текстот, исто така, не се споменува правото на народите на самоопределување, како што е содржано во Повелбата на ОН, додава руската агенција.

Русија, според медиумот, започна специјална воена операција во Украина на 24 февруари 2022 година, со цел, како што наведе, да се изврши демилитаризација и денацификација на Украина.