Свет
Путин ја обвини ЕУ за „пљачка сред бел ден“ на рускиот имот
Рускиот претседател Владимир Путин ја обвини Европската Унија за обид за кражба на руски имот сред бел ден.
Путин изјави дека на Украина и на Европа е да го направат следниот чекор кон мир.
„Претседателот Трамп вложува сериозни напори да го запре овој конфликт. Тој го прави тоа со целосна искреност“, рече Путин.
„Топката целосно е во полето на нашите западни противници, пред сè на водачите на киевскиот режим, а во овој случај, пред сè на нивните европски спонзори. Подготвени сме и за преговори и за мирно решавање на конфликтот“, додаде рускиот претседател.
Трамп се залага за мировен договор, но Украина и нејзините европски сојузници стравуваат дека условите за мир би биле наклонети кон Русија.
Путин се обрати на годишната конференција за медиуми и во телефонското јавување на „директната линија“, кои траеја речиси четири и пол часа. Тој предупреди против каква било закана за блокада на руската ексклава Калининград, велејќи дека Москва би се спротивставила на таквите потези и дека се ризикува „судир од големи размери“.
Руските претставници го обвинија Западот дека сака да го изолира Калининград, кој се наоѓа на балтичкиот брег и е сместен меѓу членките на НАТО и Европската Унија – Литванија и Полска, и во кој е стационирана руската Балтичка флота.
Путин изјави дека Русија би била подготвена веднаш да ја запре војната во Украина доколку добие безбедносни гаранции, додавајќи дека Москва нема намера да ја напаѓа Европа.
Тој рече и дека Русија е отворена за соработка под еднакви услови со Западот.
Путин повтори дека руските услови за завршување на војната во Украина се оние што ги изнесе во говорот во јуни 2024 година, кога побара Украина да се откаже од амбицијата за членство во НАТО и целосно да се повлече од четирите региони кои Русија ги смета за своја територија.
Киев порачува дека нема да се откаже од териториите што руските сили не успеале да ги освојат во речиси четири години војна.
Путин изјави дека украинскиот претседател Володимир Зеленски не е легитимен лидер. Русија би била подготвена да разгледа прекин на нападите длабоко во Украина за време на изборите. Тој додаде дека на пет до десет милиони Украинци кои живеат во Русија треба да им се овозможи да учествуваат на изборите.
Путин одговараше на прашања неколку часа откако лидерите на Европската Унија го одложија планот за користење на замрзнатиот руски имот како гаранција за заем за Украина, одлучувајќи наместо тоа да позајмат готовина за да ѝ помогнат во финансирањето на одбраната во следните две години.
Лидерите на ЕУ изјавија дека го задржуваат правото да го користат рускиот имот за отплата на заемот доколку Москва не плати воена отштета на Украина.
Путин рече дека блокот од 27 земји се откажал од првичниот план затоа што би се соочил со сериозни последици, додавајќи дека веќе е нарушен имиџот на ЕУ како безбедно место за чување имот.
„Кражба не е соодветен израз… Ова е пљачка сред бел ден. Зошто оваа пљачка не може да се спроведе? Затоа што последиците би можеле да бидат тешки за пљачкашите“, рече тој.
Кремљ соопшти дека однапред примил повеќе од 2,6 милиони прашања за годишната конференција на Путин со медиумите, нарекувајќи го настанот демонстрација на неговата отвореност да одговара на прашања за која било тема.
Путин, 73-годишниот претседател кој е разведен, потврдно одговори на прашањето на еден учесник дали е вљубен, но не откри детали. Тој му рече на едно момче дека понекогаш тајно се вози низ Москва за да разбере што се случува во Русија.
Depositphotos
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Украина почнува нов круг разговори со САД за завршување на војната
Украинските мировни преговарачи почнуваат нов круг разговори со американскиот тим за предлозите за завршување на војната со Русија, изјави шефот на украинската делегација, Рустем Умеров.
Тој наведе дека во разговорите ќе бидат вклучени и европските партнери на Киев и дека веќе се одржани прелиминарни консултации.
„Конструктивно сме насочени. Се подготвуваме за понатамошни разговори со американската страна“, рече Умеров, додавајќи дека безбедноста на Украина мора да биде долгорочно и сигурно гарантирана.
Администрацијата на американскиот претседател Доналд Трамп настојува да стави крај на речиси четиригодишната војна. Претходно неделава, претставници на Белата куќа разговараа со украински и европски функционери во Берлин.
Регион
Бахамите го признаа Косово
Бахамите официјално ја признаа Република Косово како независна и суверена држава, соопшти косовската претседателка Вјоса Османи.
Османи го потпишала договорoт на Бахамите со премиерот Филип Брејв Дејвис. На социјалната мрежа „Икс“ беше објавено заедничко соопштение во кое се наведува дека двете земји воспоставиле дипломатски односи, кои стапуваат на сила со денот на потпишување на заедничкото комунике, во согласност со меѓународното право и Виенската конвенција за дипломатски односи од 1961 година.
Bahamas recognizes the Republic of Kosovo as a sovereign and independent state! 🇽🇰 🇧🇸
We just signed our bilateral agreement with Prime Minister @honphilipedavis. On behalf of the people of Kosovo, I extend my sincere gratitude for this decision of historic significance!
Full… pic.twitter.com/a9LLtW2BW7
— Vjosa Osmani (@VjosaOsmaniPRKS) December 19, 2025
Во соопштението се наведува дека Бахамите и Косово ја потврдиле посветеноста на целите и принципите на Повелбата на Обединетите нации и изразиле намера да развиваат соработка во области од заемен интерес, како што се трговијата, туризмот, образованието, културата, технологијата и јавниот сектор.
Двете земји изразиле очекување за воспоставување топло и продуктивно партнерство.
Годинава, независноста на Косово ја признаа и Сирија, Судан и Кенија.
depositphotos
Свет
Најмалку три лица загинаа, а девет се повредени во напад со нож и димна бомба во Тајпеј
Најмалку три лица загинаа, а девет се повредени кога маж вооружен со нож и димна бомба денеска нападна граѓани во Тајпеј, соопштија градските власти.
Осомничениот подоцна загинал по пад од зграда на трговски центар, пренесе Асошиејтед прес (АП).
Полицијата соопшти дека осомничениот бил прогласен за мртов во болница откако скокнал од шестиот кат на зградата, објави Централната новинска агенција на Тајван.
Осомничениот, идентификуван како 27-годишниот Чанг Вен, фрлил димна бомба во близина на подземен излез од метро-станицата Тајпеј Мејн, во близина на главната железничка станица, што предизвикало паника и бегство на пешаците, објавија локалните медиуми.
Потоа се упатил кон север, во популарна шопинг-зона, каде со нож нападнал повеќе лица на првиот и четвртиот кат од стоковната куќа „Еслит“, при што најчесто им нанесувал убодни рани во пределот на вратот, наведува агенцијата, повикувајќи се на полицијата.
Локалните болници потврдија три смртни случаи, додека градските власти соопштија дека уште девет лица се хоспитализирани, од кои едно е во тешка состојба.
Чанг во ноември 2024 година не се одѕвал на обуката на резервниот состав на војската и бил баран поради кршење на законот за задолжителна воена служба, пренесе агенцијата.
Како што се наведува, тој не пријавил промена на местото на живеење, поради што повикот за резервна воена обука не му бил доставен, објави агенцијата, повикувајќи се на канцеларијата на окружното обвинителство.
pexels

